Ավան վարչական շրջանի Ծարավ Աղբյուր փողոցին հարող հատվածում այսօր կատարվեց «Գազպրոմ Արմենիա» ընկերության կողմից կառուցվելիք բազմաֆունկցիոնալ ուսումնամարզական համալիրի հիմնարկեքը՝ նախագահ Սերժ Սարգսյանի և «Գազպրոմ»-ի ղեկավար Ալեքսեյ Միլլերի մասնակցությամբ։
Միլլերը նշեց, որ համալիրը կառուցվելու է ամենաժամանակակից տեխնոլոգիաներով: Այստեղ կլինեն մանկապարտեզ, դպրոց, լողավազան, բազմաֆունկցիոնալ մարզասրահ, սահադաշտ, հրապարակներ՝ Հայաստանում հայտնի սպորտաձևերի համար․ - «Ցանկանում ենք, որ աճող սերունդը մեծանա, ամուր, դիմացկուն առողջ ու ներդաշնակորեն զարգացած, և այս համալիրը «Գազպրոմ Արմենիա»-ի ավանդն է Հայաստանի ապագայի համար»։
Հիշեցնենք, կառուցվելիք համալիրի հողատարածքը օրեր առաջ Երևանի քաղաքապետարանը քառակուսի մետրը քսան դոլարով վաճառեց «Գազպրոմ Արմենիա»-ին. 300 միլիոն դրամի դիմաց ընկերությունը ստացավ 32 հազար քառակուսի մետր տարածք։
Երևանի քաղաքապետ Տարոն Մարգարյանը դժվարացավ պատասխանել «Ազատության» հարցին՝ դպրոցն ու մանկապարտեզը վճարովի՞ են լինելու, թե՞ ոչ․ - «Իրենց սեփականությունն է լինելու, և նրանք պետք է պատասխանեն, բայց համոզված եմ, որ այն հնարավորությունները տալու են մեր թաղամասի բնակիչներին, որ հանգիստ կարողանան այցելել»:
Իսկ հարցին, թե կարող է արդյոք ցանկացած քաղաքացի քսան դոլարով հողատարածք գնել Ծարավ Աղբյուր փողոցին հարող հատվածում, քաղաքապետը պատասխանեց․ - «Եթե մեծ ներդրումային ծրագրեր իրականացնեն, անպայման կարող են»:
Հիմնարկեքի ընթացքում սոցիալական ծրագրի շրջանակում կառուցված հարակից բազմաբնակարան շենքի մի քանի պատշգամբներին փակցվել էին «Վաճառվում է» գրությամբ պաստառներ։ Բնակիչները բողոքում էին, որ համալիրը կառուցվում է երեխաների համար խոստացված խաղահրապարակի ու պուրակի հաշվին։
«Քանի որ այս շենքը հանձնվել է նախատեսված ժամանակից մոտ մեկուկես տարի ուշացումով, պետք է փոխհատուցեին: Նրանք մեզ նախևառաջ խոստացան փոխարենը խաղահրապարակ, հետո պաշտոնապես հայտարարություն արվեց, որ այդտեղ լինելու են մեր երեխաների համար, ամբողջ համայնքի համար հայկական դպրոց, մանկապարտեզ, մեծ պուրակ և այլն, ինչը այսօրվա դրությամբ, ստացվում է, որ սուտ խոստում էր», - ասաց բնակիչներից մի կին:
«Ես էլ եմ փակցրել, որ վաճառում եմ բնակարանը», - ասաց մեկ այլ բնակիչ: - «Քանի որ բնակարանը ստանալիս մեզ խոստացել էին, որ այստեղ կլինի սիրուն խաղահրապարակ երեխաների համար, բայց հիմա Գազպրոմի շենքերը կփակեն և՛ արևի լույսը, և՛ չի լինի հրապարակը»:
Քաղաքապետ Տարոն Մարգարյանը, սակայն, վստահեցնում է, որ այգին անպայման կառուցվելու է․ - «Թող այդ մտահոգությունը չլինի: Այն, ինչը խոստացվել է Երևանի քաղաքապետարանի կողմից, ամբողջությամբ, նախագծով հանձնվելու է մեր բնակիչներին»:
