Սահմանադրական դատարանը մերժում է Նիկոլ Փաշինյանի դիմումը

Դատարանի որոշման հրապարակմանը ներկա չէին ոչ դիմամատուն, ոչ էլ նրա ներկայացուցիչները:

Թիվ 10 ընտրատարածքային հանձնաժողովի նախագահ Սիլվա Մարկոսյանը որոշումը հրապարակելուց հետո ասաց, որ այն սպասելի էր իրենց համար:

«Հայտնաբերված խախտումները այնպիսին չէին, որ կարողանային որոշումը չեղյալ ճանաչել», - ասաց նա:

Փաշինյանի ներկայացուցիչները, սակայն, շարունակում են պնդել, որ հունվարի 10-ին թիվ 10 ընտրատարածքում Ազգային ժողովի պատգամավորի ընտրություններն անցել են բռնությամբ եւ ուղեկցվել են բազմաթիվ ընտրախախտումներով:

«Մենք ներկայացրեցին 4-5 պարամետրեր, խախտումներ, որոնցից յուրաքանչյուրը՝ որպես առանձին դեպք նայելով, կարելի էր ընտրությունների արդյունքները անվավեր ճանաչել», - «Ազատություն» ռադիոկայանին ասաց ընտրությունների ժամանակ Նիկոլ Փաշինյանի վստահված անձ Պատվական Հովակիմյանը՝ շարունակելով. - «Ինչպես ընտրությունների ընթացքում չապահովվեց Նիկոլ Փաշինյանի մասնակցությունը, այնպես էլ դատարանն ինքը խուսափեց Նիկոլի մասնակցությունն ապահովելուց: Երբ դատարանը չի ապահովում Նիկոլի մասնակցությունը, իր լիազոր ներկայացուցիչը չի կարող գործընթացը շարունակել»:

Հովակիմյանը նաեւ ասաց, որ Հայ ազգային կոնգրեսը ի սկզբանե ենթադրում էր, որ Սահմանադրական դատարանի որոշումը ոչ թե իրավական, այլ քաղաքական է լինելու:

Անցած հունվարի 19-ին ընդհանուր իրավասության դատարանը Նիկոլ Փաշինյանին մեղավոր ճանաչեց 2008 թվականի նախագահական ընտրություններին հետեւած իրադարձությունների ժամանակ զանգվածային անկարգություններ կազմակերպելու մեջ եւ դատապարտեց 7 տարվա ազատազրկման: Մարտին Վերաքննիչ դատարանը անփոփոխ թողեց ընդհանուր իրավասության դատարանի հունվարի 19-ի վճիռը, սակայն որոշեց կիրառել համաներում եւ կիսով չափ կրճատել պատժի չկրած մասը: