Մատչելիության հղումներ

Վրացական ապրանքների նկատմամբ մաքսատուրքերը «կարող են բարձրանալ»


Վրացական ապրանքների նկատմամբ մաքսատուրքերը «կարող են բարձրանալ»
please wait

No media source currently available

0:00 0:03:31 0:00

Չի բացառվում նաև, որ հայկական ապրանքների համար Վրաստանում սահմանվեն բարձր մաքսատուրքեր:

Հայաստանում Վրաստանի դեսպանն իր մտահոգությունն է հնչեցնում. Եվրասիական միությանը Հայաստանի անդամակցությունից հետո մեր երկրում վրացական ապրանքների նկատմամբ մաքսատուրքերը կարող են բարձրանալ:

Փորձագետները նշում են՝ դա կարող է հանգեցնել վրացական կողմի պատասխան քայլին, և հայկական ապրանքների համար Վրաստանում կսահմանվեն բարձր մաքսատուրքեր:

«Ազատության» հարցին ի պատասխան՝ դեսպան Թենգիզ Շարմանաշվիլին հայտարարեց, որ առ այսօր Թբիլիսիի համար պարզ չէ, թե վրացական ապրանքների մասով ի՞նչ պահանջ կդնի Եվրասիական միությունը Հայաստանի առջև:

«Չեմ կարծում, թե Ասոցացման համաձայնագրի վավերացումից ու Եվրամիության հետ ազատ առևտրի գոտի ստեղծելուց հետո հայկական ապրանքների նկատմամբ Վրաստանում կբարձրացվեն մաքսատուրքերը: Նման պահանջ նաև Եվրամիությունը չի դնում: Ճի՛շտ հակառակը, մենք ամբողջությամբ չգիտենք, թե ի՞նչ է պահանջելու Մաքսային միությունը Հայաստանից մեր առնչությամբ»,- ասաց Շարմանաշվիլին։

Այս հարցը սրություն ստացավ, երբ հուլիսի 7-ին Ռուսաստանի փոխվարչապետերի հետ խորհրդակցության ժամանակ Ռուսաստանի վարչապետ Դմիտրի Մեդվեդևը պահանջեց անհապաղ միջոցներ ձեռնարկել՝ պաշտպանելու ռուսաստանյան շուկան մոլդովական ապրանքներից:

Մոլդովայի խորհրդարանը հուլիսի 2-ին վավերացրեց հունիսի 27-ին Եվրամիության հետ կնքված Ասոցացման համաձայնագիրը։ Ռուսական կողմի ներկայացմամբ՝ սպառնալիք է առաջացել, որ Մաքսային միության երկրների հետ անմաքս առևտուր անող Մոլդովան, որը Եվրամիության հետ հայտնվելու է ազատ առևտրի գոտում, կարող է իր շուկա ներկրված եվրոպական ապրանքներն առանց մաքսավճարի արտահանել Ռուսաստան:

Սպասվում է, որ առաջիկա շաբաթներին Ասոցացման համաձայնագիրը կվավերացնեն նաև Ուկրաինան ու Վրաստանը, և Մեդվեդևը սպառնաց այդ երկրներին էլ՝ խոստանալով ռուսական շուկան պաշտպանել ուկրաինական ու վրացական ապրանքներից նույնպես:

Սակայն Կրեմլը ակնհայտորեն ցանկանում է խոչընդոտել Ասոցացման համաձայնագրին միացած երկրների ապրանքների մուտքը ողջ Մաքսային միության շուկա:

«Ակնհայտ է, որ սա շատ լուրջ կերպով անդրադառնալու է Մաքսային միության երկրների հետ Մոլդովայի առևտրատնտեսական հարաբերությունների վրա»,- հայտարարել է Մեդվեդևը:

Իսկ Ռուսաստանի առաջին փոխվարչապետ Իգոր Շուվալովը տեղեկացրել է, որ հուլիսի 16-ին կայանալիք Եվրասիական տնտեսական միության խորհրդի նիստում քննարկվելու է Մոլդովայի նկատմամբ «պաշտպանական միջոցների» կիրառումը:

Այսպիսով, կարող է ստեղծվել մի իրավիճակ, երբ Հայաստանում նույնպես բարձր մաքսատուրքեր սահմանվեն վրացական ապրանքների նկատմամբ՝ Եվրասիական միությանը մեր երկրի անդամակցությունից հետո: Դեսպան Շարմանաշվիլին չի բացառում նման հեռանկարը։

«Մեր երկու երկրների միջև դեռ աշխատում է ազատ առևտրի ռեժիմը: Մենք կձգտենք, որպեսզի այդ ռեժիմը չփոխվի: Մեր կողմից, ըստ էության, չի նախատեսվում փոխել այդ ռեժիմը: Իսկ թե ի՞նչ կպահանջի Մաքսային միությունը, ի՞նչ փոփոխություններ կպահանջի, մենք դեռ չգիտենք: Բայց սա Վրաստանի ու Հայաստանի համատեղ շահն է: Ինչ էլ լինի, մենք միշտ կգտնենք մեր շփման համար առավել ընդունելի ճանապարհներ»,- ասաց Հայաստանում Վրաստանի դեսպանը։

Տնտեսագետ Բաբկեն Թունյանի խոսքով՝ վրացական, ինչպես նաև ուկրաինական ու մոլդովական ապրանքների նկատմամբ Հայաստանում մաքսատուրքերի բարձրացումը անխուսափելիորեն կհանգեցնի այդ երկրներում հայկական ապրանքներից գանձվող մաքսատուրքի մեծացմանը:

«Այդ դեպքում Ռուսաստանի վրա այդ ազդեցությունը դժվար թե մեծ լինի, բայց եթե մենք էլ Եվրասիական տնտեսական միությանը անդամակցենք ու այդ կանոնները ընդունենք, Հայաստանի համար դա դժվար է անգամ պատկերացնել, թե ինչ հետևանքներ կունենա»,- ասաց տնտեսական մեկնաբանը։

Թունյանը հավելեց, որ վրացական կողմը կարող է բարձրացնել նաև տարանցման վճարը:

Հայաստանի կառավարությունից այսօր չկարողացանք մեկնաբանություն ստանալ հարցի առնչությամբ:

XS
SM
MD
LG