Կուստուրիցան մի օր էլ գուցե Հայաստանի մասին ֆիլմ նկարահանի

«Ես հասկացել եմ, որ մեր նման փոքր ազգերը համը հանողի համբավ ունեն եւ ստիպված են պայքարել իրենց մշակույթով: Հայաստանն ու Սերբիան պատմականորեն նման, դժվար ճակատագիր ունեն, ինչը շատ մոտեցնում է մեզ», - ասում է Էմիր Կուստուրիցան` խոստովանելով, որ շատ ավելի ուրախ է, երբ իրեն ջերմությամբ են ընդունում Հայաստանում, քան, օրինակ, ԱՄՆ-ում: Հանրահայտ ռեժիսորը նաեւ չի հերքում, որ մի օր գուցե իր ֆիլմերում նաեւ Հայաստանը տեղ գտնի:

Երեկ ռեժիսորը առիթ է ունեցել այցելել Սերգեյ Փարաջանովի տուն-թանգարան ու, ինչպես ինքն ասաց, իրենց զգալ «մեկ ուրիշի ստեղծած ֆիլմի մեջ»: - «Փարաջանովը շատ կաեւոր ժառանգություն է թողել ոչ միայն հայերին, այլեւ ողջ աշխարհին, կոնցեպտուալ արվեստի նրա գործերը անգերազանցելի են»:

Կատակասեր ու «խենթ» Կուստուրիցան իր գլխավոր խենթությունը համարում է այն, որ իր բոլոր մտքերը միշտ իրագործում է` ի տարբերություն շատ այլ սերբերի, ովքեր «սիրում են նստել, խոսել ու երազել»: Իսկ իր արվեստի առաքելությունը դժվարանում է բացատրել` կատակելով, թե “այս գործով զբաղվում է, քանի որ ֆուտբոլ չի խաղում»:

Էմիր Կուստուրիցան Երեւանում հանդես կգա իր «The No Smoking Orchestra» խմբի հետ միասին, իսկ համերգի գաղափարն իրականություն է դարձել Սերբիայում հաստատված հայ ջութակահար Խաչատուր Ալմազյանի հետ իր ընկերության եւ մշակույթի նախարարության աջակցության շնորհիվ: