Մատչելիության հղումներ

Վարդան Սեդրակյանը համոզված է, որ հաղթելու է


Հայաստանի նախագահի ինքնառաջադրված թեկնածու Վարդան Սեդրակյան
Հայաստանի նախագահի ինքնառաջադրված թեկնածու Վարդան Սեդրակյան
Հայաստանի նախագահի ինքնառաջադրված թեկնածու Վարդան Սեդրակյանը, որին առավել հաճախ ներկայացնում են որպես էպոսագետ, վստահ է, որ գալիք նախագահական ընտրությունները չեն կեղծվելու եւ ինքը ստանալու է ընտրողների 81 տոկոսի ձայները:

Սեդրակյանը, հիշեցնենք, 2007 թվականի խորհրդարանական ընտրություններին Եղվարդում առաջադրվել էր մեծամասնական ընտրակարգով եւ հայտնվել էր վերջին տեղում:

Նախագահի թեկնածուն այօր լրագրողների հետ հանդիպմանը հայտարարեց, որ իր նպատակը Սերժ Սարգսյանին իշխանությունից հեռացնելը չէ, եւ գործող նախագահին մրցակից չի համարում, քանի որ վստահ է, որ հաղթելու է:

«Ես եկել եմ, որպեսզի Հայաստանի Հանրապետության երեք նախկին նախագահներին միավորեմ մեկ ընդհանուր գաղափարի շուրջ, միավորեմ բոլոր քաղաքական կուսակցություններին, եւ մենք համատեղ կարողանանք լուծել ազգի եւ պետության առջեւ կանգնած խնդիրները», - հայտարարեց նա` հավելելով, որ նախագահ ընտրվելուց հետո իր գլխավորությամբ ստեղծելու է Հայաստանի չորս նախագահների կառույց, որտեղ նախկին երեք նախագահներին տեսնում է իր խորհրդականների պաշտոններում` թեեւ երկրի վատ վիճակի համար նրանց է մեղավոր համարում:

«Նրանք լինելու են իմ խորհրդականները եւ իրենց քաղաքական, ֆինանսական պոտենցիալով օգնելու են…», - հավելեց Սեդրակյանը` հարցին էլ, թե կցանկանան արդյո՞ք Լեւոն Տեր-Պետրոսյանը, Ռոբերտ Քոչարյանը եւ Սերժ Սարգսյանը դառնալ իր խորհրդականները, արձագանքելով, թե լինում են իրավիճակներ, երբ ցանկությունը հաշվի չի առնվում: Ինքը պատրաստ է միայն հաշվի նստել նախկին նախագահների նախապատվությունների հետ. - «Շատ հարցեր կան հարեւան երկրների հետ, Ռուսաստանի հետ: Նրանք բոլորն ունեն նաեւ քաղաքական մեծ կապեր: Ամեն տեղ պետք է ճիշտ մասնագետի ուղարկել»:

Ընտրվելուց հետո պատրաստվում է անցկացնել Ազգային ժողովի նոր ընտրություններ, օրինական դաշտ բերել օլիգարխներին` բայց առանց նրանց գումարներին դիպչելու. - «Եթե մենք կարողանանք մեր ջանքերի գնով սնանկացնել մեկ օլիգարխի, հավատացեք` այդ ընթացքում 11-ը կհասցնեն Հայաստանից հեռանալ` իրենց գումարներով»:

Վարդան Սեդրակյանի արտաքին քաղաքական ծրագրերը ենթադրում են Հարավային Օսիայի եւ Աբխազիայի անկախության ճանաչումը ու դրանց հետ ռազմաքաղաքական դաշինքի կնքումը` անհրաժեշտության դեպքում դուրս գալով Վրաստանի դեմ, Ջավախքի միացումը Հայաստանին, Ռուսաստանի հետ ամեն գնով` Ադրբեջանի կամ Վրաստանի տարածքով, ցամաքային ճանապարհ հարթելը:

Պաշտոնապես գործազուրկ, բայց էպոսագետ ներկայացող Վարդան Սեդրակյանը նշեց, որ կրթությամբ ճարտարապետ շինարար է, իսկ «Սասնա Ծռեր» էպոսը իր հոբբին է:

Նրա խոսքով, իր հոբբին հետաքրքրել է ռուսներին, պարսիկներին եւ անգամ անգլիացիներին:

Ավելի վաղ «Հայկական ժամանակ»-ի հետ հարցազրույցում Սեդրակյանն ասել էր, թե տարբեր ժողովուրդների էպոսները մեկնաբանելով է ընտրագրավը մուծել, դրանով է տուն պահում, ինքը, կինն ու որդին թանկարժեք մեքենաների տերեր են: Ձմռանն ընտանիքով հանգստացել են Դուբայում:

Բայց դա, պարզվում է, նրա ապրելակերպի մի քանի դրվագներն են միայն: Գործազուրկ Սեդրակյանը այսօր բացահայտեց նաեւ, որ երկու առանձնատուն ունի, ամռանն էլ է ընտանիքով հանգստի մեկնել:Սակայն այս ամենը օլիգարխին հատուկ ապրելակերպ չի համարում:

«2012 թվականի օգոստոսին էլ ընտանիքիս հետ հանգստանում էի Բուլղարիայում` «Զոլոտիյե Պեսկի», Վարնայում: Հիմա ի՞նչ, պետք է անպայման գալ մաշված շորերո՞վ», - ասաց նա:

Հավելենք, որ Սեդրակյանը հանրահավաքներ չի անցկացնելու: Թեեւ ակտիվ ընտրապայքար չի մղելու, բայց կարգախոս ունի` «Վերեւում Աստված կա»:
XS
SM
MD
LG