Մատչելիության հղումներ

7 ընտանիքներ կարող են համալրել «գերակա շահի» զոհերի շարքերը


7 ընտանիքներ կարող են համալրել «գերակա շահի» զոհերի շարքերը
please wait

No media source currently available

0:00 0:04:24 0:00

Երևանի կենտրոնում 70 տարի առաջ կառուցված շենքի բնակիչները երկու շաբաթ առաջ անակնկալ իմացել են, որ իրենց բնակարանների տեղում նոր հյուրանոց է կառուցվելու։

Թումանյան 25 շենքի բնակիչները քաղաքապետարանից գրություն են ստացել, որ շենքը գտնվում է անմխիթար վիճակում, համահունչ չէ շրջակա ճարտարապետական միջավարին, և առավել նպատակահարմար է Թամանյանի օրոք նախագծված շենքը ամրացնելու փոխարեն քանդել, տեղում հյուրանոց կառուցել։

Շենքն ունի 7 բնակարան։ Հարևանները համատեղ ջանքերով մի քանի տարի առաջ են բարեկարգել այն և վստահ են, որ քաղաքապետարանի հիմնավորումը պատրվակ է՝ քաղաքի սրտում գտնվող տարածքը ձեռք գցելու համար:

«Չորս տարի չէին մտածում քանդեն, հիմա նո՞ր են մտածում․․․ Չորս տարի, երբ որ լրիվ ներքևում լրիվ մկներն ու կատուներն էին վխտում, չէին մտածում, հիմա նոր են մտածում», - «Ազատության» հետ զրույցում ասաց բնակիչներից մեկը:

Բնակիչները նշում են, որ շենքը հյուրանոց դարձնելու մասին հունվարի 23-ին են տեղեկացել։

Քաղաքապետարանը, մինչդեռ, այս ընթացքում արագ է գործել։ «Ազատության» հարցմանն ի պատասխան, քաղաքային իշխանությունները նշում են, որ արդեն դիմել են Կառավարություն՝ տարածքը հանրային գերակա շահ ճանաչելու և «Ռենշին» ընկերությանը տրամադրելու համար։ Բնակիչներից Դավիթ Եղիազարյանը փաստում է՝ անմխիթար վիճակում է շենքի միայն առաջին հարկը, որը, ի դեպ, պատկանում է նույն «Ռենշին»-ին ընկերությանը։

Շենքի առաջին հարկում բնակիչներից մեկի ընտանեկան բիզնեսն է։ Գոհար Սիմոնյանի ընտանիքում տարակուսած են․ եթե իրենց վտարեն այստեղից, քանդվելու է նաև նրանց՝ տարիների աշխատանքի արդյունքում կառուցած ու արդեն իր հաճախորդներն ունեցող բարը։

«Մենք մեր տունը ամբողջը կապիտալ նորոգել ենք: Նույնը՝ մեր բարը: Ինքը շատ լավ աշխատում ա, դրանով մի քանի ընտանիք են ապրում: Մենք ընդհանրապես պատրաստ չենք այդ ամեն ինչից հենց այնպես հրաժարվել», - ասաց Գոհարը:

Անակնկալի եկած բնակիչներին փորձում է օգնել Երևանի ավագանու «Բարև Երևան» խմբակցության ղեկավար Անահիտ Բախշյանը։

«Բանավոր խոսել եմ քաղաքապետի հետ: Քաղաքապետը ինձ ասաց, որ մինչև բնակիչների օրինական պահանջների հետ կապված համաձայնություն չլինի, և պայմանագիրը իրենք չստորագրեն, ինքը չի տալու շինթույլտվություն», - «Ազատության» հետ զրույցում ասաց Բախշյանը:

Թումանյան 25-ի բնակիչները, չնայած չեն ուզում թողնել հարազատ բնակարանները, սակայն հույս չունեն, որ կարող են հաղթել պայքարում՝ աչքի առաջ ունենալով Երևանի անցյալի փորձը․ - «Եթե իրենք նորմալ մեզ վերաբերվեն․․․ եթե հարմար գումար տան, ըստ երևույթին, պատրաստ ենք դուրս գալու: Որովհետև անհնար է պայքարելը: Ո՞վ չգիտի, որ այսօրվա դրությամբ, այս ղեկավարության, այս կառավարության դեմ պայքարն անզոր է»:

Որոշումը քննադատեց նաև Ճարտարապետների միության նախագահ Մկրտիչ Մինասյանը։ «Քանի դեռ պատրաստ չէ Երևանի կենտրոնի վերաբերյալ հայեցակարգը՝ կենտրոնին ձեռք տալը սխալ է», - «Ազատությանը» ասաց նա:

Ուղիղ հեռարձակում

XS
SM
MD
LG