Մատչելիության հղումներ

Ամերիկյան դատարանը մեղավոր է ճանաչել հայկական հանցախմբի երկու ղեկավարներին


ԱՄՆ – Նյու Յորքի հարավային շրջանի դատախազ Պրետ Բհարարան ներկայացնում է հայկական հանցախմբի դեմ մեղադրանքները, արխիվ
ԱՄՆ – Նյու Յորքի հարավային շրջանի դատախազ Պրետ Բհարարան ներկայացնում է հայկական հանցախմբի դեմ մեղադրանքները, արխիվ
Ամերիկայի Միացյալ Նահանգներում ավարտվել է հերթական աղմկոտ դատավարությունը հայկական հանցախմբի երեք անդամների նկատմամբ:

Ըստ ԱՄՆ Արդարադարտության դեպարտամենտի տարածած հաղորդագրության` դատարանը մեղավոր է ճանաչել Armenian Power անվանումը ստացած հանցախմբի երկու ղեկավար անդամների` «Կապոնե» մականվամբ Մհեր Դարբինյանին ր «Ձի» մականվամբ Արման Շարոպետրոսյանին, ինչպես նաև Ռաֆայել Փարսադանյանին` լայնամասշտաբ խարդախության, ռեկետի, բանկային մեքենայությունների համար:

«Կապոնե»-ն` երեսունութամյա Մհեր Դարբինյանը, մեղադրվում է 57 քրեական հոդվածներով` բանկային մեքենայությունների, ծանրացնող հանգամանքներում այլոց անձնական տվյալները գողանալու, նաև դատվածություն ունենալու պայմաններում` ապօրինի զենք պահելու և ռեկետի մեջ: Նրան ընդհանուր առմամբ 973 տարվա ազատազրկում է սպառնում:

Ինչպես նշում է ԱՄՆ արդարադատության նախարարությունը, դատարանում ներկայացված ապացույցների համաձայն Դարբինյանը Armenian Power հանցավոր խմբի պարագլուխն էր: Հանցախումբը, ամերիկյան իրավապահների տեղեկություններով, 250 բացահայտված անդամ և հարյուրավոր աջակիցներ ունի:

Մհեր Դարբինյանը ըստ ամերիկյան իրավապահների` ղեկավարում էր բանկային մեքենայությունների բարդ մեխանիզմները:

Դրանցից մեկով` հանցախմբի անդամներին հաջողվել էր «99 ցենտ» խանութների ցանցի դրամարկղերում հատուկ սարքեր ներդնել, որոնք կարդում էին բանկային քարտերով առևտուր անողների տվյալները, քարտի համարը և գաղտնաբառը փոխանցում հանցավոր խմբի անդամներին: Օգտագործելով այդ տվյալները՝ նրանք հազարավոր մարդկանց հաշիվներից գումար են գողացել: Ամերիկյան դատախազության տվյալներով` միայն այս խարդախությամբ նրանք երկու միլիոն դոլարի են տիրացել:

Այս մեքենայություններին մասնակցելու մեջ է մեղադրվում նաև քսանիննամյա Ռաֆայել Փարսադնայանը: Նրան սպառնում է 30 տարվա ազատազրկում:

Մյուս սխեման բանկային ծառայողներին կաշառելու հաշվին է գործել: Կաշառված աշխատակիցները տրամադրել են իրենց հաճախորդների բանկային տվյալները: Այդ տեղեկություններն օգտագործելով` հանցախմբի անդամները կեղծ բանկային չեկեր են կանխիկացրել, իրենց զոհերի անուններով վարկեր ձևակերպել:

Armenian Power-ը ոչ միայն «փաստաթղթային» խարդախություններով է զբաղվել, այլ նաև ռեկետով` սպառնալիքով գումարներ է հավաքել հայկական համայնքի ներկայացուցիչներից, անգամ փրկագին ստանալու համար մարդկանց առևանգելել:

Ռեկետի և շորթման դրվագներով Դարբինյանի հետ մեղադրվում է երեսունհինգամյա Շարոպետրոսյանը: Նրան սպառնում է 60 տարվա ազատազրկում:

Դարբինյանի և Փարսադանյանի պատժաչափերը դատարանը կորոշի այս տարվա հուլիսին, իսկ Շարոպետրոսյանինը` սեպտեմբերին:

Armenian Power-ի վերաբերյալ աղմկահարույց բացահայտումների մասին ամերիկյան իշխանությունները հայտարարեցին 2011 թվականին. մի քանի տարի տևած գաղտնի գործողության հետևանքով քրեական գործեր հարուցվեցին խմբավորման մոտ 100 անդամների նկատմամբ: 2011-ից ի վեր դատապարտվել է 85 հոգի: Երկուսի դատավարությունը դեռ չի մեկնարկել, երկուսը փախուստի մեջ են, մեկ հոգու նկատմամբ քրեական հետապնդումը կասեցվել է:

Այս երեքի գործով 2011 թվականի փետրվարին հրապարակված մեղադրական եզրակացությունը 212 էջերի վրա էր շարադրված, դատախազության ներկայացրած ապացուցողական բազան բաղկացած էր կես միլիոն փաստաթղթերից: Դրանցից պարզ է դառնում, որ Armenian Power-ը սերտ համագործակցել է մեքսիկական մաֆիայի և Հայաստանի ու Ռուսաստանի օրենքով գողերի հետ:

Ուղիղ հեռարձակում

XS
SM
MD
LG