Համաներումը կտարածվի՞ Սուքիասյանի եւ Փաշինյանի վրա
Իրավաբան Հրայր Թովմասյանը «Ազատություն» ռադիոկայանի հետ զրույցում մեկնաբանում է, թե արդյո՞ք հատարարված համաներումը տարածվում է հետախուզման մեջ գտնվող Ազգային ժողովի պատգամավոր Խաչատուր Սուքիասյանի եւ «Հայկական ժամանակ» թերթի խմբագիր Նիկոլ Փաշինյանի վրա:
«Այն անձինք, ովքեր համաներման ընդունման պահին գտնվում են հետախուզման մեջ, նրանց վրա չի տարածվի այդ համաներումը: Բացառություն է նախատեսված այն անձանց համար, ովքեր մինչեւ 2009 թվականի հուլիսի 31-ը ներառյալ կամովին կներկայանան Հայաստանի Հանրապետության իրավապահ մարմիններին: Եթե գործը գտնվում է դատական վարույթում՝ դատարան: Այդ դեպքում համաներումը կտարածվի նաեւ նրանց վրա: Եթե չեն ներկայանա, ապա համաներումը նրանց վրա չի տարածվի», - ասաց Թովմասյանը:
Իրավական տեսանկյունից հնարավոր է նաեւ հետեւյալ իրավիճակը. այն ներկայացրեց հետընտրական իրադարձությունների առնչությամբ կալանավորվածներից մի քանիսի գործերում ներգրավված պաշտպան, փաստաբան Հովիկ Արսենյանը. - «Պատգամավոր Խաչատուր Սուքիասյանի եւ Նիկոլ Փաշինյանի վրա այնպիսի հոդվածներ են, որ այստեղ միայն հոդվածի վրա չէ, որ համաներումը տարածվում է, այլ պատժաչափի վրա: Այսինքն՝ պետք է դատարանով անցնի… դատարանը [առավելագույնը] 5 տարի տա, որ նոր համաներումը տարածվի»:
Ազգային ժողովի պատգամավոր Խաչատուր Սուքիասյանը մեղադրվում է 225 հոդվածի 1-ին մասով` զանգվածային անկարգություններ կազմակերպելու համար: «Հայկական ժամանակ» օրաթերթի գլխավոր խմբագիր Նիկոլ Փաշինյանը եւս մեղադրվում է նույն հոդվածով, բացի այդ՝ 316-րդ հոդվածի 1-ին մասի հատկանիշներով, այն է՝ իշխանության ներկայացուցչի նկատմամբ բռնություն գործադրելը, ինչպես նաեւ 225.1 հոդվածի 1-ին մասի հատկանիշներով։
Հրայր Թովմասյանը «Ազատություն» ռադիոկայանի խնդրանքով պարզաբանեց նաեւ, թե արդյո՞ք այսօր ազատ արձակված պատգամավորները կարող են շարունակել իրենց աշխատանքն Ազգային ժողովում. - «Պատգամավորական լիազորության դադարեցման հիմքերը նախատեսված են Սահմանադրության 67-րդ հոդվածում, որի հիմքերից մեկը ազատազրկման դատապարտվելն է: Քանի դեռ նրանք ազատազրկման չեն դատապարտվել, բայց նրանց նկատմամբ կա քրեական հետապնդում, իրենք շարունակում են իրենց պատգամավորական լիազորությունները: Իրենք նկատմամբ այս պահին, ես որքան հասկանում եմ, փոխվել է խափանման միջոցը»:
Ըստ իրավաբանի, այսօր ազատ արձակված պատգամավորները կշարունակել մնալ օրենսդիրում այնքան ժամանակ, քանի դեռ նրանց նկատմամբ չկա ազատազրկման դատապարտվելու վերաբերյալ օրինական ուժի մեջ մտած դատավճիռ։