Մատչելիության հղումներ

Վարչապետը դեռ չի հստակեցնում կառավարության կազմում հնարավոր փոփոխությունները


Վարչապետը դեռ չի հստակեցնում կառավարության կազմում հնարավոր փոփոխությունները
please wait

No media source currently available

0:00 0:03:36 0:00
Նորանշանակ վարչապետ Հովիկ Աբրահամյանը առայժմ չի հստակեցնում, թե ինչպիսի փոփոխություններ կլինեն նոր կառավարության կազմում՝ նշելով, որ նախագահը դեռևս շարունակում է բանակցությունները քաղաքական ուժերի հետ:

Սերժ Սարգսյանն այսօր անձամբ ուղեկցեց գործադիրի նոր ղեկավարին կառավարություն. շենքի դիմաց՝ դիմավորողների շարքում, սակայն, չկար նախկին վարչապետ Տիգրան Սարգսյանը:

Շենքում նոր վարչապետին ներկայացնելու արարողությունը տևեց մոտ կես ժամ: Ավարտին Հովիկ Աբրահամյանն իջավ Սերժ Սարգսյանին ճանապարհելու, հենց այդ ժամանակ էլ հաջողվեց նրան մի քանի հարց ուղղել:

«Իրավունք և պարտականություն եմ զգում»,- սրանք էին Աբրահամյանի առաջին բառերը՝ որպես վարչապետ լրագրողների հետ շփվելիս:

«Ես մեր խորհրդարանում ներկայացված բոլոր քաղաքական ուժերի հետ համագործակցելու եմ, քաղաքացիական հասարակության, հասարակական կազմակերպությունների, նաև փորձագիտական խմբերի հետ: Բոլորի կարծիքները լսելու եմ»,- փոխանցեց նորանշանակ վարչապետը:

«Ազատության» հարցին, թե նախատեսո՞ւմ է ոչ իշխանական ուժերից կառավարության անդամներ ունենալ, Աբրահամյանը պատասխանեց․- «Եթե ցանկություն կլինի, հանրապետության նախագահը հիմա բանակցում է Ազգային ժողովում ներկայացված քաղաքական ուժերի հետ, և որոշումները մենք միասին կկայացնենք»:

«Ազատության» հարցին, թե ինչպիսի՞ փոփոխություններ է անձամբ ինքը տեսնում կառավարության կազմում, Աբրահամյանը պատասխանեց՝ բոլոր տեսակի:

Անդրադառնալով տնտեսության բարելավման ուղղված իր ձեռնարկելիք առաջին քայլերին՝ վարչապետը նշեց․- «Առաջին քայլը լինելու է լսել բոլոր քաղաքական ուժերին, մենք միասին պետք է որոշում կայացնենք, ես լինելու եմ շատ թափանցիկ, բաց, հասանելի բոլորի համար»:

«Ամեն ինչ անելու ենք, Տիգրան Սարգսյանը ամեն ինչ արել է, ջանք չի խնայել, և մենք փորձելու ենք շարունակել և ինչ ներուժ որ ունենք, միասին փորձելու ենք այսօրվա մեր խնդիրներին լուծում տալ: Առաջին խնդիրը մեր քաղաքացու արժանավայել ապրելու խնդիրն է»,- Տիգրան Սարգսյանի թողած ժառանգությանն անդրադառնալով հայտարարեց Աբրահամյանը՝ շարունակելով․ - «Ամեն ինչ անելու ենք, և նոր կառավարության հետ, ես համոզված եմ, որ նախագահի սատարմամբ և վստահության պայմաններում մենք նոր, պրոֆեսիոնալ կառավարություն կձևավորենք և փորձելու ենք, այո, այսօր առկա բոլոր խնդիրներին տալ լուծում, դրա համար ժամանակ է պետք և ռեսուրսներ, որը մենք աշխատելու ենք կուտակել, և գնալ առաջ»:

Կիրակի օրը իշխող Հանրապետական կուսակցության խորհրդի նիստում, հանրապետության նախագահ, ՀՀԿ ղեկավար Սերժ Սարգսյանը վարչապետի պաշտոնում առաջադրված Հովիկ Աբրահամյանի կառավարության առաջնահերթությունների թվում նշել էր նաև պարտադիր կենսաթոշակային համակարգի ներդրումը:

Այդ կապակցությամբ վարչապետ Հովիկ Աբրահամյանն այսօր ասաց․ - «Քննարկելու ենք, մենք լսելու ենք բոլորի պրոբլեմները, բոլորի խնդիրները, մտահոգությունները և փորձելու ենք լուծում տալ: Մենք մեր ժողովրդի թշնամին չենք, մենք ամեն ինչ անելու ենք, որպեսզի մեր խնդիրները, որ այսօր առկա են մեր հանրության մեջ, լուծում տանք: Դրա համար ժամանակ է պետք, և նորից եմ ասում, մեծ ֆինանսական ռեսուրսներ»:

Նախագահի մամուլի գրասենյակի հաղորդմամբ՝ կառավարությունում այսօր վարչապետ Հովիկ Աբրահամյանը խնդրել է գործող կառավարության անդամներին մինչ նոր գործադիրի ձևավորումը եռանդով շարունակել իրենց աշխատանքը:

«Մենք որևէ կողմնորոշում որևէ թեկնածուի վերաբերյալ չունենք, և ես պետք է խնդրեմ բոլոր իմ գործընկերներին ավելի մեծ եռանդով շարունակել իրենց պարտականությունների կատարումը: Սահմանադրության սահմանած ժամկետում, պարո՛ն նախագահ, Ձեզ հետ համաձայնեցնելով, կներկայացնենք նոր կառավարության կազմը: Եվ մոտեցումը կլինի կառավարության անդամների այս տարիների ընթացքում կատարած աշխատանքի արդյունքն ու նաև այն, թե որքանով ապագայում ի վիճակի կլինեն իրականացնել նոր ծրագրեր»,- ասել է Աբրահամյանը:
XS
SM
MD
LG