Հայոց ցեղասպանության 100-րդ տարելիցին նվիրված միջոցառումները համակարգող, նախագահի աշխատակազմի ղեկավար Վիգեն Սարգսյանը, այսօր Tert.am-ի հետ զրույցում անդրադառնալով Թուրքիայի նախագահի կողմից կրկին պատմաբանների հանձնաժողով ստեղծելու առաջարկին, հայտարարել է, որ պատմությունն ուսումնասիրելու փուլը վաղուց անցել է և եթե Թուրքիայում որևէ մեկը ցանկություն ունի առերեսվելու պատմությանը, դրա համար կան շատ ուղիներ:
«1915 թվականի իրադարձությունների հարցը պետք է քննարկեն պատմաբանները, այլ ոչ թե քաղաքական գործիչները»,- Թուրքիայի պետական հեռուստաընկերության եթերում երեկ հայտարարել էր նախագահ Ռեջեփ Թայիփ Էրդողանը:
«Այդ պատմությանը թուրք քաղաքական գործիչները ծանոթ են ոչ պակաս, քան հայ պատմաբանները, և ոչ պակաս, քան թուրք պատմաբանները, հետևաբար պատմությունն ուսումնասիրելու փուլը կարծում եմ վաղուց անցել է»,- ասաց Վիգեն Սարգսյանը: