Հայաստանը Ալմա-Աթայի հռչակագրի հիման վրա որոշակի զիջումների գնալու պատրաստակամություն է հայտնել, և «մենք ակնկալում ենք, որ Ադրբեջանը նույնպես կգնա զիջումների», «Ազատության»-ը տված բացառիկ հարցազրույցում հայտարարեց Ֆրանսիայի դեսպան Օլիվյե Դեկոտինյին։
Սա պաշտոնական Փարիզի առաջին արձագանքն է Տավուշ-Ղազախ հատվածում սկսված սահմանազատմանը։
«Ադրբեջանը ներկայումս Հայաստանի տարածքից մեծ կտորներ է օկուպացրել, և այն պետք է դուրս գա այդ տարածքներից», - նշեց Օլիվյե Դեկոտինյին։
Ֆրանսիայի դեսպանի հետ հարցազրույցը՝ ստորև.
«Ադրբեջանը ներկայումս Հայաստանի տարածքից մեծ կտորներ է օկուպացրել և պետք է դուրս գա այդ տարածքներից»
«Ազատություն». - Քանի որ այսօր գրեթե բոլորի գլխավոր մտահոգությունը սահմանազատումն է Տավուշ-Ղազախ հատվածում, ես կսկսեմ մեր զրույցը հենց այդ հարցից: Վերջին մի քանի օրվա ընթացքում մենք մի շարք հայտարարություններ ենք լսել արևմտյան, ինչպես նաև տարածաշրջանային երկրներից, որոնք իրենց աջակցությունն էին հայտնում Երևանի և Բաքվի միջև համաձայնությանը։ Մինչդեռ Ֆրանսիան, լինելով Արևմուտքում հայերի ամենամոտ դաշնակիցը, մինչ օրս լուռ է։ Ո՞րն է Փարիզի դիրքորոշումն այս հարցում։
Օլիվյե Դեկոտինյի․ - Լավ է, որ սահմանազատումը սկսվում է։ Առավել ևս լավ է, որ այն սկսվում է Ալմա-Աթայի հռչակագրի հիման վրա։ Դա ակնհայտորեն դրական զարգացում է, որը պետք է շարունակություն ունենա. Հայաստանը Ալմա-Աթայի հռչակագրի հիման վրա որոշակի զիջումների գնալու պատրաստակամություն է հայտնել, և մենք ակնկալում ենք, որ Ադրբեջանը նույնպես կգնա զիջումների։ Ադրբեջանը ներկայումս Հայաստանի տարածքից մեծ կտորներ է օկուպացրել, և այն պետք է դուրս գա այդ տարածքներից։ Ֆրանսիայի վարչապետը վերջերս հիշեցրեց դրա մասին։ Եվ այսպես, մենք կարծում ենք, որ դա լավ զարգացում է, որը շարունակության կարիք ունի:
«Ազատություն»․ - Արդյո՞ք կիսում եք մտահոգությունը, որ արդյունավետ սահմանազատում չի կարող տեղի ունենալ սպառնալիքների ներքո, ինչի գոյությունը ընդունել է նաև Հայաստանի վարչապետը։
Օլիվյե Դեկոտինյի․ - Պետք է ինչ-որ տեղից սկսել: Պետք է ինչ-որ տեղից սկսել և իրականացնել սահմանազատումը բանակցությունների միջոցով։ Տավուշը լավ մեկնարկային կետ է։ Եվ մենք անհամբեր սպասում ենք, որ սահմանազատումը շարունակվի այն սկզբունքների շրջանակում, որոնց շուրջ Ադրբեջանը և Հայաստանը համաձայնել են Պրահայի հռչակագրով։ Դա Ալմա-Աթայի հռչակագիրն է, որով սահմանվում են նախկին խորհրդային հանրապետությունների միջազգային սահմանները, և կողմերը հարգում ու ճանաչում են միմյանց ինքնիշխանությունն ու տարածքային ամբողջականությունը։
«Ազատություն»․ - Ասացիք՝ Տավուշը լավ մեկնարկային կետ է, լա՞վ, թե՞ կետ, որն այդ պահին միակ հնարավորն էր։
Օլիվյե Դեկոտինյի․ - Այն սկսվել է, և մենք պետք է դրական տրամադրված լինենք։
«Ազատություն»․ - Մի քանի ընդդիմադիր կուսակցություններ, որոնք քննադատում են իշխանության դիրքորոշումն այս հարցում, վերջերս հայտարարեցին, որ պատրաստվում են հանդիպել արևմտյան երկրների դեսպանների հետ։ Հանդիպե՞լ եք նրանց, և ո՞րն է եղել Ձեր ուղերձը։
Օլիվյե Դեկոտինյի․ - Ես հանդիպում եմ նրանց։ Բայց կոնկրետ այդ թեմայով չեմ հանդիպել։ Առաջարկներ ստացել եմ և, իհարկե, կհանդիպեմ։ Ի դեմս Հայաստանի՝ ունենք բարեկամ երկիր, և Ֆրանսիայի դեսպանատունը բաց է բոլոր հայաստանյան քաղաքական ուժերի համար։
«Մենք մի շարք խնդիրներ ունեինք և դեռևս ունենք Ադրբեջանի հետ»
«Ազատություն»․ - Վերջին ամիսներին մենք ականատես եղանք Ֆրանսիայի և Ադրբեջանի միջև հարաբերությունների աննախադեպ վատթարացման, որի հետևանքով Փարիզը Բաքվից հետ է կանչել իր դեսպանին։ Սակայն, անցած շաբաթ ադրբեջանական որոշ, այդ թվում՝ պաշտոնական լրատվամիջոցներ հաղորդեցին, որ դեսպանը վերադարձել է։ Կարո՞ղ եք դա հաստատել:
Օլիվյե Դեկոտինյի․ - Ես Ադրբեջանում Ֆրանսիայի դեսպանը չեմ։
«Ազատություն»․ - Բայց դուք տեղյակ եք չէ՞ Ձեր գործընկերոջից։
Օլիվյե Դեկոտինյի․ - Ես պատասխանատու չեմ այդ երկրի հետ հարաբերությունների համար։ Մենք մի շարք խնդիրներ ունեինք և դեռևս ունենք Ադրբեջանի հետ, որոնց մասին հստակ հայտարարել է մեր ներքին գործերի նախարարը մի քանի օր առաջ՝ դա Ադրբեջանի միջամտության մասին էր մեր ներքին քաղաքականությանը, հատկապես Նոր Կալեդոնիայի տարածաշրջանում: Ներքին գործերի նախարարի ասածին ավելացնելու ոչինչ չունեմ։
«Ազատություն»․ - Ի վերջո, Ֆրանսիայի դեսպանը հիմա Բաքվո՞ւմ է, թե՞ ոչ:
Օլիվյե Դեկոտինյի․ - Չեմ կարող ասել՝ նա Փարիզում է, թե Բաքվում, բայց կարող եմ ասել, որ նա Շուշիում չէ։
Մատակարարումներ, ուսուցում, խորհրդատվություն. դեսպանը՝ Հայաստանի հետ համագործակցության մասին
«Ազատություն»․ - Տպավորություն է, որ Ալիևը փորձում է չվերահսկվող գերիշխանություն ունենալ այս տարածաշրջանում։ Դա ընդունելի՞ է Ֆրանսիայի համար:
Օլիվյե Դեկոտինյի․ - Մեզ համար ընդունելի է այն, ինչ մենք անում ենք Հայաստանի հետ։ Մենք Հայաստանի հետ նախաձեռնել ենք պաշտպանության ոլորտում համագործակցություն, որը նորություն է մեր հարաբերություններում, ու որը մեծ թափ է հավաքում։ Վերջին մի քանի ամիսների ընթացքում երկու երկրների միջև եղել են մի շարք պայմանավորվածություններ՝ երեք ուղղություններով։ Նախ՝ Հայաստանին պաշտպանական զինատեսակներ տրամադրել՝ իր բնակչությանը, իր տարածքը, իր ինքնիշխանությունը պաշտպանելու համար։ Երկրորդ՝ Հայաստանի զինված ուժերի ուսուցում Հայաստանում կամ Ֆրանսիայում, ինչպես նաև խորհրդատվություն Հայաստանի պաշտպանության նախարարությանը։
«Ազատություն»․ - Ձեր պաշտպանության նախարարը երկու ամիս առաջ այստեղ էր մի պատվիրակության հետ, որի կազմում էին նաև ֆրանսիացի շատ հայտնի զինագործներ։ Կարո՞ղ եք թարմ տեղեկություն տրամադրել՝ կա՞ն նոր պայմանավորվածություններ այս այցի արդյունքում: Ու եթե այո, ապա ո՞րն է մատակարարման ժամկետը:
Օլիվյե Դեկոտինյի․ - Ինչպես անցած հոկտեմբերին, այնպես էլ պաշտպանության նախարարի այցի ընթացքում հայտարարվել է մի շարք պայմանավորվածությունների մասին։ Ու մենք ականջալուր ենք մեր հայ ընկերների կարիքներին։
«Ազատություն»․ - Իսկ որո՞նք են այդ կարիքները:
Օլիվյե Դեկոտինյի․ - Պաշտպանական զենքեր՝ Հայաստանի տարածքը պաշտպանելու համար։
«Ազատություն»․ - Ընդամենը մեկ ամիս առաջ ձեր նախարար Ստեֆան Սեժուրնեն՝ ԱՄՆ պետքարտուղար Էնթոնի Բլինքենի կողքին կանգնած, բացահայտ ասաց, որ Ադրբեջանը դուրս է գալիս վերահսկողությունից և մարտահրավեր նետում Հայաստանի տարածքային ամբողջականությանը։ Եթե դա տեղի ունենա, ինչին ականատես ենք եղել վերջին տարիների ագրեսիաների ժամանակ, ի՞նչ կոնկրետ քայլեր կարող է Երևանը Ֆրանսիայից ակնկալել։
Օլիվյե Դեկոտինյի․ - Դե, մենք չենք սպասում, որ ագրեսիա տեղի ունենա: Այդ իսկ պատճառով մենք զարգացնում ենք մեր համագործակցությունը:
«Ազատություն»․ - Ի՞նչ է նախատեսում այդ համագործակցությունը՝ պաշտպանական զենքի մատակարարումներ, էլ՞....
Օլիվյե Դեկոտինյի․ - Մատակարարումներ, ուսուցում և խորհրդատվություն: Մենք մեր պատմության մեջ՝ 1940 թվականին, սարսափելի պարտություն ենք կրել նացիստական Գերմանիայից։ Այդ ժամանակ մենք համոզված էինք, որ մեր բանակը ամենաուժեղն է աշխարհում, քանի որ հաղթել էինք Առաջին համաշխարհային պատերազմում, բայց այդ բանակը մի քանի շաբաթվա ընթացքում պարտություն կրեց։ Եվ մենք դրանից դասեր քաղեցինք: Ֆրանսիացի հայտնի մի պատմաբան, որ այդ ժամանակ, ի դեպ, որպես սպա ծառայել էր բանակում, մի գիրք գրեց, որը կոչվում է «Տարօրինակ պարտություն», որով ախտորոշեց պարտությունը։ Շատ հետաքրքիր է, որ նա հետևյալ եզրակացությանն էր հանգել՝ բոլոր խոշոր ռազմական պարտությունները նախ և առաջ ինտելեկտուալ պարտություններ են: Եվ դա է պատճառը, որ թեև մեծ ուշադրություն է դարձվում զենքին, սարքավորումներին, որոնք կարևոր են, բայց դոկտրինան նույնպես առանցքային է:
«Ազատություն»․ - Հանրային հեռուստաընկերության հետ Ձեր վերջին հարցազրույցում Դուք նշեցիք, որ Հայաստանի դեմ ագրեսիայի դեպքում Ֆրանսիան իր հնարավորությունների սահմաններում Հայաստանին կտա պաշտպանվելու հնարավորություն։ Ինձ այդ հնարավորությունների շրջանակն է հետաքրքրում: Օրինակ, Փարիզը կարո՞ղ է դիտարկել իր զինվորներին Հայաստան ուղարկելու հարցը, ինչպես, օրինակ, արեց տասը տարի առաջ, երբ զորք ուղարկեց Մալի կամ Լիբիա՝ զինված խմբավորումներին չեզոքացնելու համար:
Օլիվյե Դեկոտինյի․ - Մենք խոսում ենք շատ տարբեր իրավիճակների մասին։ Աֆրիկայի Սահել շրջանում գործողությունները հակաահաբեկչական գործողություններ էին։ Այստեղ խոսքը երկու պետությունների միջև համագործակցության մասին է, և մենք փորձում ենք նպաստել հայկական զինված ուժերի կայացմանը: Կրկին, մենք չենք սպասում, մինչև ինչ-որ բան տեղի կունենա: Մենք փորձում ենք անել այն, ինչ անհրաժեշտ է, որպեսզի նման իրադարձությունները տեղի չունենան:
Դեսպանը՝ Ադրբեջանի դեմ պատժամիջոցներ առաջարկող Սենատի բանաձևի մասին
«Ազատություն»․ - Խոսելով արվող քայլերի մասին։ Վերջերս Ֆրանսիայի Սենատը գրեթե միաձայն երկու բանաձև ընդունեց, որոնք կոչ էին անում Ձեր կառավարությանը պատժամիջոցներ սահմանել Ադրբեջանի դեմ, այդ թվում՝ բռնագրավելով Ադրբեջանի ղեկավարների ունեցվածքը և արգելափակելով այդ երկրից գազի և նավթի ներմուծումը: Դա տեղի չունեցավ, և տպավորություն է, որ մի կողմից՝ Ֆրանսիայի կառավարությունն ընդունում է, որ մենք գործ ունենք ագրեսոր երկրի հետ, որը նաև էթնիկ զտումներ է իրականացրել, մյուս կողմից՝ խուսափում է այդ երկրի դեմ պատժամիջոցներ սահմանել:
Օլիվյե Դեկոտինյի․ - Եվրոպայում պատժամիջոցները կիրառվում են եվրոպական մակարդակով։ Պատճառն այն է, որ մենք միասնական շուկա ենք։ Եվրամիության անդամները ձևավորել են մեկ միասնական շուկա, և, լինելով ԵՄ անդամ, որևէ մեկը չի կարող միակողմանի պատժամիջոցներ սահմանել:
«Ազատություն»․ - Սակայն, Չեխիան անցած տարի հենց միակողմանի պատժամիջոցներ սահմանեց Ռուսաստանի դեմ, որի թիրախում էր, կարծեմ, նաև պատրիարք Կիրիլը:
Օլիվյե Դեկոտինյի․ - Եթե խոսքը իմաստալից, տնտեսական պատժամիջոցների մասին է, որոնք ազդում են, օրինակ, նավթի և գազի հատվածի կամ որևէ տնտեսական հատվածի վրա, ապա Եվրոպան մի տուն է, որտեղ եթե փակում եք մի պատուհան, ցանկացած մեկը կարող է մտնել մեկ այլ դռնով կամ ծխնելույզի միջով։ Արդյունավետ պատժամիջոցներ ունենալու համար պետք է հասնել նրան, որ եվրոպական բոլոր երկրները համաձայնության գան պատժամիջոցների շուրջ: Իսկ ներկայումս դրա վերաբերյալ համաձայնություն չկա, այդ հարցում կոնսենսուս չկա:
«Ազատություն»․ - Ֆրանսիայի՞ ներսում։
Օլիվյե Դեկոտինյի․ - Եվրամիության ներսում։
«Մենք Եվրամիության ներսում վճռականորեն աջակցում և ջատագովում ենք, որ Հայաստանն օգտվի Խաղաղության եվրոպական հիմնադրամից»
«Ազատություն»․ - Ի դեպ, խոսելով Եվրամիության մասին. Ֆրանսիան ջատագովն էր, որ Հայաստանը ներառվի Խաղաղության եվրոպական հիմնադրամի շահառուների ցանկում: Դիվանագիտական աղբյուրներից տեղեկություն ունենք, որ Հայաստանին 10 մլն եվրո տրամադրելու նախնական պայմանավորվածություն է եղել, սակայն Հունգարիան այժմ արգելափակում է այն։ Դուք լսե՞լ եք այդ մասին: Եվ արդյոք կլինե՞ն համատեղ ջանքեր՝ համոզելու, որ Օրբանը վերանայի իր դիրքորոշումը:
Օլիվյե Դեկոտինյի․ - Դա լավ հարց է Հունգարիայի դեսպանի համար, երբ նա նշանակվի, որովհետև, ինչպես գիտեք, դուք բոլորովին վերջերս պայմանավորվածություն եք ձեռք բերել Հունգարիայի հետ այդ հարցում, եթե չեմ սխալվում:
«Ազատություն»․ - Այո՛, միանգամայն ճիշտ եք:
Օլիվյե Դեկոտինյի․ - Ինչ վերաբերում է իմ երկրին, ապա մենք Եվրամիության ներսում վճռականորեն աջակցում և ջատագովում ենք, որ Հայաստանը օգտվի Խաղաղության եվրոպական հիմնադրամից: Ինչո՞ւ։ Որովհետև Հայաստանը հայտնվել է մի իրավիճակում, որը շատ նման է Խաղաղության եվրոպական հիմնադրամի մի շարք այլ շահառուների իրավիճակին: Հայաստանը մի երկիր է, որի տարածքը մասամբ օկուպացված է, և որին սպառնում են տարածաշրջանային տերությունները։
ԼՂ հայերի վերադարձի մասին. Այժմ իրավական հիմք կա՝ հարցը ոչ միայն ՄԱԿ-ում, այլև այլ հարթակներում շրջանառելու
«Ազատություն»․ - Եվ կա նաև մեկ այլ հարց, որը Ֆրանսիան շարունակաբար բարձրացնում է։ Խոսքը Լեռնային Ղարաբաղի խնդրի մասին է։ Ես հիշում եմ, որ անցյալ հոկտեմբերին, երբ Ֆրանսիայի Սենատում լսումներ եղան, ձեր նախկին արտգործնախարարն ասաց, որ Ադրբեջանի հարձակումը Ղարաբաղի վրա հանցագործություն է, որը չի կարող անպատասխան մնալ, և Ֆրանսիան պատրաստվում է նախաձեռնել նոր բանաձև ՄԱԿ-ի Մշտական խորհրդում՝ Ղարաբաղի հայերի վերադարձի պայմաններ ստեղծելու համար՝ ներառյալ միջազգային խաղաղապահների տեղակայում և նրանց իրավունքների ապահովում։ Անցել է վեց ամիս, մինչ օրս ի՞նչ է արվել։
Օլիվյե Դեկոտինյի․ - Կա մեկ դրական զարգացում։ Մենք այդ հարցը քննարկելու իրավական հիմք ունենք ոչ միայն ՄԱԿ-ի Անվտանգության խորհրդում, այլև ցանկացած միջազգային ֆորումում, քանի որ կա Արդարադատության միջազգային դատարանի որոշում, որը ճանաչում է Լեռնային Ղարաբաղի հայերի վերադարձի իրավունքը: Սա ամուր և օրինական հիմք է, շատ մանրամասն որոշում։ Եվ այս որոշումը պարտադիր է։ Դա պարզապես դատարանի կարծիքը չէ։ Դա պարտադիր է Արդարադատության միջազգային դատարանի բոլոր անդամների, այդ թվում՝ Ադրբեջանի համար։
Ինչ վերաբերում է Անվտանգության խորհրդին, ապա Ֆրանսիան երեք անգամ Անվտանգության խորհրդում բարձրացրել է Լեռնային Ղարաբաղում տիրող իրավիճակի վերաբերյալ հարցը՝ ինչպես շրջափակման ժամանակ, այնպես էլ Ադրբեջանի հարձակումից հետո: Անվտանգության խորհրդում մեկ երկիր, Անվտանգության խորհրդի մեկ մշտական անդամ, ինչպես Ֆրանսիան, կարող է արգելափակել տեքստը, բայց մի երկիր չի կարող տեքստ պարտադրել։
«Ազատություն»․ - Կարո՞ղ եք բացահայտել, թե որ երկիրն էր արգելափակել:
Օլիվյե Դեկոտինյի․ - Չկար մեծամասնություն, որ առաջ գնար քվեարկությանը։ Եվ կա մի երկիր, որը...
«Ազատություն»․ - Ընդամենը մե՞կ։
Օլիվյե Դեկոտինյի․ - Ոչ, ոչ, ոչ, մեծամասնություն չի եղել։ Վետոյի իրավունք ունեցող երկրներից ոչ բոլորն են կիսում իրավիճակի վերաբերյալ մեր տեսակետը։
«Այսօր մարտահրավերները գերակշռում են, բայց հնարավորությունները կարող են նորից աճել»
«Ազատություն». - Հայաստանում Ֆրանսիայի նախկին դեսպանը իր վերջին հարցազրույցում ասել էր, թե հայ ժողովուրդը կարող է կապող օղակ հանդիսանալ նույնիսկ երբեմն հակադիր շահեր ունեցող երկրների միջև։ Դեռ տեսնո՞ւմ եք այս հնարավորությունը։
Օլիվյե Դեկոտինյի․ - Կարծում եմ՝ Հայաստանը շատ հետաքրքիր իրավիճակում հայտնված երկիր է։ Գիտեք, այն գտնվում է Եվրոպայի, Մերձավոր Արևելքի և նախկին Խորհրդային Միության միջև: Այնպես որ, դա շատ հետաքրքիր աշխարհաքաղաքական դիրք է: Բայց դա նաև մի դիրք է, որը մարտահրավերներ է իր հետ բերում: Այսօր մարտահրավերները գերակշռում են, բայց հնարավորությունները կարող են նորից աճել։
Հայաստանն է, որ պետք է հստակեցնի իր դիրքորոշումը. դեսպան
«Ազատություն»․ - Եվրոպական ձգտումների մասին։ Որտե՞ղ եք տեսնում Հայաստանը՝ ԵՄ անդամության թեկնածո՞ւ, որպես մի պետություն, որը սերտորեն համագործակցում է ԵՄ ընտանիքի հետ, կամ գուցե մեկ ա՞յլ տեղ:
Օլիվյե Դեկոտինյի․ - Դե, դա Հայաստանը պետք է ասի, թե որտեղ է այն կանգնած այդ հարցում: Եվ ինչպես գիտեք, Հայաստանի կառավարության դիրքորոշումը, որն արտահայտել է վարչապետը ԵՄ խորհրդարանում…
«Ազատություն»․ - «…այնքան մոտիկ, որքան ԵՄ-ն հնարավոր կհամարի»։
Օլիվյե Դեկոտինյի․ - Դա արտահայտելու շատ ռոմանտիկ ձև է, ինձ դա դուր է գալիս: Եվ դա իրականում սիրո հայտարարության պես է հնչում: Գործնական առումով Հայաստանն արդեն եվրոպական քաղաքական հանրության մաս է, ինչը Ֆրանսիայի նախաձեռնությունն է, նախագահ Մակրոնի նախաձեռնությունը՝ ԵՄ-ն գործընթացների մեջ է ներառելու այն երկրները, որոնք ԵՄ-ի հետ շատ ընդհանուր բաներ ունեն, բայց ԵՄ-ի կազմում չեն կամ դեռևս չեն մտնում, որպեսզի հնարավոր լինի աշխատել մեր ընդհանուր նպատակների և մեր ընդհանուր մարտահրավերների վրա:
Հենց այս շրջանակներում է, որ Պրահայի հանդիպմանը Ադրբեջանի հետ բանակցություններում ձեռք բերվեց ամենակարևոր առաջընթացը՝ Ալմա-Աթայի սկզբունքի ճանաչումը, երկու պետությունների տարածքային ամբողջականության ճանաչումը։ Այսպիսով, Հայաստանն արդեն իր տեղն ունի եվրոպական ընտանիքում։
Արդեն մի քանի ամիս է՝ ութ ամիս է, ինչ Հայաստանում եմ։ Այստեղ ես շատ ձգտումներ եմ տեսնում դեպի Եվրոպա՝ որպես արժեքների համախումբ, որպես ապրելակերպ, որպես ընդհանուր քաղաքակրթություն։ Եվ այդ ճանապարհին Հայաստանի կողմից ընդունվեցին մի քանի շատ համարձակ որոշումներ, օրինակ՝ Միջազգային քրեական դատարանի Հռոմի ստատուտի վավերացումը։ Այսպիսով, Հայաստանն է, որ պետք է հստակեցնի իր դիրքորոշումը: Բայց, արդեն կան որոշ ընդհանրություններ, որոշակի ընդհանուր քաղաքականություն: Վերջերս Բրյուսելում Ձեր կառավարության ներկայացուցիչների հետ քննարկվեց Եվրոպայի հետ համագործակցության ողջ շրջանակը։ Այսպիսով, դա զրո կամ մեկ չէ, և ես տեսնում եմ, որ ջերմաստիճանը բարձրանում է:
«Ազատություն»․ - Եվ թեմայից դուրս մի հարց Մոսկվայում Ռուսաստանի նախագահի երդմնակալության մասին. մի քանի արևմտյան երկրներ բոյկոտեցին այն, մինչդեռ Ֆրանսիայի դեսպանը մասնակցեց: Ի՞նչ էր կանգնած այս որոշման հետևում։ Կարո՞ղ եք մանրամասնել:
Օլիվյե Դեկոտինյի․ - Դուք կարող եք մասնակցել այս տեսակի միջոցառմանը տարբեր մակարդակներով, և այդ ընտրությունը ցույց է տալիս ներգրավվածության մակարդակը:
Մակրոնի այցը Հայաստան դեռ հաստատված չէ
«Ազատություն»․ - Վարչապետ Փաշինյանը Ֆրանսիայի նախագահին հրավիրել է Հայաստան՝ մասնակցելու Շառլ Ազնավուրի 100-ամյակին նվիրված գալա համերգին։ Կարո՞ղ եք հաստատել, արդյոք նախատեսվում է նախագահ Մակրոնի այցը Հայաստան այս աշնանը։
Օլիվյե Դեկոտինյի․ - Հայաստանի իշխանությունների հետ մենք քննարկում ենք այցի հնարավորությունը, և ակնհայտորեն Շառլ Ազնավուրի 100-ամյակը շատ գրավիչ առիթ է դրա համար։
«Ազատություն»․ - Այսինքն՝ դա դեռ հաստատված չէ՞։
Օլիվյե Դեկոտինյի․ - Դա դեռ հաստատված չէ։
«Ազատություն»․ - Դուք ուղղակի աշխատում եք դրա վրա:
Օլիվյե Դեկոտինյի․ - Ճիշտ այդպես։
