Բազում գյուղի հողատերերը մտահոգված են «անմշակ հողի» հարկով

Շուրջ 300 ծուխ ունի Բազում գյուղը: Ընտանիքների 20 տոկոսը հեռացել են գյուղից, իսկ մնացողները հողագործությամբ չեն գոյատեւում:

«Չեմ մշակում, որովհետեւ մեխանիզացիա չունենք, վարող չունենք», - պատմում է Վլադիսլավ Փլուզյանը։ Ընտանիքը բավարարվում է տնամերձի բերքով ու արտագնա աշխատանքի վաստակով։ Հողատարածքը չեն մշակում, որովհետեւ՝ «հողը իրեն չի արդարացնում»։

Գյուղի սեփականաշնորհված 70 հեկտար հողերի 10 տոկոսն է մշակվում: Գյուղապետ Սրբուհի Հարությունյանը ցույց է տալիս 73 անուն-ազգանվամբ հողատերերի ցուցակը՝ հրաժարվել են հողից: Գյուղապետը համոզված է, որ եթե նոր հարկատեսակների մասին օրինագիծն օրենքի ուժ ստանա, հողից հրաժարվողների թիվը գյուղում կավելանա:

«Մեր հողերը չորրորդ, հինգերորդ կարգի է մեծամասամբ։ Արդյունքը չեն տեսնում։ Բերրի հող չէ։ Պարարտանյութ, բուժանյութը թանկ է, հողաբաժինն էլ քիչ է՝ ամենաշատը ծխին 3 հազար մետր է հասել, իմաստ չունի ծախս անել։ Բնական խոտ է դուրս գալիս, դա էլ անասնակեր են անում, պրծնում», - պատմում է Հարությունյանը։

Լոռիում գյուղատնտեսական նշանակության հողերը կազմում են ավելի քան 192 հեկտար: Սեփականաշնորհված գյուղատնտեսական օգտագործելի հողատեսքերի 32 տոկոսը: Տարբեր պատճառներով տարեկան միջինը շրջանառության մեջ չի դրվում ավելի քան 8 հազար հեկտար հող: