Նախագահի՝ նույն օրը ստորագրած այլ հրամանագրերով Մհեր Շահգելդյանը եւ Գուրգեն Սարգսյանը ազատվել են համապատասխանաբար ՀՀ արտակարգ իրավիճակների եւ ՀՀ տրանսպորտի եւ կապի նախարարների պաշտոններից:
«Օրինաց երկիր» կուսակցությունը կոալիցիոն համաձայնագրով իրեն վերապահված նախարարությունների ղեկավարների փոփոխության մասին որոշումը, ինչպես «Ազատություն» ռադիոկայանին երկուշաբթի օրը ասաց կուսակցության խորհրդարանական խմբակցության ղեկավար Հեղինե Բիշարյանը, կայացրել է շաբաթ օրը՝ քաղխորհրդի նիստում՝ «ելնելով քաղաքական մարտավարությունից եւ ռազմավարությունից»:
Կուսակցության փոխնախագահ Մհեր Շահգելդյանը, ըստ Բիշարյանի, ուժեղացնելու է կուսակցության քաղաքական աշխատանքները, իսկ Գուրգեն Սարգսյանը զբաղվելու է կուսակցության տնտեսական հարցերով:
«Ազատություն» ռադիոկայանի հարցին` արդյո՞ք այդ քայլով կուսակցությունը պատրաստվում է գալիք ընտրություններին, Հեղինե Բիշարյանը դրական պատասխանեց, ավելացնելով, որ իրենք գոհ են նախարարներից, այդ քայլով պարզապես իրականացնում են կուսակցության մարտավարությունը եւ ռազմավարությունը:
ՀՀ տրանսպորտի եւ կապի նորանշանակ նախարար Մանուկ Վարդանյանը:
ՀՀ արտակարգ իրավիճակների նորանշանակ նախարար Արմեն Երիցյանը: Արտակարգ իրավիճակների նախարարի պաշտոնում «Օրինաց երկիր»-ը հանրապետության նախագահին ներկայացրել էր Ոստիկանության պետի տեղակալ Արմեն Երիցյանի, տրանսպորտի եւ կապի նախարարի պաշտոնում` ներկայումս նախագահի խորհրդական Մանուկ Վարդանյանի թեկնածությունները. Երիցյանը եւ Վարդանյանը նախօրեին դարձել են կուսակցության անդամներ:
Ի պատասխան շրջանառվող խոսակցություններին, թե այս փոփոխություններով պարզապես ուժեղացվում է երկրի նախագահի թեւը կառավարությունում՝ Հեղինա Բիշարյանը ասաց, թե երկու թեկնածուներն էլ «Օրինաց երկիր» կուսակցության նախագահ Արթուր Բաղդասարյանի ընկերներն են:
Խորհրդարանում ՀՀԿ-ի խմբակցության ղեկավար Գալուստ Սահակյանը այս կապակցությամբ ասաց. - «Այսպես թե այնպես, իհարկե, կոալիցիոն իշխանություն է, քաղաքական բեռի ծանրությունը հիմնականում մեր ուսերին է, եւ ես այդպես տարբերություն էլ չեմ դնում, թե մեր առաջարկած նախարարն է: Ինձ համար խնդիրն այն է, որ ուշի-ուշով հետեւենք, որ այն ծրագրերը, որ ընդունվել են մեր կողմից, կատարվեն»:
Կոալիցիոն մյուս գործընկերոջ՝ «Բարգավաճ Հայաստան»-ի խորհրդարանական խմբակցության անդամ Նաիրա Զոհրաբյանի համար հասկանալի չէ կատարվող փոփոխությունների շուրջ իրարանցումը:
«Ի վերջո, եթե կուսակցության նախագահը, կուսակցության քաղաքական խորհուրդը նպատակահարմար է գտել կատարել այդ փոփոխությունը, ապա դա իրենց գործն է», - ասաց Զոհրաբյանը: