Մատչելիության հղումներ

Ռուբլու արժեզրկումը բացասաբար է ազդել հայաստանցի արտահանողների վրա


Ռուբլու արժեզրկումն բացասաբար է ազդել հայաստանցի արտահանողների վրա
please wait

No media source currently available

0:00 0:03:49 0:00

Ռուսական ռուբլու արժեզրկումից հետո թանկացումները զսպելու՝ Ռուսաստանի իշխանությունների գործողությունները լուրջ վնաս են հասցրել հայաստանյան արտահանողներին, իսկ ռուսաստանյան շուկայի համար աշխատող հայկական փոքր ու միջին ձեռնարկությունները հայտնվել են սնանկացման եզրին:

Այսօր կայացած քննարկման ժամանակ Գործատուների միության նախագահ Գագիկ Մակարյանն ասաց՝ արտահանողներից շատերը դադարեցրել են Ռուսաստան ապրանքների առաքումը, քանի որ արժեզրկված ռուբլու և գրեթե չփոխված գների պայմաններում ստանում են շատ ավելի քիչ եկամուտ, կամ աշխատում են վնասով:

«Մի շարք պահածո արտադրողներ մինչև հիմա չեն արտահանում, դադարել են: Մի քանիսը հեռատեսորեն նույնիսկ սեպտեմբեր-հոկտեմբերից էին դադարեցրել», - ասաց Գագիկ Մակարյանը:

Գործատուների միության ուսումնասիրության համաձայն, դեկտեմբեր, հունվար, փետրվար ամիսներին մրգեր, բանջարեղեն, գինի, կոնյակ, պահածոներ արտահանող հայաստանյան 20 ընկերություններ կրել են մոտ 8 միլիոն դոլարի վնաս:

Պռոշյանի կոնյակի գործարանի տնօրեն Ավիկ Գասպարյանը ընդգծեց՝ հայաստանյան ընկերությունները, այդ թվում՝ իրենցը, այսօր էլ շարունակում են վնասներ կրել և պարզ չէ՝ գործընթացը երբ կավարտվի:

Գործարարը հավելեց՝ ստեղծված իրավիճակում ակնկալում են, որ պետությունը նախևառաջ ձեռք կմեկնի գյուղացիներին:

«Գյուղացիներին գումարներ տրամադրել, սուբսիդիաներ անել: Ոչ թե անվճար, այլ իրենց աճեցրած բերքի դիմաց միգուցե, որովհետև հաստատ ասեմ, սկսած հունիսից, երբ մթերումները սկսի, շատ վատ է լինելու մթերումների վիճակը, որովհետև կանխիկ շրջանառու միջոցներ չեն լինելու ազատ, որովհետև բոլոր ձեռնարկություններն էլ վարկային պարտավորություններ ունեն, և ազատ շրջանառու միջոցներ չունենալը բերելու է մթերումների խիստ անկմանը, որն ազդելու է գյուղացիների վրա », - ասաց Ավիկ Գասպարյանը:

Քննարկմանը մասնակից այլ գործարարների՝ Շամբի պահածոների գործարանի ներկայացուցիչ Արայիկ Միքայելյանի և «Ալիշան» պահածոների գործարանի տնօրեն Սերժիկ Մովսիսյանի խոսքով, այս ամենի հետևանքով թե՛ ձեռնարկությունների, թե՛ գյուղացիների համար լուրջ խնդիր է դառնալու վարկերի մարումը, որոնք մեծամասամբ դոլարով են:

Էկոնոմիկայի նախարարության առևտրի և շուկայի կարգավորման վարչության պետ Գագիկ Քոչարյանը խոստովանեց՝ իրավիճակը հիշեցնում է 2009 թվականի ճգնաժամը․ - «Երբ մեր տնտեսությունը հանդիպեց դժվարությունների, որոնք եկան արտահանման ոլորտում, ապրանքային շուկաները նվազեցին»:

Պաշտոնյան հայտարարեց՝ Ռուսաստանն իրականացնում է պրոտեկցիոնիզմի քաղաքականություն:

«Ազատության» հարցին՝ արդյոք նման քաղաքականություն իրականացնելով՝ Մոսկվան չի՞ խախտում Եվրասիական տնտեսական միության և Առևտրի համաշխարհային կազմակերպության շրջանակում ստանձնած պարտավորությունները, Գագիկ Քոչարյանն արձագանքեց․ - «Հիմնական սկզբունքը դա հավասար մոտեցումն է տեղական արտադրողին և ներմուծողին: Ասել, որ այստեղ խախտված են որոշակի կանոններ, ես մի քիչ ձեռնպահ կմնամ»:

Ի վերջո, ինչ է պատրաստվում անել կառավարությունը՝ օժանդակելու գործարարներին ու գյուղացիներին:

էկոնոմիկայի նախարարության մեկ այլ ներկայացուցիչ՝ Արդյունաբերության զարգացման վարչության պետ Արմեն Եգանյանը այսպես արձագանքեց․- «Ներկայումս մենք ուսումնասիրում ենք և նաև նախատեսում ենք հենց համատեղ մասնավոր հատվածի հետ փորձենք քննարկումներ անել, որպեսզի հնարավոր լուծումներ գտնենք: առաջիկա օրերին մենք կարծում եմ որոշակի առաջարկություններ կփորձենք ձևավորել, որ ընկերություններին ինչ-որ ձևով մեղմել»:

Ուղիղ հեռարձակում

XS
SM
MD
LG