Ելույթներ ունեցան նախկին արտգործնախարար Ալեքսանդր Արզումանյանը, գլխավոր դատախազի նախկին տեղակալ Գագիկ Ջհանգիրյանը եւ շուրջ մեկ տասնյակ ընդդիմադիր գործիչներ:
Անդրադառնալով այն 19 ընդդիմադիրներին, ում նկատմամբ համաներումը դեռեւս չի կիրառվել, կամ ընդհանրապես չի վերաբերում, նախկին արտգործնախարար Ալեքսանդր Արզումանյանը, մասնավորապես, ասաց. - «Մենք խոստանում ենք բոլոր ազատագրված քաղբանտարկյալների անունից, որ պայքարելու ենք մեր մյուս ընկերներին` Նիկոլ Փաշինյանի գլխավորությամբ ազատ արձակելու համար»:
Հայ ազգային կոնգրեսի առաջնորդ, առաջին նախագահ Լեւոն Տեր-Պետրոսյանը իր ելույթում նշեց, որ «քաղբանտարկյալների ազատ արձակումը մեծագույն հաղթանակ էր` ձեռք բերված ժողովրդի հերոսական պայքարի շնորհիվ»:
Հիշեցնելով, որ ազատազրկվածներից ոչ մեկը «չընկրկեց մեկուկես տարվա ընթացքում», Տեր-Պետրոսյանը որպես «խիզախ քայլ» որակեց Նիկոլ Փաշինյանի` ընդհատակից դուրս գալու եւ իրավապահ մարմիններին հանձնվելու որոշումը:
«Համաներումը սովորաբար կիրառվում է ոչ թե որպես մարդասիրական կամ իրավական, այլ բացառապես քաղաքական ակտ` քաղաքական խնդիր լուծելու համար: Իսկ երբ համաներումը չի տարածվում բոլոր քաղբանտարկյալների վրա, այդ ակտը չի լուծում քաղաքական խնդիրը, այլ հակառակը` ավելի է խորացնում այն», - հայտարարեց ընդդիմության առաջնորդը:
Անդրադառնալով վերջին ընտրություններին` Լեւոն Տեր-Պետրոսյանը հայտարարեց, թե Գագիկ Բեգլարյանի «բռնի գահակալման գինը» եւս վերջին հաշվով վճարելու է Ղարաբաղը:
«Ղարաբաղյան հակամարտության կարգավորման գործընթացում առաջիկայում շատ լուրջ զարգացումներ են սպասվում, ինչը հնարավոր է առիթ դառնա եւս մեկ արտահերթ հանրահավաք կազմակերպելու», - ասաց Տեր-Պետրոսյանը:
Հանրահավաքը, չնայած հորդառատ անձրեւին, ավարտվեց երթով: