Հայկական երշիկի մեջ օգտագործվող հնդկական ցածրորակ գոմեշի միսը՝ կառավարության ուշադրության կենտրոնում
Կառավարությունում ստեղծված աշխատանքային խումբը, օգոստոսի սկզբին այցելելով Հնդկաստան, պարզել էր, որ այդ երկրից Հայաստան է ներմուծվում հակահիգիենիկ պայմաններում արտադրված գոմեշի միս, որն օգտագործվում է տեղական երշիկի արտադրության մեջ։
Հինգշաբթի օրը, անդրադառնալով խնդրին, կառավարությունը հաստատեց Հնդկաստանում գոմեշի միս արտադրող կազմակերպություններին ներկայացվող չափանիշները, որոնց բավարարման դեպքում այդ կազմակերպությունների արտադրանքը կարող է ներմուծվել Հայաստան:
«Ներկայացվող պահանջներն են՝ աշխատանքային փորձը շուրջ 10 տարի, սեփական մսի սպանդանոց ունենալը եւ համապատասխանությունը միջազգային չափանիշներին», - «Ազատություն» ռադիոկայանի հետ զրույցում հաստատված չափանիշները պարզաբանեց Կառավարության աշխատակազմի ղեկավար Դավիթ Սարգսյանը։
Բացի այդ, որոշվեց Հնդկաստանում ունենալ Հայաստանի սննդի անվտանգության գծով ներկայացուցիչ, ով տեղում կվերահսկի Հայաստանի համար նախատեսված գոմեշի մսի որակը։