«Թրենդ» լրատվական գործակալության փոխանցմամբ` Միլի մեջլիսի պատգամավոր Այդին Միրզազադեն հայտարարել է, թե այդ
փաստաթղթի ստորագրումը բացասաբար կանդրադառնա տարածաշրջանի վրա: Ադրբեջանցի պատգամավորի կանխատեսմամբ` Հայաստանում Ռուսաստանի ռազմական ներկայության ընդլայնմամբ պաշտոնական Երեւանը ավելի պահանջկոտ կդառնա, ինչն էլ, նրա բնորոշմամբ, կարող է սպառնալ տարածաշրջանում կայունությանը:
Ադրբեջանցի մեկ այլ պատգամավոր` Ասիմ Մոլազադեն էլ կարծում է, որ այս փաստաթղթի ստորագրման դեպքում Հայաստանը Ռուսաստանի համար երկարաժամկետ ֆորպոստի դեր կստանձնի: «Հայաստանի զինված ուժերը կօգտվեն ռուսական ռազմաբազայից, ինչի դիմաց Հայաստանը Ռուսաստանին հնարավորություն կտա մասնավորեցնել իր տնտեսության մեծ մասը», - հայտարարել է պատգամավորը:
Վրացի փորձագետներից ոմանք էլ, իրենց հերթին, պնդում են, թե Հայաստանում ռուսական ռազմակայանը սպառնում է ոչ միայն Ադրբեջանին, այլեւ Վրաստանին: «Նովոստի - Գրուզիա» գործակալության հետ զրույցում Կովկասի հարցերով փորձագետ Մամուկա Արեշիձեն հայտարարել է, թե տարածաշրջանում ռուսական ներկայության ընդլայնումը փաստացի «դամոկլյան սուր է` կախված Վրաստանի գլխին, որը կարող է ցանակցած պահի օգտագործվել»:
Նրա կարծիքով` Վրաստանի նկատմամբ ռուսական ագրեսիայի կրկնվելու դեպքում Հայաստանի տարածքից այս անգամ հարվածն անխուսափելի կլինի, քանի որ Ռուսաստանը փոխում է ռազմական կառավարման կառուցվածքը:
«2008 թվականի օգոստոսյան պատերազմի ժամանակ իրավիճակն այլ էր, այժմ շատ բան է փոխվում, եւ եթե Ռուսաստանը փորձի կրկին Վրաստանի դեմ ագրեսիա ծավալել, Հայաստանի համար շատ դժվար է լինելու թույլ չտալ Ռուսաստանին ռազմական նպատակներով իր տարածքն օգտագործել», - կարծում է վրացի փորձագետը:
Ռուսաստանցի վերլուծաբանները, մինչդեռ, շարունակում են պնդել, թե Հայաստանում ռուսական ռազմակայանի տեղակայման ժամկետի երկարաձգումը ձեռնտու է թե' երկու կողմերին, թե' տարածաշրջանում անվտանգության ապահովման համար:
«Ռուսաստանն անվճար պահպանում է Անդրկովկասում հզոր հենակետը, իսկ Հայաստանը ապահովագրվում է Ղարաբաղյան հիմնահարցը ուժային ճանապարհով լուծելու` հարեւանների փորձերից», - «Գազետա»-ի հետ զրույցում կարծիք է հայտնել Մոսկվայի քաղաքական եւ ռազմական հետազոտությունների ինստիտուտի փորձագետ Ալեքսանդր Խրամչիխինը: