Մատչելիության հղումներ

«Կասկադից Օպերան այլևս չի երևա, եթե Մոսկովյանի շինարարությունն ավարտին հասցվի»


«Կասկադից Օպերան այլևս չի երևա, եթե Մոսկովյան փողոցի շինարարությունը ավարտին հասցվի»
please wait

No media source currently available

0:00 0:03:54 0:00

Ճարտարապետներն ու ակտիվիստները դիմել են ոստիկանություն։

Կասկադից Օպերան այլևս չի երևա, եթե Մոսկովյան փողոցի սրճարաններից մեկում այժմ իրականացվող շինարարությունը ավարտին հասցվի: Այս մասին «Ազատությանը» ահազանգած երգիչ Արթուր Իսպիրյանի մտահոգությունը կիսում են նաև «Նախախորհրդարանի» անդամ Վարդան Հակոբյանն ու ճարտարապետ Սաշուր Քալաշյանը, ովքեր երեկ դիմել են ոստիկանություն:

Շինթույլտվության բացակայության պատճառով ոստիկանները դադարեցրել են աշխատանքները: Այսօր, սակայն, մեր այցելության պահին դրանք վերսկսվել էին:

«Խորը հիմքով ընթացող շինարարությունը թույլ է տալիս ենթադրել, որ տեղում ստորգետնյա պահեստով առնվազն մեկ հարկանի շինություն է կառուցվելու», - ասաց ճարտարապետ Քալաշյանը:

Ներկայանալ չցանկացող անձինք, ովքեր հսկում էին շինարարական աշխատանքները, պնդեցին, որ ընդամենը սալիկներն են նորոգում և շինարարություն չեն իրականացնում։

Շինարարության կադրերն առաջինն իր ֆեյսբուքյան էջում տեղադրած երգիչ Արթուր Իսպիրյանի համոզմամբ՝ հերթական կանաչ տարածքի հաշվին ապօրինի շինություն է կառուցվում:

«Այսպես կոպիտ սխալ Երևան քաղաքում իրականացնելը իհարկե խայտառակություն է։ Նախևառաջ պետք է ամաչի վարձակալողը, երկրորդը՝ քաղաքապետը։ Եթե մենք քնած մնանք, իրենք էլ ինչ կուզեն կանեն, ոնց որ մինչև հիմա արել են։ Ես կոչ եմ անում իմ ընկերներին, որ արթնանան», - «Ազատության» հետ զրույցում ասաց Իսպիրյանը։

Ճարտարապետ Քալաշյանը նշեց, որ այս տարածքը պատկանում է քաղաքապետարանին, և այստեղ շինարարություն իրականացնելու համար անհրաժեշտ էր քաղաքաշինության հանձնաժողովի համաձայնությունը: Ինքն այդ հանձնաժողովի անդամ է, ու վստահ է՝ կառուցապատման իրավունք չեն տվել, նույնիսկ տեղյակ չեն:

«Ես կարծում եմ, որ այս ապօրինությունը հարվածում է առաջին հերթին քաղաքապետարանի հեղինակությանը, որովհետև քաղաքի կենտրոնական կանաչ գոտին է, և իրենք պետք է քաջ գիտենան, որ սա հեղինակազրկման խնդիր է։ Սա ենթադրում է, որ ներքևը հարկ են ավելացնելու, որովհետև այլ կերպ պատճառաբանել այս արմատուրաների առկայությունը հնարավոր չէ», - ասաց Քալաշյանը։

Քաղաքապետարանից ողջ օրվա ընթացքում այդպես էլ չստացանք պարզաբանում, թե տվյալ տարածքը ո՞ւմ և որքա՞ն ժամանակով է հանձնվել վարձակալության և թե ու՞մ նախաձեռնությամբ է այս պահին շինարարություն իրականացվում:

Հիշեցնենք, սակայն, որ «Թրանսփարենսի ինթերնեյշնլ»-ի դիմումի հիման վրա բարձրաստիճան պաշտոնատար անձանց էթիկայի հանձնաժողովն անցած տարի ուսումնասիրել էր «Հայկական ժամանակ»-ի հրապարակումը, որի համաձայն, ֆինանսների նախարար Գագիկ Խաչատրյանին մի շարք ընկերություններից բացի պատկանում է նաև այս սրճարանը:

Ուսումնասիրություններ կատարելուց հետո հանձնաժողովը պարզել էր, որ Խաչատրյանը շահերի բախման մեջ չի եղել, իսկ նշված ընկերություններից միայն երկուսը պատկանում են ոչ թե այն ժամանակ դեռ ՊԵԿ-ի նախագահին, այլ նրա զավակներին: Օպերայի հարակից տարածքում գործող այս սրճարանի մասին սակայն հանձնաժողովը ոչինչ չէր առանձնացրել:

Ուղիղ հեռարձակում

XS
SM
MD
LG