Մատչելիության հղումներ

Թուրքիայի ընդդիմության առաջնորդը հանդիպել է ոչ մահմեդական կրոնական գործիչներին


Պոլսի Հայոց պատրիարքի տեղապահ Արամ Աթեշյան, արխիվ
Պոլսի Հայոց պատրիարքի տեղապահ Արամ Աթեշյան, արխիվ

Չի բացառվում, որ առաջիկայում Թուրքիայում բնակվող կրոնական փոքրամասնությունների խնդիրները քննարկվեն երկրի խորհրդարանի լիագումար նիստում: Շաբաթասկզբին Թուրքիայի ոչ մահմեդական կրոնական գործիչների, այդ թվում՝ Պոլսի Հայոց պատրիարքի տեղապահ Արամ Աթեշյանի հետ դռնփակ հանդիպման ավարտին նման հայտարարությամբ հանդես եկավ երկրի խոշորագույն ընդդիմադիր՝ Ժողովրդա-հանրապետական կուսակցության առաջնորդ Քեմալ Քըլըչդարօղլուն:

«Հոգևոր առաջնորդների հետ մենք մի շարք հարցեր քննարկեցինք, և կարող եմ ասել, որ ջանք չենք խնայի լուծելու համար այն խնդիրները, որ նրանց իսկապես հուզում են: Ավելին՝ մեր զրույցի ընթացքում նրանց հիշատակած հարցերից մի քանիսը կընդգրկվեն նաև Ազգային մեծ ժողովի օրակարգում», - հայտարարեց Քըլըչդարօղլուն:

Թուրքական մամուլի տեղեկություններով՝ ընդդիմության առաջնորդի հետ հանդիպման ժամանակ կրոնական գործիչները նախևառաջ խոսել են փոքրամասնությունների դեմ օգտագործվող կոշտ հռետորաբանության, լրատվամիջոցներում հաճախ հանդիպող այսպես կոչված «ատելության լեզվի» անթույլատրելիության մասին:

«Ժողովրդա-հանրապետական կուսակցության դավանած սկզբունքն անփոփոխ է` չմիջամտել որևէ մեկի առօրյա կյանքին, որևէ մեկի կրոնական կամ ազգային պատկանելության հարցը չդարձնել քննարկման առարկա: Մեր ցանկությունն է, որպեսզի Թուրքիայի Հանրապետության բոլոր 77 միլիոն քաղաքացիները ապրեն խաղաղ և ներդաշնակ մթնոլորտում», - հայտարարում էր Քըլըչդարօղլուն:

Ի դեպ, նկատելի է, որ Հայոց ցեղասպանության 100-ամյակի շեմին թուրքական քաղաքական շրջանակները առավել ակտիվ շփումների մեջ են մտել երկրի կրոնական փոքրամասնությունների ներկայացուցիչների հետ: Ընդամենը մի քանի շաբաթ առաջ` հունվարի 1-ին, Թուրքիայում բնակվող հայերի, հույների, ասորիների և հրեաների հոգևոր առաջնորդներին ընդունել էր վարչապետ Ահմեթ Դավութօղլուն` հայտարարելով, թե «Թուրքիայի բոլոր քաղաքացիների կրոնական իրավունքները կառավարության համար սրբազան նշանակություն ունեն»:

Ուղիղ հեռարձակում

XS
SM
MD
LG