Հայ ազգային կոնգրես կուսակցության խորհրդարանական խմբակցության քարտուղար, ԱԺ պատգամավոր Արամ Մանուկյանի համոզմամբ, Սահմանադրությունը այսօրվա ճգնաժամային վիճակի հետ բացարձակապես կապ չունի և նախագահ Սերժ Սարգսյանի նախաձեռնած սահմանադրական փոփոխությունների գործընթացը «բլեֆ է»:
«Սահմանադրությունը ո՛չ ասում է հանցագործին մարզպետ դիր, ո՛չ հանցագործին դնում է նախարար, ո՛չ պատվեր է տալիս կուսակցություններ փակելու, մարդկանց տեռորի ենթարկելու: Սահմանադրությունն այստեղ բացարձակ կապ չունի: Սա բլեֆ է, և շուրջ երկու տարի է արդեն՝ այս բլեֆը խաղում են», - «Ազատություն TV»-ի ուղիղ եթերում երեկ հայտարարեց Արամ Մանուկյանը:
Պատգամավորի խոսքով, Սերժ Սարգսյանի ներկայացրած պատճառաբանությունները, թե սահմանադրական փոփոխություններն արվում են կառավարության և խորհրդարանի ֆունկցիաների տարաբաժանման, խորհրդարանի վերահսկողական գործառույթի ավելացման նպատակով, իրականությանը չեն համապատասխանում:
«Մեկը հարցնի՝ այսօրվա պառլամենտով, այս որակի պառլամենտով դու վերահսկողություն ո՞ւմ նկատմամբ ես իրականացնում: Երբ հանցագործների մեծ մասը, բիզնեսը, օլիգարխները նստած են այստեղ, դու նրանցով ի՞նչն ես վերահսկելու, Սահմանադրությունն ի՞նչ կապ ունի դրա հետ», - հարցնում է Մանուկյանը:
Նրա խոսքով, սահմանադրական փոփոխությունների գործընթաց նախաձեռնելով, «Սերժ Սարգսյանն այսօր հայտ է ներկայացնում պահպանելու իր իշխանությունը այլ խողովակով, այն է՝ պառլամենտականի մեջ»:
Մանուկյանը վստահ է, որ հասարակությունը ստիպված է լինելու սահամանադրական փոփոխությունների թեման դարձնել «հիմնական խոսելու թեմա», որի շուրջ հասարակությունը, քաղաքական ուժերը, քաղաքացիական ուժերը կբևեռացվեն:
«Ես շատ ուրախ եմ, որ այսօր արդեն արձագանքներ եղան քաղաքացիական ուժերի կողմից: Դա ոգևորող է, որ քաղաքացիական խմբեր կան, որոնք գիտակցում են վտանգը Սերժ Սարգսյանի վերարտադրման և սահմանադրական փոփոխությունների անցկացման հետևանքով ստեղծված վիճակի: Նրանք արդեն գիտակցում են: Ես կարծում եմ շատ շուտով լուրջ արձագանքներ պետք է լինեն բիզնեսի աշխարհից, որովհետև բիզնեսի աշխարհն էլ շատ լավ գիտակցում է, թե Սերժ Սարգսյանի վերարտադրման դեպքում երկիրը ուր է գնալու: Իրենք հո տեսա՞ն, ինչ է կատարվում բիզնեսի աշխարհում մարդկանց հետ, ովքեր հանկարծ փորձում են քաղաքական հավակնություններ ունենալ և ես կարծում եմ՝ սա այն դեպքն է, երբ բիզնեսը, քաղաքացիական ուժերը և քաղաքական ուժերը կարող են լայն կոնսոլիդացիա ունենալ այս չարիքի դեմ առնելու», - հույս է հայտնում ընդդիմադիր ՀԱԿ խմբակցության քարտուղարը: