Փետրվարի 8-ին պաշտոնական այցով Ֆրանսիա ժամանեց Հայաստանի պաշտպանության նախարար Սեյրան Օհանյանի գլխավորած պատվիրակությունը։ Այցի ընթացքում նախատեսված են մի շարք հանդիպումներ։ Մասնավորապես, փետրվարի 10-ին Սեյրան Օհանյանը հանդիպում կունենա Ֆրանսիայի պաշտպանության նախարար Էռվե Մոռենի հետ։ Հանդիպման ընթացքում ստորագրվելու է երկու երկրների միջեւ համագործակցության համաձայնագիր։
Հայաստանի պաշտպանության նախարար Սեյրան Օհանյանի առաջին հանդիպումներից մեկը Ֆրանսիայի հայկական համայնքի հետ էր։ Հանդիպման ընթացքում Սեյան Օհանյանը ներկայացրեց է Հայաստանի բանակի ստեղծման պատմությունը, ունեցած հաջողությունները։
«Հայոց բանակը այսօր մարտունակ է, ի վիճակի է իր առջեւ դրված խնդիրները իրականացնելու ցանկացած իրավիճակներում։ Այն լիարժեքորեն պահպանոմ է Հայաստանի Հանրապետության եւ Լեռնային Ղարաբաղի Հանրապետության սահմանները», - հայտարարեց Հայաստանի պաշտպանության նախարարը։ Այնուհետեւ, անդրադառնալով Ադրբեջանից հնչող պատերազմական սպառնալիքներին, Սեյան Օհանյանը հավելեց. - «Ինչքան էլ մեր հարեւանները խոսեն սպառազինման, ռազմական ճանապարհով այս կամ այն խնդիրները լուծելու մասին, այնուամենայնիվ, մենք պատրաստ ենք մեր առջեւ դրված խնդիրները իրականացնել, եւ կարծում եմ, որ դրա մասին գիտեն նաեւ մեր հարեւանները, որոնք նման ամպագոռգոռ հայտարարություններ են անում»։