Ամենայն Հայոց կաթողիկոս Գարեգին երկրորդը չի մասնակցում Մոսկվայի եւ Համայն Ռուսիո պատրիարք Կիրիլի եւ Կովկասի մահմեդականների վարչության նախագահ Շեյխ Ուլ Իսլամ Ալլահշուքյուր Փաշազադեի երեքշաբթի օրվա հանդիպմանը: Այս մասին «Ազատություն» ռադիոկայանին փոխանցեց Մայր Աթոռի տեղեկատվական համակարգի տնօրեն Վահրամ քահանա Մելիքյանը:Հանդիպման ընթացքում, ըստ ադրբեջանական գործակալությունների, Կովկասի մահմեդականների առաջնորդը մտադիր է խնդրել Համայն Ռուսիո պատրիարքին` միջնորդել, որպեսզի հայկական կողմը վերադարձնի Ղարաբաղի եւ Ադրբեջանի զինված ուժերի շփման գծում հունիսի 18-ին զոհված ադրբեջանցի Մուբարիզ Իբրահիմովի դին: Ավելի վաղ` մահմեդականների Ռամազան ամսվա մեկնարկին նվիրված միջոցառման ժամանակ հայտարարելով այս մասին, Փաշազադեն
ասել էր, թե Մոսկվայում կայանալու է եռակողմ հանդիպում, որին մասնակցելու է նաեւ Ամենայն Հայոց կաթողիկոսը:
«Ես ամբողջությամբ հերքում եմ դա: Վեհափառ հայրապետն էջմիածնում է, նման եռակողմ հանդիպման մասին որեւէ պայմանավորվածություն չի եղել», - «Ազատություն» ռադիոկայանին ասաց Վահրամ քահանա Մելիքյանը:
Լեռնային Ղարաբաղի Պաշտպանության բանակի դիրքապահների եւ ադրբեջանական հետախուզական զինված խմբավորման միջեւ հունիսի 18-ին տեղի ունեցած մարտի հետեւանքով հայկական կողմից 4 զինվոր զոհվել, եւս 4-ը վիրավորվել էին: Ադրբեջանական կողմը նահանջել էր` թողնելով Մուբարիզ Իբրահիմովի դին, որին իր երկրում հետմահու հերոսի կոչում է շնորհվել:
Հայկական կողմը բազմիցս է ընդգծել, որ Ադրբեջանը պաշտոնապես չի դիմել Իբրահիմովի դին ստանալու խնդրանքով: