Մատչելիության հղումներ

Վերջ կենդանիների սպանդին. թափառող շների խնդիրը՝ կենդանասերների ուշադրության կենտրոնում


Բողոքի երթ՝ հանուն կենդանիների պաշտպանության
please wait

No media source currently available

0:00 0:03:31 0:00

«Յունիգրաֆ իքս»-ը հայտարարել է, որ այլևս նպատակահարմար չի համարում մասնակցել թափառող կենդանիների վնասազերծման 2015 թվականի մրցույթին։

«Վերջ դնել կենդանիների սպանդին», այսօր այս պահանջով կենդանասերները Երևանի քաղաքապետարանից երթով շարժվեցին դեպի Կառավարության, Ազգային ժողովի շենքեր և նախագահական նստավայր՝ պետական մարմիններին ներկայացնելով իրենց պահանջներն ամփոփող նամակը:

«Մենք պահանջում ենք, որպեսզի բյուջեի գումարները ծախսվեն հետևողականորեն և ճիշտ, լուծարվի «Յունիգրաֆ իքս» ընկերությունը, որը մենաշնորհ ունի այս հարցում, և, ի վերջո, հայտարարվի նոր տենդեր», - հայտարարեցին կենդանասերները։

Նրանք նաև պահանջեցին թափառող շների քանակը վերահսկել քաղաքակիրթ եղանակով՝ ստերջացնելով, այլ ոչ թե սպանելով կենդանիներին։

«Կենդանի շանը վառել, որպեսզի գումար չծախսել հատուկ դեղերին և այլն. դրան դեմ ենք և պայքարելու ենք մինչև վերջ», - «Ազատության» հետ զրույցում ասաց երթի մասնակիցներից մեկը։

«Դինգո» թիմի ներկայացուցիչ Ալինա Ենգոյանի խոսքով՝ թափառող կենդանիների սպանդը չի հանգեցնում նրանց քանակի կրճատմանը, - «Ցանկացած կենդանատեսակի դեմ պայքարը հնարավոր է իրականացնել միայն ստերջացման միջոցով, այսինքն՝ նման պայմաններում ոչ միայն մենք չենք ունենում արդյունք, այլև գնում է դեպի ագրեսիվացում»։

Ալինա Ենգոյանն ասաց, որ տարիներ շարունակ թափառող կենդանիների վնասազերծման մրցույթը շահում է միայն մեկ կազմակերպություն՝ «Յունիգրաֆ իքս»-ը, որը թեև պետական բյուջեից ամեն տարի մոտ 200 միլիոն դրամ է ստանում, սակայն թափառող կենդանիների քանակը մայրաքաղաքում չի փոխվում:

«Այս կազմակերպությունը յուրաքանչյուր տարի ներկայացնում է նույն տվյալները, իսկ հատկացվող գումարները գնալով շատանում են։ Սա ուղղակի պետք է հարկատուները գիտակցեն, որ դա իրենց գրպանից մի ահռելի կլորիկ գումար ամեն տարի գնում է մի խնդրի լուծմանը, որը բացարձակ չի լուծվում», - ասաց Ենգոյանը։

Ժամեր առաջ «Յունիգրաֆ իքս» ընկերությունը պաշտոնական հայտարարություն տարածեց՝ նշելով, որ 8 տարի բարեխղճորեն աշխատելով հանուն երևանցիների անվտանգության և բարեկեցության համար, այլևս նպատակահարմար չի համարում մասնակցել թափառող կենդանիների վնասազերծման 2015 թվականի մրցույթին։ Մրցույթը հայտարարվել է այսօր, իսկ արդյունքները կամփոփվեն 40 օրից։

«Մեր գործունեության, հսկայական ներդրումների, պրոֆեսիոնալ մասնագետների աշխատանքի արդյունքում մայրաքաղաքում էապես նվազել է թափառող կենդանիների քանակը։ Երևանում թափառող կենդանիների թվի առումով երբևէ չի եղել նման բարենպաստ, վերահսկելի իրավիճակ», - ասվում է ընկերության հայտարարությունում. - «Թափառող կենդանիների ոլորտում աշխատանքների տեմպերի նույնիսկ մի քանի օրվա դանդաղեցումը կարող է անկանխատեսելի հետևանքներ ունենալ մայրաքաղաքի համար»։

«Յունիգրաֆ իքս»-ի լրատվության պատասխանատու Լիլիթ Գրիգորյանը «Ազատության» հետ զրույցում հավելեց, որ ընկերությունը լավ է աշխատել և աշխատանքի արդյունքներն «ակնառու են»։

«Երբևէ Երևան քաղաքում չի եղել նման լավ պայմաններ հանրության համար՝ թափառող կենդանիների առումով։ Երբևէ չի եղել այդպիսի կայուն վիճակ։ «Յունիգրաֆ իքս»-ն աշխատել է շատ լավ և իր աշխատանքի արդյունքներն ակնառու են։ Իսկ այն, ինչ-որ տարիների ընթացքում՝ այն թուք ու մուրը մեր հասցեին, որ ուղղել են կենդանասերներ կոչվածները, դրանք ընդամենը ստահոդ լուրեր են, որոնց նպատակները առաջիկայում կերևան», - ասաց Գրիգորյանը։

«Դինգո» թիմի անդամ Ալինա Ենգոյանի խոսքով՝ իրենց համար «Յունիգրաֆ իքս»-ի նման որոշումը սպասելի էր. - «Կարծում եմ՝ սա վարկաբեկված լինելու պատճառն է, այսինքն՝ այս պարագայում, ինձ թվում է, ուրիշ տարբերակ չէր մնում, բայց այստեղ կարևոր է որպեսզի պայմանները փոխվեն, ծրագիրը պետք է փոխվի, նախևառաջ։ Ստերջացման վրա շեշտը պետք է դրվի, անկախ նրանից՝ դա որ կազմակերպությունը կլինի»։

Ուղիղ հեռարձակում

XS
SM
MD
LG