Դավոսի համաշխարհային տնտեսական ֆորումում Պետրո Պորոշենկոն մեղադրեց Մոսկվային Ուկրաինայի տարածք 9 հազար ռուս զինվոր և 500 զրահամեքենա ուղարկելու մեջ։ Ըստ փորձագետ Էնդի Հունդարի, Ռուսաստանի նախագահը զորքեր է ուղարկում Ուկրաինա իր երկրի ներքին տնտեսական խնդիրներից ուշադրությունը շեղելու նպատակով:
Մինչ օրս ուկրաինա - ռուսական կոնֆլիկտի զոհ է դարձել շուրջ 5 հազար մարդ։
Հունդարի կարծիքով Պուտինը շարունակում է արտաքին թշնամիներ փնտրել՝ իր երկրի ներսում գնալով սաստկացող խնդիրները քողարկելու համար, մինչդեռ Ռուսաստանի տնտեսությունը կանգնած է ճգնաժամի եզրին․ ռուսական ռուբլին արժեզրկվում է մասամբ արևմտյան պատժամիջոցների պատճառով։
ԱՄՆ-ի նախագահ Բարաք Օբաման իր ամենամյա ուղերձում հայտնեց, որ արևմտյան պատժամիջոցները բերում են ցանկալի արդյունքների։ Մինչդեռ չորեքշաբթի Ռուսաստանի արտգործնախարար Սերգեյ Լավրովը պնդում էր, որ ռուսական ուժերը չեն պատերազմում Ուկրաինայում և որ Ռուսաստանը մեկուսացման մեջ չէ՝ հավելելով, որ Պուտինը երբեք չի ընտրի ինքնամեկուսացման ուղին։