Մատչելիության հղումներ

Պաշտպանության նախարարը զրուցեց զոհված զինվորների մայրերի հետ


Պաշտպանության նախարար Սեյրան Օհանյան
Պաշտպանության նախարար Սեյրան Օհանյան
Պաշտպանության նախարար Սեյրան Օհանյանը հինգշաբթի կրկին հայտարարեց, որ բանակը խիստ վերահսկողության ներքո է, եւ պատասխանատուները անում են հնարավորը` կատարելագործելու զինված ուժերը:

Նախարար Սեյրան Օհանյանը շարունակում է պնդել, որ նախորդ տարիների համեմատ այս տարի զինված ուժերում արձանագրվել են մահվան ավելի քիչ դեպքեր: Այս մասին նա նշեց «Ազատություն» ռադիոկայանի հետ հարցազրույցում:

«Բոլոր դեպքերը, ըստ տարիների վերլուծության, գնում են դեպի նվազում, բայց յուրաքանչյուր մեկ դեպք էլ մեզ համար ողբերգություն է, մեզ համար անընդունելի է», - ասաց նախարարը:

Մահվան վերջին դեպքն արձանագրվել է հոկտեմբերի 29-ին: Բանակում հանկարծամահ էր եղել 19-ամյա Արմեն Մողրովյանը: Նրա մահվան վկայականում նշվում է մահվան հասցնող երկու հանգամանք` սրտի պսակաձեւ անոթների շրջանառության սուր խանգարում եւ չափավոր արտահայտված ընդհանուր աթերոսկլերոզ: 19-ամյա զինվորը թթվածնային անբավարարություն է ունեցել:

Զինվորի հարազատները հայտարարում են, թե բանակ զորակոչվելիս տղան առողջ է եղել: Պաշտպանության նախարարը «Ազատություն» ռադիոկայանի հետ զրույցում հաստատեց այն լուրը, որ բանակում զինվորը վիրահատության է ենթարկվել: Նա չմանրամասնեց, թե ինչ վիրահատություն է եղել դա:

«Ինքը տվյալ պահին եղել է առողջ վիճակում, հանկարծամահ է եղել, ի՞նչ կարող ենք անել, բանակում փոքր վիրահատություն է տարել, որից հետո առողջ վիճակում է եղել», - ասաց Օհանյանը:

Հարցին, թե դա չի նշանակո՞ւմ, որ բանակ են զորակոչվում հիվանդ զինվորները, նախարար Օհանյանը նշեց, որ ինքը խիստ վերահսկում է զորակոչիկների բժշկական ստուգումները:

«Բուժզննում անցնում են առաջին հերթին իրենց մշտական տեղակայման վայրերում` մարզային զինկոմիսարիատներում, հանրապետական բժշկական հանձնաժողովում եւ նաեւ մեր հավաքակայանում գոյություն ունեցող բժշկական հանձնաժողովում: Դա դեռ քիչ չէ, նաեւ վերահսկողություն է իրականացնում մեր կենտրոնական ռազմաբժշկական հանձնաժողովը», - ասաց նախարարը:

Զինվորի մահվան գործով դեռեւս քրեական գործ չի հարուցվել: Նախարարության քննչական ծառայությունից փոխանցեցին, որ գործի հարուցման համար առայժմ նյութեր են նախապատրաստվում:

Իսկ մինչ այդ բանակում մահացած զինվորների ծնողները ամեն հինգշաբթի կառավարության շենքի դիմաց շարունակում են իրենց բողոքի ակցիաները` պահանջելով պատժել իրենց որդիներին մահվան հասցնողների: Նախարարն, անդրադառնալով բանակի շուրջ վերջին շրջանում տեղի ունեցող բողոքի ակցիաներին, դրանց ընթացքում ակտիվ քաղաքացիների կողմից հնչող կոչերին, ասաց, որ իրենք պատրաստ են համագործակցել նրանց հետ, ովքեր առանց հերյուրանքների կաշխատեն: Անուններ չտալով` նախարարը նշեց, որ նրանք ովքեր կփորձեն հերյուրանքներ, վիրավորանքներ տարածել բանակի հասցեին, նրանց հետ կաշխատեն «օրինական դաշտում»` նրանց ենթարկելով պատասխանատվության:

«Բայց երբ լինում են հերյուրանքներ, անձնական վիրավորանքներ, հակաօրինական քայլեր, այդպիսի կազմակերպությունների հետ մենք փորձում ենք աշխատել օրինական դաշտում: Մինչեւ հիմա նման ակցիաներ չեն եղել, բայց քայլեր եղել են առանձին անհատների, հասարակական կազմակերպությունների կողմից: Մի՞թե դուք կարծում եք, թե ես կփորձեմ ինչ-որ հակաօրինական քայլեր կատարել, ո'չ», - ասաց Օհանյանը:

Նախարարը կառավարության նիստից առաջ զրուցեց վերջին տարիներին բանակում մահացած զինծառայողների հարազատների հետ: Մինչ նախարարը հավաստիացնում էր, թե ամեն մի դեպք ուսումնասիրվում է ու արդար քննություն կտարվի, մահացած զինծառայողների ծնողներն իրենց բողոքն էին արտահայտում:

«Պարոն նախարար, ինչքա՞ն դեռ պիտի սպասենք, 10 տարի էլ ե՞ս սպասեմ, որ սպանությունից հետո գոնե այդ ինքնասպանությունը, որ փաթաթում են էրեխուս վզին, հանե՞ն», - հարցնում էր 2010-ին զոհված զինծառայող Վալերի Մուրադյանի մայրը` Նանա Մուրադյանը:

«Քրեական գործ է հարուցված, քրեական գործի շրջանակներում համապատասխան իրավապահ մարմինները աշխատում են», - ասաց նախարարը. - «Իրենց ուզած ձեւով են աշխատում: Ես իմ հույսը Ձեզ վրա էի դրել, ես Ձեզ հավատում էի….ես ուզում եմ, որ դուք դրանք բռնեք, այ սենց ճնշեք, խեղդեք դրանց, որ մեղավորներին բացահայտեն», - ասաց զոհված զինվորի մայրը:

Նախարարը հավաստիացումներից հետո շարժվեց դեպի կառավարության շենք: Իսկ բողոքի տարբեր պաստառներ պահած ծնողներն ու նրանց աջակցող ակտիվ քաղաքացիները, որոնք ձեւավորել են «Բանակն իրականում» նախաձեռնող խումբը, շարունակեցին իրենց բողոքի ակցիան: «Ազատություն» ռադիոկայանի հետ զրույցներում նրանք ասում էին, որ չեն հավատում, որ կառավարությունը կամք կդրսեւորի բացահայտելու բոլոր դեպքերը:

Համաձայն հայ իրավապաշտպանների ներկայացրած տվյալների` այս տարի զինված ուժերում մահացել է 32 զինվոր: Նրանցից միայն 9-ն է մահացել հրադադարի ռեժիմի խախտման հետեւանքով: Մնացածը մահացել են խաղաղ պայմաններում` հիմնականում կանոնագրքային հարաբերությունների խախտման հետեւանքով: Պաշտպանության նախարարությունը դեռեւս թվեր չի հրապարակում:

Ուղիղ հեռարձակում

XS
SM
MD
LG