Մատչելիության հղումներ

«Սա աննախադեպ հարձակում էր»


Լեռնային Ղարաբաղի ռազմաօդային ուժերին պատկանող ուղղաթիռ, արխիվ
Լեռնային Ղարաբաղի ռազմաօդային ուժերին պատկանող ուղղաթիռ, արխիվ

Ղարաբաղի ՌՕՈւ ուղղաթիռի կործանմանը արձագանքում են պաշտոնական Երևանը, ԵԱՀԿ Մինսկի խումբը, ԱՄՆ-ը, ԵՄ-ն, Ամերիկայի Հայ դատի հանձնախումբը, ամերիկացի կոնգրեսականը:

Ղարաբաղա - ադրբեջանական սահմանին արձանագրված արտակարգ միջադեպից ժամեր անց Հայաստանի արտգործնախարարությունը հայտարարություն է տարածել` խստորեն դատապարտելով ուսումնավարժական թռիչք իրականացնող Մի-24 ուղղաթիռի խոցումը ադրբեջանական զինված ուժերի կողմից:

«Հիմնախնդրի կարգավորմանն ուղղված յուրաքանչյուր բարձր մակարդակի հանդիպումից առաջ և հետո Բաքուն նորանոր սադրանքների է գնում` խափանելու համար բանակցային գործընթացը, Հայաստանի և միջազգային հանրության ջանքերն՝ ուղղված հակամարտության բացառապես խաղաղ հանգուցալուծմանը», - պնդում է պաշտոնական Երևանը` հավելելով, - «Ադրբեջանական կողմը կոպտորեն ոտնահարում է վերջին գագաթաժողովներին հիմնախնդրի խաղաղ կարգավորման վերաբերյալ ձեռք բերված պայմանավորվածությունները»։

Կատարվածը որակելով «հանցավոր սադրանք»՝ Հայաստանի ԱԳՆ-ն ընդգծում է․ - «Բաքուն ոչ միայն արհամարհում է ԵԱՀԿ Մինսկի խմբի համանախագահ երկրների, միջազգային հանրության կոչերը ուժի չկիրառման, հրադադարի ամրապնդման, վստահության միջոցների իրականացման մասին, այլև գործում է հակառակ դրանց՝ կրելով իրավիճակի սրման ողջ պատասխանատվությունը»:

Ուղղաթիռը կործանած զինծառայողին շքանշանով պարգևատրած պաշտոնական Բաքուն, մինչդեռ, տեղի ունեցածում մեղադրել է Երևանին: Ադրբեջանի արտգործնախարարությունը պնդում է, թե Հայաստանի ուղղաթիռները ներխուժել են Ադրբեջանի օդային տարածք:

«Հայաստանի ուղղաթիռների ապօրինի ներխուժումը Ադրբեջանի օդային տարածք հանդիսանում է Ադբրեջանի նկատմամբ օկուպացիայի և ագրեսիայի շարունակությունը, ինչպես նաև Ադրբեջանական Հանրապետության տարածքային ամբողջականության և անկախության դեմ ուժի գործադրման քաղաքականության շարունակությունը», - ադրբեջանական Trend.az կայքի փոխանցմամբ` հայտարարել է պաշտոնական Բաքուն:

Ադրբեջանը նաև հայտարարել է, թե ոչ թռիչքային գոտի է հայտարարել «օկուպացված տարածքների օդային տարածությունը և ըստ սահմանված կարգի այդ մասին տեղյակ է պահել Քաղաքացիական ավիացիայի միջազգային կազմակերպության անդամներին»:

Հիշեցնենք, երեկ ավելի վաղ Հայաստանի պաշտպանության նախարարությունը հերքել է ադրբեջանական կողմի պնդումներն այն մասին, որ «հայկական ուղղաթիռները գրոհ են իրականացրել իրենց դիրքերի ուղղությամբ և իրենք պատասխանել են»:

Միջադեպի կապակցությամբ խորը մտահոգություն են հայտնել ԵԱՀԿ-ի Մինսկի խմբի համանախագահները:

«Մենք կոչ ենք անում կողմերին զերծ մնալ քայլերից, որոնք կարող են սրել լարվածությունը շփման գծում և հայ-ադրբեջանական սահմանին: Ամռանը տեղի ունեցած բռնությունների ալիքի կրկնությունը անթույլատրելի է», - հայտարարել են ԵԱՀԿ-ի Մինսկի խմբի ամերիկացի, ռուսաստանցի և ֆրանսիացի համանախագահները նոյեմբերի 12-ին ուշ երեկոյան հրապարակած համատեղ հայտարարությունում:

«Այսօրվա իրադարձությունները հերթական հիշեցումն են այն բանի, թե որքան անկանխատեսելի է Լեռնային Ղարաբաղի հակամարտությունը, և շեշտադրում են հակամարտության երկարատև կարգավորումը գտնելու ուղղությամբ ջանքերն ակտիվացնելու անհետաձգելիությունը», - հայտարարել են համանախագահները:

Միջնորդները զերծ են մնացել տեղի ունեցածի կապակցությամբ կողմերից որևէ մեկին մեղադրելուց, փոխարենը` կոչ անելով Հայաստանի և Ադրբեջանի նախագահներին հարգել ղարաբաղյան հակամարտության խաղաղ հանգուցալուծման հասնելու վերաբերյալ իրենց ստանձնած պարտավորությունները:

«Մենք նաև կոչ ենք անում նախագահներին ձեռնարկել վստահության ամրապնդման այնպիսի միջոցառումներ, որոնք կբարձրացնեն թափանցիկությունը շփման գծում և հայ-ադրբեջանական սահմանագծին, և կնվազեցնեն այսօրվա միջադեպի նման իրադրությունների կրկնության հավանականությունը», - ասված է հայտարարությունում:

Պաշտոնական Վաշինգտոնը մտահոգություն է արտահայտել Ադրբեջանի զինուժի կողմից Լեռնային Ղարաբաղի ռազմաօդային ուժերի ուղղաթիռի խոցման կապակցությամբ:

Միացյալ Նահանգների Պետդեպարտամենտի խոսնակ Ջեն Փսաքին հայտարարել է, որ այս միջադեպը «ևս մեկ հիշեցում է» տարածաշրջանում լարվածությունը նվազեցնելու և հրադադարը հարգելու անհրաժեշտության մասին:

Փսաքին երեկ Վաշինգտոնում լրագրողներին ասել է, որ «հակամարտությանը ռազմական լուծում չի կարող լինել»:

Միջադեպին անդրադարձել է նաև պաշտոնական Բրյուսելը՝ կոչ անելով հետաքննել ուղղաթիռի կործանումը: «Կարևոր է, որ կողմերը զսպվածություն ցուցաբերեն և զերծ մնան գործողություններից ու հայտարարություններից, որոնք կարող են սրել իրավիճակը: Ավելին, կոչ ենք անում հետաքննություն անցկացնել միջադեպի շուրջ», - ասված է Եվրամիության հայտարարությունում:

Հայտարարությամբ Եվրամիությունը վերահաստատել է լիակատար աջակցությունը ԵԱՀԿ-ի Մինսկի խմբին ու երեք համանախագահներին:

«Հակամարտության երկու կողմերն էլ պետք է խստորեն հարգեն հրադադարի ռեժիմը, զերծ մնան ուժի գործադրումից կամ դրա սպառնալիքից և վերականգնեն ջանքերը` ղարաբաղյան խնդրի խաղաղ կարգավորման ուղղությամբ», - ընդգծում է պաշտոնական Բրյուսելը:

Ամերիկայի Հայ դատի հանձնախումբը, իր հերթին, մտահոգություն է հայտնում միջադեպին միջազգային հանրության արձագանքի կապակցությամբ, «Ազատություն» ռադիոկայանի հետ զրույցում ասաց հանձնախմբի խոսնակ Էլիզաբեթ Չուլջյանը՝ նշելով, որ Ադրբեջանի քայլերը նոր թափ են հավաքել, ինչը պետք է համարժեք արձագանքի արժանանա:

«Եվ ուրեմն, Ամերիկայի Հայ դատի հանձնախումբը կոչ է արել, որպեսզի ամերիկահայերը հեռաձայնեն, գրեն կոնգրեսականներին Ադրբեջանի այս քայլի վերաբերյալ: Կարևորը՝ սա աննախադեպ հարձակում էր, որ Ադրբեջանը արել է, և այսպես լռելյայն կամ հավասարակշռված խոսքերով՝ միջազգային կառավարությունների կողմից, բավարար չէ՝ կասեցնելու Ադրբեջանի ռազմատենչ աշխատանքները», - շեշտեց Չուլջյանը:

Ամերիկացի կոնգրեսական Ադամ Շիֆը, ի դեպ, անմիջապես արձագանքել է ամերիկահայության կոչերին՝ հայտարարելով․ - «Անզեն ուղղաթիռի խոցումը ԼՂՀ տարածքի վրա ցույց է տալիս Ադրբեջանի քամահրանքը մարդկային կյանքի նկատմամբ, և իր ներքին խնդիրներից ուշադրությունը շեղելու նպատակով բռնության սադրիչ գործողություններում ներգրավվելու նրա ցանկությունը»:

Ուղիղ հեռարձակում

XS
SM
MD
LG