Մատչելիության հղումներ

Վրացիները կարևորում են սոցիալական խնդիրները, հետո միայն տարածքային ամբողջականությունը


Վրացի երիտասարդներ, Թբիլիսի, արխիվ
Վրացի երիտասարդներ, Թբիլիսի, արխիվ

Վրաստանում անցկացված վերջին հարցումները վկայում են, որ այդ երկրի քաղաքացիների համար առաջնային կարևորություն ունեն սոցիալական խնդիրները, իսկ արտաքին քաղաքականության առումով գերադասում են Եվրոպան:

Ըստ Ժողովրդավարության ազգային ինստիտուտի (NDI) հարցումների, վրացիների 68 տոկոսը կողմ է Եվրամիության հետ ինտեգրմանը, դեմ է 16 տոկոսը:

Հարցումները ցույց են տալիս, որ վրացիների մեծամասնությունը անվտանգության առումով գերադասում է ՆԱՏՕ-ն: «Գրուզիա օնլայն»-ի փոխանցմամբ՝ հարցվածների 65 տոկոսը պաշտպանում է ՆԱՏՕ-ին անդամակցելու՝ Վրաստանի կառավարության դիրքորոշումը, դեմ է 20 տոկոսը:

Ինչ վերաբերում է Մոսկվայի գլխավորած Եվրասիական տնտեսական միությանը, ապա հարցվածների մեծամասնությունը՝ 41 տոկոսը դեմ է ԵՏՄ-ին անդամակցելուն, կողմ է մոտ 31 տոկոսը:

Ժողովրդավարության ազգային ինստիտուտը փորձել է ճշտել նաև Վրաստանի քաղաքացիների կարծիքները ներքաղաքական ու սոցիալ-տնտեսական իրավիճակի վերաբերյալ: Ավելի քան երեք անգամ ավելացել է այն քաղաքացիների թիվը, որոնց պնդմամբ՝ 2012 թվականի խորհրդարանական ընտրություններից հետո, այսինքն Բիձինա Իվանիշվիլիի քաղաքական ուժի՝ իշխանության գալուց հետո իրենց ընտանիքների սոցիալական վիճակը վատթարացել է: Նման կարծիք է հայտնել հարցվածների 34 տոկոսը, 2013-ին այս կարծիքին էր 10 տոկոսը:

Հարցվածների 11 տոկոսն ասել է, որ 2012 ընտրություններից հետո ավելի լավ են ապրում, իսկ 55 տոկոսի մոտ փոփոխություն չկա:

Ներքին խնդիրների շուրջ հարցերը կենտրոնանում են Իվանիշվիլիի հաղթանակից հետո Վրաստանում ստեղծված իրավիճակի վրա: Այսպես՝ աշխատատեղերի հետ կապված կարծիքները գրեթե հավասար են, 46 տոկոսն ասել է, որ 2012 խորհրդարանական ընտրություններից հետո իրավիճակը վատթարացել է, իսկ 47 տոկոսի կարծիքով՝ իրավիճակը չի փոխվել, միայն 4 տոկոսի կարծիքով են աշխատատեղերն ավելացել:

Հարցվածների 23 տոկոսը կարծում է, որ երկիրը զարգանում է ճիշտ ուղղությամբ, բացասական գնահատականը ավելի շատ է: 37 տոկոսի կարծիքով Վրաստանը սխալ ուղղությամբ է զարգանում, իսկ 31 տոկոսը կարծում է, որ երկրի սխալ զարգացման ուղղությունը չի փոխվել:

Վրացիների գերակշիռ մասի՝ 66 տոկոսի կարծիքով՝ ազգային ամենահիմնական խնդիրը աշխատանքն է: 43 տոկոսը հիմնական խնդիր են համարել ինֆլյացիան, աղքատությունը որպես հիմնական խնդիր նշել է 39 տոկոսը, իսկ Վրաստանի տարածքային ամբողջականությունը հիմնական հարցերի շարքում չորրորդն է, այս տեսակետին է հարցվածների 27 տոկոսը:

Վրացիները բոլորովին կարևոր չեն համարել փոքրամասնությունների իրավունքներն ու մամուլի ազատությունը, համենայնդեպս, այս երկու խնդրի շուրջ հարցման արդյունքը զրո է:

Ուղիղ հեռարձակում

XS
SM
MD
LG