Հանրապետական խմբակցության ղեկավարը համաձայն չէ Գագիկ Ծառուկյանի գնահատականին
Ազգային ժողովի Հանրապետական խմբակցության ղեկավար Գալուստ Սահակյանը համաձայն չէ էկոնոմիկայի նախարար Ներսես Երիցյանի մասին «Բարգավաճ Հայաստան» կուսակցության նախագահ Գագիկ Ծառուկյանի գնահատականին:
Գալուստ Սահակյան
Երկուշաբթի օրը «Ազատություն» ռադիոկայանի դիտարկմանը, որ էկոնոմիկայի նախարար Ներսես Երիցյանը ասել է, թե երկիրը պատվով դուրս է եկել տնտեսական ճնգաժամից, Գագիկ Ծառուկյանը հակադարձել էր. - «Տեղում չի եղել ու չի տիրապետում ո'չ երկրի էկոնոմիկային, ո'չ էլ երկրի տնտեսական վիճակին»:
Հանրապետական խմբակցության ղեկավարը, սակայն, «Ազատություն» ռադիոկայանին այդ առնչությամբ ասաց. - «Մեզանում նման խնդիր չի քննարկվել, առավել եւս, որ մտածենք, որ Երիցյանը վատ է աշխատում կամ լավ»:
Հարցին` արդյոք Հանրապետական կուսակցությունը կքննարկի՞ Գագիկ Ծառուկյանի հայտարարությունը, Գալուստ Սահակյանը արձագանքեց. - «Ոչ, Գագիկ Ծառուկյանի հայտարարությունը տեսակետ է, եւ ես կասեի նույնիսկ` դա քննարկելու խնդիր չունի էդտեղ: Ինքը այդպես է կարծում, բայց մեր մոտ նման խնդիր դեռեւս չի առաջացել: Եթե առաջանար, [Հանրապետականը] ոչ թե կքննարկեր, այլ հետ կկանչեր իր նախարարին»:
Էկոնոմիկայի նախարար Ներսես Երիցյանը հանրապետական է:
Սահակյանը ընդգծեց նաեւ, որ կառավարության տարեկան հաշվետվության ժամանակ էկոնոմիկայի նախարարի աշխատանքը դրական է գնահատվել:
«Չեմ կարծում, որ պիտի ունենանք այնպես մի կարող, առասպելական նախարար, որ ինքնուրույն ճգնաժամ հաղթահարի: Բայց դե կարծիք է, ես էլ իմ տեսակետն ունեմ տարբեր նախարարների, ես էլ պետական չինովնիկներ եմ տեսնում` ինձ համար ոչ ընդունելի, պարզապես հարմար չեն գտնում ասելու: Խնդիրը էստեղ պետական նորմերով, դրսեւորումներով` դա քաղաքական թիմ է, եւ քաղաքական թիմը իր բաղադրիչների խնդիրը ինքն է լուծում», - հայտարարեց Հանրապետական խմբակցության ղեկավարը:
Գալուստ Սահակյանը դրական է գնահատում նաեւ տնտեսական ճգնաժամը զսպելու եւ ճգնաժամից դուրս գալու ուղղությամբ կառավարության ջանքերը:
«Կարծում եմ, թիմը կարողացել է ե'ւ զսպել ճգնաժամը ընդհանուր առմամբ, ե'ւ քայլեր կատարել ճգնաժամից դուրս գալու համար: Մենք տնտեսական ճգնաժամի պայմաններում ե'ւ աշխատավարձ բարձրացրեցինք, ե'ւ թոշակներ բարձրացրեցինք: 2009 թվի համար, առավել եւս, սոցիալական ծախսերը չնվազեցրեցինք: Առավել եւս, մենք այսօր աշխատում ենք, որպեսզի հնարավորինս կարողանանք գազի թանկացումը այնպես անել, որ ժողովրդի վրա ծանր չնստի: Կարծում եմ, այսօր էլ է քննարկվում կառավարությունում, համապատասխան հասցեագրված փոխհատուցումներ կլինեն», - ասաց Հանրապետական խմբակցության ղեկավարը:
Գագիկ Ծառուկյանի գնահատականներին արձագանքել է նաեւ էկոնոմիկայի նախարար Ներսես Երիցյանը` հայտարարելով. - «Խորհուրդ ենք տալիս, որ Գագիկ Ծառուկյանը գնահատական տա «Բարգավաճ Հայաստան» կուսակցության անդամ նախարարներին եւ նրանց գործունեությանը, իսկ իմ աշխատանքի գնահատականը կտան Հայաստանի Հանրապետության Նախագահն ու վարչապետը»: