Մատչելիության հղումներ

Պուտինը ուղերձ է հղել «Նովոռոսիայի աշխարհազորայիններին»


Ռուսաստանի նախագահ Վլադիմիր Պուտինն այս գիշեր դիմել է, ինչպես Կրեմլի պաշտոնական կայքում է նշված՝ «Նովոռոսիայի աշխարհազորայիններին»:

Իր հայտարարությունը Ռուսաստանի նախագահը սկսում է, արձանագրելով, որ Դոնբասի անջատականները մեծ հաջողությունների են հասել Կիևի ուժային գործողությունները կասեցնելու գործում:

Պուտինը նշում է, որ ուկրաինական բանակի զինծառայողները, ոչ իրենց մեղքով, հայտնվել են շրջապատման մեջ և Դոնբասի անջատականներին կոչ է արել մարդասիրական միջանցք բացել, որպեսզի ուկրաինացի զինծառայողները կարողանան հանգիստ դուրս գալ և վերադառնալ իրենց ընտանիքներ:

«Ռուսական կողմը իր հերթին պատրաստ է և ցուցաբերելու է հումանիտար օգնություն Դոնբասի բնակչությանը, որը տառապում է հումանիտար ճգնաժամից», - նաև ասված է ուղերձում:

Ռուսաստանի նախագահը պաշտոնական Կիևին նորից կոչ է արել դադարեցնել ռազմական գործողությունները և բանակցային սեղանի շուրջ նստել Դոնբասի ներկայացուցիչների հետ՝ խաղաղ ճանապարհով կարգավորելու բոլոր կուտակված հարցերը:

Հիշեցնենք՝ ընդամենը երկու օր առաջ Մինսկում կայացել էր Պուտին – Պորոշենկո երկկողմ հանդիպումը, և անմիջապես այդ հանդիպումից հետո իրավիճակը Ուկրաինայում կտրուկ սրվել է:

Ուկրաինայի իշխանությունները Դոնբասի անջատականներին համարում են ահաբեկիչներ:

XS
SM
MD
LG