Ադրբեջանի խորհրդարանը չընդունեց նոր սահմանափակումները

Խորհրդարանի իրավական հարցերի հանձնաժողովի նախագահ Ալի Հուսեյնովը երեքշաբթի օրը օրենսդիրներին ասել է, որ ոչ կառավարական կազմակերպությունների մասին օրենսդրությունում առաջարկվող փոփոխությունները հանվել են օրակարգից բազմաթիվ կազմակերպությունների արտահայտած մտահոգությունների պատճառով:

«Նախապես առաջարկվող փոփոխությունները ուղղված չէին քաղաքացիական հասարակության նկատմամբ սահմանափակումներին: Սակայն հաշվի առնելով ոչ կառավարական կազմակերպությունների ներկայացուցիչների բազմաթիվ կոչերը, որոշվել է օրակարգից հանել փոփոխությունները», - ասել է Հուսեյնովը:

Առաջարկվող փոփոխությունները, ըստ դրանց քննադատների, արտացոլում էին նախագահ Իլհամ Ալիեւի կառավարման ավտորիտար բնույթը: Առաջարկվում էր, մասնավորապես, որպեսզի ոչ կառավարական կազմակերպությունները արտերկրից ստանան իրենց ֆինանսավորման 50 տոկոսից ոչ ավելին, արգելվեր օտարերկրյա ոչ կառավարական կազմակերպությունների գործունեությունը, եթե այն հիմնված չէ «համապատասխան միջազգային համաձայնագրի» վրա:

«Ընդունվելու դեպքում, այդ փոփոխությունները կմեծացնեն լրագրողների եւ իրավապաշտպանների գործունեության նկատմամբ կառավարության վերահսկողությունը եւ գրաքննությունը», - երկուշաբթի օրը հայտարարել էր Amnesty International կազմակերպությունը:

Նախագծի վերաբերյալ մտահոգություն էին արտահայտել Եվրոպայի խորհուրդը, Human Rights Watch, Article 19, PEN իրավապաշտպան կազմակերպությունները:

Միաժամանակ, «Ֆրանսպրես» գործակալության վկայությամբ, ադրբեջանցի խորհրդարանականները երեքշաբթի օրը ընդունել են փոփոխությունները կրոնի ազատության մասին օրենսդրությունում, որոնք նույնպես իրավապաշտպան կազմակերպությունների եւ որոշ կրոնական առաջնորդների քննադատությանն են արժանանում:

Ընդունված փոփոխություններով, մասնավորապես, պահանջվում է, որպեսզի կրոնական կազմակերպությունների ղեկավարները հաստատվեն պետության կողմից:

Իշխանությունները վստահեցնում են, որ այդ փոփոխությունների նպատակն է իսլամական ծայրահեղականության կանխումը: