Մատչելիության հղումներ

Լևոն Զուրաբյանը ԵԽԽՎ-ում ներկայացրել է քաղաքական հետապնդումները


Լևոն Զուրաբյանը ԵԽԽՎ-ում ներկայացրել է քաղաքական հետապնդումները
please wait

No media source currently available

0:00 0:03:36 0:00

Հայ ազգային կոնգրես խմբակցության ղեկավար Լևոն Զուրաբյանն Եվրոպայի խորհրդի խորհրդարանական վեհաժողովի (ԵԽԽՎ) նիստում ունեցած իր ելույթում այսօր նշեց, որ Եվրոպայի խորհրդի որոշ երկրներում իրավիճակն լուրջ մտահոգությունների տեղիք է տալիս՝ ժողովրդավարական արժեքների հանձնառության կապակցությամբ:

«Հայաստանում ընտրությունները կեղծվում են՝ անհնար դարձնելով իշխանությունն ընտրությունների միջոցով փոխելը»,- դժգոհեց Լևոն Զուրաբյանը:

Նա նաև հայտարարեց, որ անցյալ տարվա հոկտեմբերից ակնհայտորեն իշխանությունների հետ կապ ունեցող հանցագործ խմբավորումները տասնյակ ընդդիմադիրների նկատմամբ հարձակումներ են իրականացրել, 5 ընդդիմադիր կալանավորվել է զանգվածային անկարգություններ կազմակերպելու մեղադրանքով:

Լևոն Զուրաբյանը ներկայացրեց Գագիկ Ծառուկյանի հրաժարականի պատմությունը: Հայտարարեց, որ ընդդիմադիր կուսակցության ղեկավարն այդ քայլին դիմեց Սերժ Սարգսյանի հայտնի զգուշացումներից հետո: «Հետապնդումը սկսվեց, երբ 3 կուսակցությունների դաշինքն ընդդիմանում էր Սերժ Սարգսյանի նախաձեռնած Սահմանադրության փոփոխություններին առաջարկին»,- հայտարարեց Զուրաբյանը՝ պնդելով, որ սահմանադրական փոփոխության նպատակը այն է, որ Սերժ Սարգսյանը մնա իշխանության ղեկին:

«Ադրբեջանում իրավիճակն ավելի վատ է»,- ԵԽԽՎ նիստի ժամանակ ասաց Լևոն Զուրաբյանը և վկայակոչեց ընտրախախտումները, Ալիևի վարչակազմի ժամկետները երկարաձգելու սահմանադրական փոփոխությունների «հնարքները», տասնյակ լրագրողների, իրավապաշտպանների բանտարկության հանգամանքը:

Զուրաբյանը Վեհաժողովի ուշադրությունը հրավիրեց նաև հանգամանքին, որ Թուրքիայում լրագրողների նկատմամբ տեղի են ունենում հետապնդումներ, Ռուսաստանում՝ Բորիս Նեմցովի սպանությունը, Ուկրաինայում՝ Օլեգ Կալաշնիկովի և Օլես Բուզինայի սպանությունները: Այս ամենն, ըստ Լևոն Զուրաբյանի, մտահոգություն է առաջացնում Եվրոպայի խորհրդի անդամ երկրներում ընդդիմադիրների անվտանգության կապակցությամբ:

Ըստ Լևոն Զուրաբյանի՝ Վեհաժողովը և մշտադիտարկման հանձնաժողովը պետք է հիմնավոր գնահատական տան անդամ երկրներում տեղի ունեցող գործընթացներին և գործադրեն բոլոր ջանքերը՝ ընդդիմադիրներին պաշտպանելու համար:

«Այլապես, կարծես, երբեմն մոռանում ենք՝ ինչու ենք հավաքվել այստեղ՝ Ստրասբուրգում»,- իր ելույթն այսպես եզրափակեց ՀԱԿ խմբակցության ղեկավարը:

Ուղիղ հեռարձակում

XS
SM
MD
LG