Մատչելիության հղումներ

«Թեկուզ Արցախի զիջմամբ պատրաստ են իրենց ռեժիմը երկարաձգել»․ Սեֆիլյան


Ժիրայր Սեֆիլյանը «Ազատության» տաղավարում, արխիվ
Ժիրայր Սեֆիլյանը «Ազատության» տաղավարում, արխիվ

Իշխանություններն էլ ուրիշ բան չունեն հանձնելու օտարին, իր համոզմունքը փաստարկում է Ղարաբաղյան պատերազմի վետերանը:

«100-ամյակը առանց ռեժիմի» շարժման առաջնորդ, ազատամարտիկ, Շուշիի առանձնակի գումարտակի հրամանատար Ժիրայր Սեֆիլյանի կարծիքով, արդեն երկար տարիներ է, ինչ Շուշին, ինչպես նաև ողջ Լեռնային Ղարաբաղն ու Հայաստանը վտանգված են: Այսօր՝ մայիսի 8-ին, որը Լեռնային Ղարաբաղում և Հայաստանում նշվում է որպես Շուշիի ազատագրման օր, «Ազատության» հետ զրույցում Սեֆիլյանն ասաց, որ Հայաստանում պետք է ձևավորել կառավարման այնպիսի համակարգ, որը վերացնի այդ վտանգը:

«Այսինքն, բոլորի համար պարզ է, որ այսօր Հայաստանը, ներառյալ՝ Արցախը հայաթափվում է: Եթե հայաթափվում է, ապա ոչ Արցախի պաշտպանությունը, ոչ էլ Հայաստանի պաշտպանությունը երաշխավորված չեն: Ուստի պահը շատ լուրջ է, եթե չենք ուզում կրկնվի պատմությունը, նկատի ունեմ՝ 1920 թիվ, Կարսի հանձնում, ապա վերջապես հայությունը, Հայաստանի ապագայով մտահոգ մարդիկ պետք է ակտիվանան և տեր կանգնեն մեր երկրին», - ասաց ազատամարտիկը:

Անդրադառնալով ղարաբաղյան բանակցությունների հարցին՝ Ժիրայր Սեֆիլյանը համոզմունք հայտնեց, որ թեկուզ Լեռնային Ղարաբաղի զիջմամբ Հայաստանի այսօրվա իշխանությունները պատրաստ են իրենց ռեժիմը երկարաձգել:

«Երբ այս ռեժիմը պատրաստ է ամեն ինչ անելու՝ իր կյանքը երկարաձգելու համար, որի ականատեսն ենք լինում ներքաղաքական և տնտեսական իմաստներով այս օրերին, ուստի թող ոչ ոք չկասկածի, որ նրանք թեկուզ Արցախի զիջմամբ, թեկուզ մասամբ զիջմամբ, նրանք պատրաստ են իրենց ռեժիմը երկարաձգել: Ուզում եմ ասել, քանի որ այս համակարգը կանգնած է սնանկացման եզրին, այս իմաստով ևս ես շատ մեծ վտանգ եմ տեսնում, այսինքն՝ նրանք էլ ուրիշ բան չունեն հանձնելու օտարին, մնացել է Արցախը», - ընդգծեց Սեֆիլյանը:

Պատերազմի վերսկսման վտանգի առնչությամբ էլ նա ասաց․ - «Նեղ իմաստով ես չեմ տեսնում, բայց քանի որ մեծ Միջին Արևելքով մեկ բլթբլթոցային իրավիճակ է, բավական վտանգավոր օրեր ես տեսնում եմ, սակայն դա չի նշանակում, որ այդ պատերազմի նախաձեռնողը կարող է լինել Ադրբեջանը: Ես ավելի շատ աշխարհաքաղաքական վտանգների մասին եմ խոսում, որի արտացոլանքը կարող է լինի Ադրբեջանի կողմից պատերազմը: Այսինքն՝ հավասարը հավասարի Ադրբեջանը այսօր չունի ոչ քաղաքական կամքը, ոչ ունակությունը, ոչ էլ համապատասխան ռեսուրսը մեզ ծունկի բերելու»:

Ուղիղ հեռարձակում

XS
SM
MD
LG