Այսօր Ադրբեջանի կայունությանն ու անվտանգությանը սպառնացող վտանգներ կան, լրագրողների հետ հանդիպմանն ասել է Ադրբեջանի պետական անվտանգության ծառայության ղեկավար գեներալ-գնդապետ Ալի Նագիևը։
Համաշխարհային մասշտաբով օրեցօր աճող Ադրբեջանի հեղինակությունը, հաղթանակները քաղաքական, տնտեսական և ռազմական ոլորտներում, այդ թվում՝ Հայաստանի և Ադրբեջանի միջև խաղաղության պայմանագրի ստորագրման համար ստեղծված բարենպաստ պայմանները գրավել են արևմտյան մի շարք երկրների ուշադրությունը, հայտարարել է Նագիևը՝ նշելով, թե այդ երկրները թեև «դիտորդական առաքելություն» են իրականցնում սահմանին, սակայն «նրանց իրական նպատակը ամենևին էլ տարածաշրջանում խաղաղության և կայունության հասնելը չէ»։
Ադրբեջանի պետական անվտանգության ծառայության ղեկավարը, մասնավորապես, ընդգծել է Ֆրանսիան՝ նշելով՝ Փարիզը «միջնորդական առաքելություն է ստանձնել ղարաբաղյան հիմնախնդրի կարգավորման հարցում, սակայն իրականում միակողմանի դիրքորոշմամբ երկար տարիներ հովանավորել է Հայաստանին և նրան լիարժեք աջակցություն ցուցաբերել»։
Տարածաշրջանում խաղաղությունը պահպանելու փոխարեն, ըստ Նագիևի, Ֆրանսիան զենք ու զինամթերք է մատակարարում Հայաստանին։ «Ֆրանսիան այնտեղ իր ռազմական առաքելությունն է ներդնում, Հայաստանին դրդում է հերթական պատերազմի՝ փորձելով կյանքի կոչել Հարավային Կովկասը մարտադաշտի վերածելու իր ծրագիրը»։
Բաքուն Փարիզին նաև մեղադրել է լրտեսական ցանցեր ստեղծելու համար՝ ի վնաս Ադրբեջանի ազգային անվտանգությանը։
«Ձեռնարկվել և ձեռնարկվում են համապարժեք քայլեր երկրի անվտանգությանը սպառնացող վտանգները կանխելու համար», - ասել է Նագիևը՝ նշելով, որ օպերատիվ իրավիճակը միշտ վերահսկելի է։
«Մենք միշտ պետք է պատրաստ լինենք նոր մարտահրավերներին, մեր տարածաշրջանում տեղի ունեցող բացասական գործընթացների ամենատարբեր սցենարների և չկորցնենք զգոնությունն անվտանգության հարցերում», եզրափակել է Ադրբեջանի պետական անվտանգության ծառայության ղեկավարը։
Հայ-ֆրանսիական համագործակցության վերաբերյալ շատ կոշտ է արտահայտվում Ադրբեջանը, Փարիզի և Բաքվի միջև հարաբերություններն այդ պատճառով լարված են: Ֆրանսիան ու Ադրբեջանն անցյալ տարեվերջին դիվանագետների են արտաքսել։ Բաքուն նաև մեղադրում է Փարիզին՝ «Հարավային Կովկասում կայունությունը խաթարելու», «միակողմանի մոտեցման ու հայամետ դիրքորոշման համար»՝ փաստացի բոյկոտելով Ֆրանսիայի մանակացությամբ բանակցային բոլոր հանդիպումները։
