Մատչելիության հղումներ

Ստամբուլում հիշում են Հայոց ցեղասպանության զոհերին


Պոլսո Հայոց պատրիարքի փոխանորդ Արամ Աթեշյան, արխիվ
Պոլսո Հայոց պատրիարքի փոխանորդ Արամ Աթեշյան, արխիվ

Պոլսո Հայոց պատրիարքարանում պատարագ կմատուցվի, որին կմասնակցեն նաև թուրք պաշտոնյաներ:

Այսօր, չնայած Թուրքիան նշում է Գալիպոլիի հաղթանակի 100-ամյակը, այնուամենայնիվ, Թուրքիայի կառավարության ներկայացուցիչը ներկա է գտնվելու ապրիլի 24-ի առիթով Հայոց պատրիարքարանում կայանալիք կրոնական արարողությանը: Պատարագին ներկա լինելու նաև Եվրամիության հարցերով նախարար Վոլքան Բոզքիրը: Այս մասին հաղորդում է Hyurriet Daily News-ը:

Պոլսո Հայոց պատրիարքի փոխանորդ Արամ Աթեշյանը ավելի վաղ՝ ապրիլի 21-ին ասել էր, թե պատարագը մատուցվելու է Օսմանյան հայերի և այդ ժամանակաշրջանի բոլոր զոհերի հիշատակին:

«Մեր ցավն ընդհանուր է», - հայտարարել էր Թուրքիայի հայկական եկեղեցու առաջնորդը:

Պատարագից բացի այսօր «Թաքսիմ» հրապարակում Հայոց ցեղասպանության զոհերի հիշատակի արարողություն են անցկացնելու իրավապաշտպան կազմակերպությունների, ինչպես նաև՝ հասարակական, ոչ կառավարական կազմակերպությունների ներկայացուցիչները: Մոմավառությունից բացի, այս տարի նախատեսվում է նաև ծառ տնկել:

1915 թվականին սպանված հայ մտավորականներին համերգ է անցկացվել չորեքշաբթի երեկոյան: Ստամբուլի համագումարների կենտրոնում անցկացված այդ համերգին մասնակցել են հայ և թուրք երաժիշտներ, համերգի ընթացքում ընթերցվել են զոհված մտավորականների անունները:

Նախկինում Թուրքիայում Հայոց ցեղասպանության մասին բաց քննարկումներ, հիշատակի արարողություններ, հավաքներ կազմակերպելը անհնարին էր: Հրապարակային միջոցառումներից, քննարկումներից բացի, թուրք պաշտոնյաները նաև նշում են, որ վերջին տարիներին անցկացված բարեփոխումներից հայկական համայնքը նաև նյութապես է օգտվել:

Թուրքիայի վարչապետի հանրային դիվանագիտության գրասենյակը, որը հիմնականում աշխատում է ոչ կառավարական կազմակերպությունների հետ, հաղորդում է, որ 2002-ից սկսած՝ 284 անշարժ գույք է վերադարձվել հայ համայնքին: Այդ ժամանակաշրջանում հիմնադրամի կարգավիճակով Ստամբուլում գրանցվել են հայկական կաթոլիկ եկեղեցին և Սուրբ Խաչ հայկական ավագ դպրոցը:

Մշակույթի նախարարության պատմամշակութային ժառանգության և թանգարանների վարչության տվյալներով, Թուրքիայում վերանորոգվել է 26 եկեղեցի, որոնցից 11-ը հայկական: Եվս 23 եկեղեցիների վերանորոգման աշխատանքները ընթացքի մեջ են:

Ուղիղ հեռարձակում

XS
SM
MD
LG