Մատչելիության հղումներ

«Անհեթեթ է» Գյումրիի սպանդի քննությունը ռուսական կողմին հանձնելը


«Անհեթեթ է» Գյումրիի սպանդի քննությունը ռուսական կողմին հանձնելը
please wait

No media source currently available

0:00 0:02:57 0:00

Ռուս գործընկերների հետ մի քանի ժամ շարունակված քննարկումներից հետո Հայաստանի գլխավոր դատախազությունը հայտնեց, որ Գյումրիում տեղի ունեցած սահմռկեցուցիչ հանցագործության քննությունը կիրականցնի ռուսական կողմը՝ փաստարկելով, թե Պերմյակովը Ռուսաստանի քաղաքացի է, և այդ երկրի Սահմանադրության համաձայն չի կարող հանձնվել այլ պետության։

Իրավաբանները Հայաստանի դատախազության այս հաղորդագրությունը անհեթեթ են որակում՝ հղում անելով Հայաստանում ռուսական ռազմակայանի տեղակայման վերաբերյալ կողմերի միջև կնքված պայմանագրին, որի 4-րդ հոդվածը հստակ ամրագրում է՝ Հայաստանի տարածքում հանցանք կատարած, ռուսական բազայում ծառայող անձանց նկատմամբ կիրառվում է Հայաստանի օրենսդրությունը։

«Սա պետք է Հայաստանի օրենսդրությամբ կարգավորվեր և Հայաստանի մարմինների իրավասության ներքո գտնվեր», - «Ազատության» հետ զրույցում ասաց իրավագետ Արմեն Մազմանյանը: Հարցին, թե արդյոք իր ասածը վերաբերում է և՛ նախաքննությանը, և՛ դատավարությանը, նա արձագանքեց․ - «Համենայնդեպս, համաձայնագիրը նման տարբերություն չի դնում: Հասկանալի չէ, թե ինչու կա՛մ մեկը, կա՛մ մյուսը կարող է կատարվել Հայաստանի իրավասությունից դուրս»:

Արմեն Մազմանյանը հարց է ուղղում Հայաստանի դատախազությանը՝ ինչո՞ւ ի սկզբանե գործը հայտնվեց Ռուսաստանի իրավազորության ներքո․ - «Կուզեի տեսնել դատախազության մեկնաբանությունները, որովհետև համաձայնագրի լույսում այս հայտարարությունը ինձ համար առայժմ անհասկանալի է»:

ԱԺ պատգամավոր, նախկին զինդատախազ Գագիկ Ջհանգիրյանը չցանկացավ գնահատական տալ դատախազության հաղորդագրությանը, այդուհանդերձ ասաց՝ հայ-ռուսական համաձայնագրում «ամեն ինչ սևով սպիտակի վրա գրված է». - «Ռազմական բազայի տարածքում կատարված հանցագործությունները ենթական են ռուսական զինվորական իրավապահ մարմինների քննությանը: Բազայի տարածքից դուրս կատարված հանցագործությունները արդեն մեր զինվորական իրավապահ մարմինների քննչական ենթակայության առարկա են: Սպանության հանգամանքները, փաստը, որակումը, քննությունը, պետք է բոլորը կատարեն մեր զինվորական իրավապահ մարմինները»:

Փաստաբան Վահագն Դալլաքյանն անակնկալի է եկել դատախազության հաղորդագրությունից: Նա անհեթեր է որակում հատկապես հիմնավորումը, թե Ռուսաստանի սահմանադրությունն է արգելում հայկական կողմին հանձնել Հայաստանի վեց քաղաքացու սպանության մեջ կասկածվող ռուս զինվորականին․ - «Դատախազությունն ասում է՝ մենք իրավունք ունեինք քննություն անելու, բայց քանի որ Ռուսաստանի սահմանադրությունն ասում է, որ Ռուսաստանը չի կարող հանձնել իր քաղաքացիներին, հետևաբար մենք չենք կարող այդ քննությունը անել: Սա իրավական առումով, իմ կարծիքով, նոնսենս է, որովհետև եթե Հայաստանի Հանրապետությունը ունի ինչ-որ իրավունք, որը սահմանված է միջազգային պայմանագրով, այդ իրավունքը չի կարող դադարեցվել որևէ օտարերկրյա պետության ինչ-որ ներպետական ակտով, թեկուզ դա լինի Սահմանադրությունը»:

Ազգային ժողովի պատգամավոր Զարուհի Փոստանջյանին դատախազության հաղորդագրությունը առանձնապես չի զարմացնում: Իրավական փաստարկների տակ Փոտանջյանը քաղաքական հայտարարություն է տեսնում․ - «Այստեղ ես տեսնում եմ լուրջ քաղաքական նպատակ, որը միտված չէ արդար և թափանցիկ քննություն անցկացնելուն: Եվ այստեղ, ես կարծում եմ, որ խնդիր կա կոծկելու, թե ինչ է իրականում տեղի ունեցել, այս ողբերգության հետևում ինչ է իրականում թաքնված»:

Փաստաբան Փոստանջյանը հիշեցնում է, որ Մարդու իրավունքների եվրոպական կոնվենցիայի համաձայն, պետությունը պարտավոր է կատարել պատշաճ քննություն իր քաղաքացու նկատմամբ կատարված հանցագործության դեպքում։

«Օտարերկրյա զինված ուժերի ներկայացուցիչը ծանր հանցագործություն է կատարել Հայաստանի քաղաքացիների նկատմամբ, սակայն պետությունը չի կատարում միջազգային կոնվենցիայով ստանձնած պարտավորությունը», - եզրակացնում է Փոստանջյանը։

XS
SM
MD
LG