Ուկրաինայի վարչապետ Արսենի Յացենյուկը հրաժարական է տվել այն բանից հետո, երբ Ուկրաինայի Գերագույն ռադայում մեծամասնություն կազմող ՈւԴԱՌ և «Սվոբոդա» խմբակցությունները պաշտոնապես դուրս են եկել իշխող կոալիցիայից:
Խորհրդարանի նիստում իր հրաժարականի մասին հայտարարելով՝ Յացենյուկը քննադատել է պատգամավորներին էներգետիկայի ոլորտի, ինչպես նաև զինված ուժերի ֆինանսավորումն ավելացնելու վերաբերյալ օրինագծերի հաստատումը տապալելու համար:
«Ես հրաժարական եմ տալիս կոալիցիայի լուծարման և կառավարության կարևոր նախաձեռնությունների արգելափակման պատճառով», - ասել է Յացենյուկը:
Նա հավելել է, թե չէր կարող համաձայնել «Ռեգիոնների» կուսակցության և կոմունիստների հետ կոալիցիա կազմելուն, և հրաժարականից բացի այլ ելք չի տեսնում:
Յացենյուկի հրաժարականից հետո խորհրդարանի խոսնակ Օլեկսանդր Տուրչինովը ՈւԴԱՌ և «Սվոբոդա» կուսակցություններին առաջարկել է վարչապետի ժամանակավոր պաշտոնակատարի թեկնածու առաջադրել, ով կգլխավորի կառավարությունը մինչև խորհրդարանական նոր ընտրությունների անցկացումը:
