Մատչելիության հղումներ

Ռուսաստանցիների 70 տոկոսը համարում է, որ երկրում ճգնաժամ կա. Հարցում


Մոսկվա, արխիվ
Մոսկվա, արխիվ

Ռուսաստանցիների ավելի քան 70 տոկոսը համարում է, որ տնտեսական ճգնաժամ կա, որի հետևանքները զգում են իրենց վրա։ Սա է վկայում «Հանրային կարծիք» հիմնադրամի անցկացրած հարցումները։

Որպես ճգնաժամի առկայության հիմնական փաստարկ՝ քաղաքացիները առաջին հերթին նշում են գների աճը և ինֆլյացիան։Այս երկու գործոնները նշում են հարցվածների ավելի քան 45 տոկոսը։

Հարցվածների 11 տոկոսից ավելին նշում է, որ վատթարացել է կյանքի մակարդակը, աշխատանքի վայրում կրճատումներ են կատարվում, 34 տոկոսի մոտ ընտանեկան ծախսերը ավելացել են։ 15 տոկոսը ասել է, որ ընտանիքի անդամներից մեկը սկսել է ավելի քիչ վաստակել կամ կորցրել է աշխատանքը։

Հարցվածների 15 տոկոսը ասել է, որ աշխատավարձը կամ նվազել է, կամ հետաձգումներով է ստանում։

«Հանրային կարծիք» հիմնադրամի անցկացրած հարցման մասնակիցների միայն 14 տոկոսը Ռուսաստանում ճգնաժամի նշաններ չի տեսել։ Հարցումները անցկացվել են փետրվարի 14-15-ը Ռուսաստանի 100 բնակավայրերում։ Նախորդ հարցման տվյալներով՝ հունվարին ռուսաստանցիների 61 տոկոսն էր ասում, թե երկրում ճգնաժամ կա։

Ռուսաստանի աշխատանքի նախարարության պաշտոնական տվյալներով ընդամենը մեկ շաբաթվա ընթացքում գործազուրկների քանակը երկրում 2 տոկոսով ավելացել է։

Պետդումայի խոսնակ Սերգեյ Նարիշկինը առաջարկել է քննարկել պատգամավորների աշխատավարձերը կրճատելու հարցը։ Նա նշել է, որ տարբեր կազմակերպությունների բյուջետային ծախսերը կրճատվում են, ուստի առաջարկել է քննարկել նաև պատգամավորների աշխատավարձը կրճատելու հնարավորությունը։

Ավելի վաղ «Կոմերսանտ»-ը գրել էր, որ բյուջետային ծախսերը կրճատելու նպատակով կառավարությունը իրավապահ մարմիններին առաջարկել է կամ կրճատել աշխատակիցների աշխատավարձը կամ 10 տոկոսին հանել աշխատանքից։ Հունվարի վերջին Ռուսաստանի կառավարության ընդունած հակաճգնաժամային ծրագրի համաձայն՝ դաշնային բյուջեն հոդվածների մեծ մասով պետք է կրճատվի տասը տոկոսով։ Բացառություն են կազմում երկրի պաշտպանությունը, գյուղատնտեսությունը և սոցիալական ապահովությունը, որոնց բյուջետային ծախսերը չեն կրճատվելու։

Անցած ամիս Ռուսաստանի փոխվարչապետ Իգոր Շուվալովը, ելույթ ունենալով Դավոսի համաշխարհային տնտեսական ֆորումում, ասել էր, թե երկրի տնտեսական իրավիճակը շատ ծանր է։

Ուղիղ հեռարձակում

XS
SM
MD
LG