Մատչելիության հղումներ

Բրիտանացի նախարար. Եվրոպայում ցանկանում են արևելաեվրոպական երկրների հետ հարաբերությունները տեսնել ավելի ամուր


Բրիտանացի նախարար. Եվրոպայում ցանկանում են արևելաեվրոպական երկրների հետ հարաբերությունները տեսնել ավելի ամուր
please wait

No media source currently available

0:00 0:02:11 0:00

Մեծ Բրիտանիայի Եվրոպայի հարցերով նախարար Դեյվիդ Լիդինգթոնի խոսքով, Լոնդոնում և Բրյուսելում չեն ցանկանում, որ Ռուսաստանի հետ վատ հարաբերությունները տարածվեն Եվրասիական միության այլ երկրների վրա:

Տարածաշրջանային այցով Երևանում գտնվող Լիդինգթոնին այսօր առավոտյան ընդունեց արտգործնախարար Էդվարդ Նալբանդյանը: Հանդիպմանը հաջորդեց համատեղ մամուլի ասուլիսը:

«Ազատության» հարցին՝ հնարավո՞ր է, որ Ռուսաստանի հետ լարված հարաբերությունները փոխանցվեն Եվրասիական միության անդամ այլ պետություններին, Դեյվիդ Լիդինգթոնը նախ արձագանքեց՝ ներկայացնելով Մոսկվայի հետ վատ հարաբերությունների պատճառը. - «Ճիշտ է, որ հարաբերությունները Եվրոպայի, Միացյալ Նահանգների ու Ռուսաստանի միջև վատացել են նախորդ ամիսներին, ինչը Ղրիմ ներխուժելու և այն բռնազավթելու Ռուսաստանի որոշման ուղղակի հետևանք է: Ղրիմը միջազգային հանրության և Ռուսաստանի կողմից ճանաչվել էր որպես Ուկրաինայի տարածքի մի մաս: Այնուհետև հարաբերությունների վատացմանը նպաստեց Ռուսաստանի ռազմական ներխուժումը Դոնեցկ ու Լուգանսկ: Վատացող հարաբերություններից հետ կանգնելու ճանապարհը Ռուսաստանի համար այն է, որ Մոսկվան սկսի կյանքի կոչել Մինսկի գագաթնաժողովի համաձայնագրով ստանձնած պարտավորությունները: Այդ պարտավորություներից է ուկրաինական սահմանների վերականգնումը և այդ սահմանների նկատմամբ վերահսկողության հանձնումը Ուկրաինայի իշխանություններին, զինված անջատողականներին աջակցության դադարեցումը»:

Բրիտանացի նախարարն այնուհետև ընդգծեց․ - «Իհարկե, ո'չ: Մենք չենք ցանկանում, որ վերոհիշյալը վատ հարաբերությունների վերաճի Արևելյան Եվրոպայի ու Կենտրոնական Ասիայի երկրների հետ: Ճիշտ հակառակը, մենք՝ Մեծ Բրիտանիայում, ընդհանուր առմամբ Եվրոպայում, ցանկանում ենք այդ հարաբերությունները տեսնել ավելի ամուր: Ակնհայտ է, որ այդ հարաբերությունների բնույթը կախված կլինի առանձին երկրների, կառավարությունների ընտրությունից՝ ուժեղ հարաբերություններ ունենալ Եվրամիության հետ»:

Հոկտեմբերի 10-ին Մինսկում Եվրասիական տնտեսական միությանը Հայաստանի անդամակցության պայմանագրի ստորագրումից հետո Երևանը դարձել է եվրոպացի բարձրաստիճան դիվանագետների այցելության վայր: Ինչպես բացեիբաց նշում էին այդ դիվանագետներից ոմանք, նպատակը պարզելն է, թե հետայսու Եվրամիության հետ պաշտոնական Երևանը ինչպիսի հարաբերություններ է պատկերացնում:

Հոկտեմբերի 21-ին փաստահավաք առաքելությամբ Հայաստանի մայրաքաղաքում էին եվրոպական մի շարք երկրների՝ Արևելյան գործընկերության համար պատասխանատու դեսպանները, երկու օր անց այստեղ էր Գերմանիայի արտգործնախարար Ֆրանկ-Վալտեր Շտայնմայերը, հոկտեմբերի 24-ին Երևան այցելեց Լիտվայի արտաքին քաղաքական գերատեսչության ղեկավար Լինաս Լինկյավիչուսը և այսօր, ինչպես ասացինք, Էդվարդ Նալբանդյանը հյուրընկալեց Մեծ Բրիտանիայի Եվրոպայի հարցերով նախարար Դեյվիդ Լիդինգթոնին:

Դեյվիդ Լիդինգթոնին հիշեցրեցինք, որ այս հոկտեմբերին լրացավ հայ-թուրքական արձանագրությունների ստորագրման հնգամյակը, և որ Անկարան հրաժարվում է վավերացնել դրանք:

«Կարո՞ղ ենք ասել, որ արձանագրությունները այլևս մեռած են». «Ազատության» այս հարցին Լիդինգթոնն արձագանքեց. - «Ինչ վերաբերում է հայ-թուրքական արձանագրություններին, Միացյալ Թագավորության երկարամյա դիրքորոշումն է՝ մենք հավատում ենք, որ արձանագրությունները կյանքի կկոչվեն առանց հետաձգման: Մենք ցանկանում ենք Թուրքիայի ու Հայաստանի միջև հարաբերությունների նորմալացման ականտեսը լինել: Ողջունելի էր, որ արտաքին գործերի նախարար Նալբանդյանը ներկա էր նախագահ Էրդողանի երդմնակալության արարողությանը: Հույս ունեմ, որ այդ երկկողմ հարաբերությունների բարելավման ականատեսը կլինենք»:

Այսօր ավելի ուշ Մեծ Բրիտանիայի Եվրոպայի հարցերով նախարարին ընդունել է Հայաստանի նախագահ Սերժ Սարգսյանը: Նախագահականի հաղորդագրության համաձայն, հանդիպման մասնակիցները քննարկել են, մասնավորապես, հայ - բրիտանական հարաբերությունների օրակարգը, անդրադարձել ԵԱՀԿ-ի Մինսկի խմբի շրջանակներում Լեռնային Ղարաբաղի հիմնախնդրի կարգավորման բանակցային գործընթացի վերջին զարգացումներին ու հեռանկարին՝ այդ համատեքստում քննարկելով վերջերս Ուելսում և Փարիզում կայացած գագաթնաժողովների արդյունքները, խոսել են Եվրասիական տնտեսական միությանը Հայաստանի միանալուց հետո Հայաստան - ԵՄ հարաբերությունների զարգացման հեռանկարների մասին:

Ուղիղ հեռարձակում

XS
SM
MD
LG