Մատչելիության հղումներ

Արևմուտքը և Կիևը դատապարտում են անջատականների «ընտրությունները»


Ուկրաինա - Ընտրական հանձնաժողովն ամփոփում է անջատականների քվեարկության արդյունքները, Դոնեցկ, 2-ը նոյեմբերի, 2014թ.
Ուկրաինա - Ընտրական հանձնաժողովն ամփոփում է անջատականների քվեարկության արդյունքները, Դոնեցկ, 2-ը նոյեմբերի, 2014թ.

Մոսկվան դրանց արդյուքները «հարգում է»։

Անտեսելով Ուկրաինայի իշխանությունների և արևմտյան երկրների հորդորները` Դոնեցկի և Լուգանսկի ռուս անջատականները երեկ իրենց «ժողովրդական հանրապետություններում» ընտրություններ են անցկացրել։

«Ավելի քան մեկ միլիոն մարդ է մասնակցել ընտրություններին»,- ասել է Դոնեցկի «ժողովրդական հանրապետության» ընտրական հանձնաժողովի անդամ Ռոման Լյագինը։ Նա էլ հայտարարել է, որ այսպես կոչված «Դոնեցկի ժողովրդական հանրապետության» ղեկավար է ընտվել Ալեքսանդր Զախարչենկոն։

Վերջինս ասել է, թե ժողովրդի ակտիվությունը վկայում է, որ այդ տարածքի բնակիչները ոչ միայն ի զորու են լավ պատերազմել, այլև պայքարել ապագա երջանիկ կյանքի համար։

Իսկ «Լուգանսկի ժողովրդական հանրապետության» ղեկավար է ընտրվել Իգոր Պլոտնիցկին: Այդ մասին հայտարարել է չճանաչված կազմավորման ընտրական հանձնաժողովը նախագահ Սերգեյ Կոզյակովը։

Ուկրաինայի նախագահ Պետրո Պորոշենկոն երկրի արևելյան շրջանների նոյեմբերի 2-ի քվեարկությունն անվանել է «ֆարս, որը հնարավոր էր իրականացնել միայն բնակիչներին տանկերի և թնդանոթների թիրախում պահելու միջոցով»։

Եվրոպական միության արտաքին քաղաքականության պատասխանատու Ֆեդերիկա Մոգերինին ասել է, որ ռուս անջատականների կազմակերպած այդ ձեռնարկն «ապօրինի է և միայն խոչընդոտում է խաղաղության հաստատման գործընթացը»։ Նրա խոսքերով, Բրյուսելը որևէ պարագայում չի ճանաչի այդ ընտրությունների արդյունքները։

Մինչդեռ, Դոնեցկի «ընտրական հանձնաժողովի» ղեկավարի խոսքերով, Կիևը պետք է վերջապես հաշտվի այն իրողության հետ, որ Դոնբասի շրջանն այլևս Ուկրաինայի մաս չի կազմում։

«Դրա հետ կարելի է չհամաձայնել, բայց վիճարկել հնարավոր չէ, կճանաչեն, թե չեն ճանաչի` դա արդեն Կիևի գործն է, մենք ամեն ինչ ինքներս ենք որոշել», - ասել է Ռոման Լյագինը։

Պաշտոնական Մոսկվան հայտարարել է, որ Դոնբասի քվեարկությունները միանգամայն օրինական են։

«Մենք հարգելու ենք Ուկրաինայի արևելյան շրջանների բնակչության կամարտահայտության արդյունքը», - հայտարարել է Ռուսաստանի արտգործնախարարության պաշտոնյան։

Դոնբասի անջատականները ղեկավարներից բացի ընտրել են նաև տեղական խորհուրդներ։

Գերմանիայի արտգործնախարար Ֆրանկ-Վալտեր Շտայնմայերն ասել է, որ նոյեմբերի 2-ի քվեարկությունները «հակասում են միջազգային միջնորդությամբ սեպտեմբերի 5-ին Մինսկում ձեռք բերված համաձայնությունների ոգուն և տառին»։

«Մենք հաշվի ենք առնելու միայն Ռուսաստանի և նախագահ Վլադիմիր Պուտինի հավաստիացումներն առ այն, որ Ուկրաինայի ամբողջականությունը կասկածի տակ չի դրվի», - գրել է Շտայնմայերն իր թվիթերյան էջում։

Արևմտյան վերլուծաբանների համոզմամբ, նոյեմբերի 2-ի քվեարկությունները միայն խորացնելու են Կիևի և Դոնբասի միջև գոյացած անջրպետը։

«Ֆրանսպրես»-ի փոխանցմամբ, հակաօդային պաշտպանության զենք փոխադրող մոտ քսան բեռնատարներ երեկ երեկոյան հայտնվել են Դոնեցկի մոտակայքում և շարժվել են դեպի քաղաքի օդանավակայան։

«Մենք ռուսներին նախազգուշացնում ենք՝ այդ ապօրինի քվեարկությունները չօգտագործել որպես լրացուցիչ զորք ու զինտեխնիկա Ուկրաինա մտցնելու առիթ», - ասել է ԱՄՆ-ի նախագահի Ազգային անվտանգության խորհրդի խոսնակ Մարք Սթրոհը։

ՆԱՏՕ-ի բարձրաստիճան սպա, Եվրոպայում ամերիկյան զինուժի հրամանատար, գեներալ Ֆիլիպ Բրիդլովը նույնպես ասել է, որ նոյեմբերի 2-ի քվեարկությունները հակասում են սեպտեմբերի 5-ի մինսկյան համաձայնություններին։

Ուկրաինայում այս տարվա ապրիլից սկսված մարտական գործողություններում սպանվել է ավելի քան 4 հազար մարդ։

XS
SM
MD
LG