ՄԱԿ-ի գլխավոր քարտուղար Բան Կի-մունը Ադրբեջանին և Հայաստանին զսպվածության կոչ է արել: ՏԱՍՍ-ի փոխանցմամբ՝ Ղարաբաղում հայկական ռազմական ուղղաթիռը ոչնչացնելու միջադեպից հետո, հինգշաբթի օրը գլխավոր քարտուղարի խոսքերը լրագրողներին փոխանցել է նրա տեղակալ Ֆարհան Հաքը:
Հաքի փոխանցմամբ՝ գլխավոր քարտուղարը կիսում է ԵԱՀԿ-ի Մինսկի խմբի համանախագահների լուրջ մտահոգությունները:
«Գլխավոր քարտուղարը բոլոր կողմերին նաև կոչ է անում խուսափել քայլերից, որոնք կարող են հանգեցնել իրավիճակի հետագա սրմանը, և հանձնառու մնալ հակամարտության խաղաղ կարգավորման համար իրենց պարտավորություններին», - նշել է նա:
Ադրբեջանի արտգործնախարարության մամուլի քարտուղարը այսօր հայտարարել է, թե խփելով հայկական ռազմական ուղղաթիռը՝ Ադրբեջանը համանախագահների դիմաց ստանձնած ոչ մի պարտավորություն չի խախտել:
Հիքմեթ Հաջիևը հիշեցրել է, որ դեռ 2012 թվականին Ադրբեջանի արտաքին գործերի նախարարությունը նամակ է հղել ԵԱՀԿ-ի Մինսկի խմբի համանախագահներին, ուր ասվում էր, որ եթե Հայաստանի ռազմական ցանկացած թռչող սարք խախտի Ադրբեջանի օդային տարածքը, ապա դա կգնահատվի որպես երկրի տարածքային ամբողջականության նկատմամբ ոտնձգություն, և կձեռնարկվեն համապատասխան միջոցներ: