Մատչելիության հղումներ

«Վրացական մայդանի» մասին շահարկումները՝ «առավելապես ներքաղաքական պայքարի դրսևորումներ»


Վրաստանի ներքին գործերի նախարար Ալեքսանդր Ճիքաիձե, արխիվ
Վրաստանի ներքին գործերի նախարար Ալեքսանդր Ճիքաիձե, արխիվ

Այդուհանդերձ, վրաց վերլուծաբանները չեն բացառում, որ ընդդիմությունը կարող է ակտիվացնել իր գործողությունները:

«Սաակաշվիլիի կողմնակիցները պատրաստվում են ապակայունացնել ներքաղաքական իրավիճակը Վրաստանում»: Շաբաթասկզբին՝ Թբիլիսիում լույս տեսնող «Փրայմ-Թայմ» թերթին տված հացազրույցում նման բացահայտում էր արել Վրաստանի ներքին գործերի նախարար Ալեքսանդր Ճիքաիձեն:

«Մեր տեղեկություններով՝ Ազգային միացյալ շարժման կողմնակիցները ակտիվորեն անվադողեր են գնում: Նրանք նույնիսկ Եվրոմայդանից որոշ ակտիվիստների են հրավիրել Թբիլիսի` հատուկ վարժանքներ անցկացնելու նպատակով: Այդ մարդիկ ցանկանում են ժողովրդին փողոց դուրս բերել և անկարգություններ հրահրել», - հայտարարում էր ներքին գործերի նախարարը:

Վրացական ընդդիմությունը, սակայն, ներկայացվող մեղադրանքը կտրականապես հերքում է:

Նախկին նախագահի մերձավոր զինակիցներից մեկը` պատգամավոր Գեորգի Բարամիձեն հայտարարեց․ - «Նախարարը հանդես է գալիս անլուրջ հայտարարություններով»:

Ազգային միացյալ շարժման խորհրդարանական խմբակցության անդամ Իրմա Նադիրաշվիլին ավելի կտրուկ էր: «Իմ տպավորությամբ՝ նախարարը պարզապես զառանցում է», - հայտարարեց նա:

Կին պատգամավորից հետ չմնաց նաև Ազգային միացյալ շարժման խորհրդարանականներից ևս մեկը` Զուրաբ Ջափարիձեն: «Իմ խորին համոզմամբ, ներքին գործերի նախարարին անհրաժեշտ է հատուկ բժշկական զննության ենթարկել` պարզելու համար՝ արդյոք նա թեթև թմրանյութերի ազդեցության տա՞կ է գտնվում, թե՞ ոչ: Իրականում, Մայդան կազմակերպելու կարիք չկա: Այս իշխանություններն առանց կողմնակի օգնության էլ արագ տեմպով ցած են գլորվում», - հայտարարում էր ընդդիմադիր պատգամավորը:

Վրաստանի վարչապետ Իրակլի Ղարիբաշվիլին իր ենթակա նախարարի բացահայտումներին անդրադարձավ երեկ` արդարադատության նախարարություն կատարած այցի ժամանակ:

«Որևէ մեկը որևէ ձևով չի կարող ապակայունացնել իրավիճակը մեր երկրում: Եթե ինչ-որ մեկն էլ ցանկանա դա անել` խստորեն կպատժվի: Ես կոչ են անում չանհանգստանալ և հավատացնում եմ ձեզ` գործող իշխանությունների օրոք որևէ մեկը ի վիճակի չի լինի ապակայունացնել ներքին իրադրությունը», - ասաց Վրաստանի վարչապետը:

Թբիլիսցի քաղաքագետների կարծիքով էլ՝ «վրացական մայդանի» մասին շահարկումները առավելապես ներքաղաքական պայքարի դրսևորումներ են: Դրա հետ մեկտեղ, այն, որ ընդդիմությունը կարող է ակտիվացնել իր գործողությունները, վերլուծաբանները չեն բացառում:

«Նախկինում էլ վրացական մամուլում նման տեղեկատվություն շրջանառվում էր: Բայց որևէ համոզիչ հերքում Ազգային միացյալ շարժման շարքերից այդպես էլ չհնչեց», - պնդում է թբիլիսցի քաղաքագետ Սոսո Ցիսկարեիշվիլին:

Ուղիղ հեռարձակում

XS
SM
MD
LG