Նախկին գյուղապետը հացադուլ է հայտարարել
Վանաձորի քրեակատարողական հիմնարկում հացադուլ է հայտարարել Լոռու մարզի Հաղպատ գյուղի նախկին գյուղապետ Ռուբեն Վարոսյանը:
Հունվարի 29-ից քրեակատարողական հիմնարկում գտնվող Վարոսյանը մեղադրվում է գյուղի համայնքի բյուջեից 3 միլիոն 200 հազար դրամ յուրացնելու մեջ:
«Հացադուլ հայտարարել եմ` պահանջել եմ քննիչին ու դատախազին, որ գան, ու ասեմ, թե ոնց է քննիչը իր աշխատանքը կատարում սխալ ձեւով», - «Ազատություն» ռադիոկայանին հեռախոսով ասաց Ռուբեն Վարոսյանը`պնդելով, որ իրեն անհիմն կերպով են մեղադրում. - «Ոչ մի յուրացում չկա»:
Նա հայտարարեց, որ հացադուլը կշարունակի այնքան ժամանակ, քանի դեռ նախաքննական մարմինը չի կատարել իր եւ իր շահերի պաշտպանի պահանջները:
Վարոսյանը պնդում է, որ իրեն ապօրինի կերպով են պահում անազատության մեջ.- «Վեց ամիս ես եղել եմ այս բերդում, փաստորեն, ոչ մի աշխատանք չի տարվել, մի հատ փորձաքննություն է նշանակել [քննիչը]: Յոթերորդ ամսում մի քանի հոգի` մի տասը անգամ ցուցմունք տված մարդիկ, եկան 11-րդ անգամ նույն ցուցմունքները տվին, որպեսզի քննիչը ասելու բան ունենա»:
Լոռու մարզի գլխավոր դատախազ Կարեն Շահբազյանը «Ազատություն» ռադիոկայանին ասաց, որ նախաքննությունը դեռ շարունակվում է, եւ քրեական գործը դեռեւս չի ուղարկվել դատարան:
«Ես չեմ ստացել այդ գործով պաշտպանական կողմի որեւէ բողոք քննիչի գործողությունների դեմ: Գործը դատարան չի ուղարկվել, որովհետեւ գործի մեջ դատավարական ղեկավարում իրականացնող դատախազի կողմից հայտնաբերվել են թերություններ, մեղադրական եզրակացությունը չի հաստատվել, գործը վերադարձվել է լրացուցիչ քննության», - պարզաբանեց Շահբազյանը:
Նախկին գյուղապետի շահերի պաշտպան Ժորա Վարոսյանը պնդում է, որ մեղադրանքի առաջադրման ժամանակ հաշվի չի առնվել իր պաշտպանյալի անմեղության կանխավարկածը, եւ նա մոտ 7 ամիս գտնվում է անազատության մեջ:
«Քանի որ հանրապետությունում ամբողջ ճակատով պայքար է ընթանում կոռուպցիայի դեմ, այս պարագայում թացը խառնվել է չորի հետ», - «Ազատություն» ռադիոկայանին ասաց փաստաբանը: