Մատչելիության հղումներ

Ոստիկանություն․ Տեսագրությունն ու տեքստը բավարար չեն քրեական գործ հարուցելու համար


Ոստիկանություն․ Տեսագրությունն ու տեքստը բավարար չեն քրեական գործ հարուցելու համար
please wait

No media source currently available

0:00 0:03:10 0:00

Հիմնադիր խորհրդարանը հայտարարում է, որ Ոստիկանությունն ու Ազգային անվտանգության ծառայությունը հետապնդում են իրենց առաջնորդ Ժիրայր Սեֆիլյանին ու «100-ամյակն առանց ռեժիմի» շարժման մյուս անդամներին։

Իշխանափոխություն նախաձեռնած Հիմնադիր խորհրդարանը հայտարարում է, որ Ոստիկանությունն ու Ազգային անվտանգության ծառայությունը հետապնդում են իրենց առաջնորդ Ժիրայր Սեֆիլյանին ու «100-ամյակն առանց ռեժիմի» շարժման մյուս անդամներին։

Հիմնադիր խորհրդարանում ընդգծում են՝ հետապնդումներն է՛լ ավելի են սաստկացել անցած մեկ շաբաթում՝ էլեկտրաէներգիայի թանկացման դեմ բողոքի ակցիաների ժամանակ։ Երեկ նրանց հաջողվել է նկարահանել Աջափնյակից մինչև Կենտրոն իրենց անդամներին հետևող ավտոմեքենան։ Համացանցում տեղադրված ավելի քան 1 րոպե տևողությամբ տեսագրությունում երևում է Ժիրայր Սեֆիլյանին ու Վարուժան Ավետիսյանին տեղափոխող ավտոմեքենայի հետևից ընթացող մեքենայի պետհամարանիշը։

«Հիմնավոր կասկածի մակարդակով կարող եմ ասել, որ, բնականաբար, ոստիկանությունն է և հատուկ ծառայությունները: Մասնավորապես, երեք-չորս օր առաջ, երբ Հիմնադիր խորհրդարանի գրասենյակից պարոն Չուգասզյանի հետ դուրս էինք գալիս, ես նկատեցի առնվազն երեք հոգու, որ հետևում էին մեզ: Նաև ասեմ, որ շատ վատ են աշխատում, պրոֆեսիոնալ չեն, և հեշտ կարելի է իրենց զանազանել», - ասաց Վարուժան Ավետիսյանը:

Ընդդիմադիր նախաձեռնության կասկածներն է՛լ ավելի խորացրեց ոստիկանապետ Վլադիմիր Գասպարյանը, ով երկու օր առաջ «Ազատության» հարցին ի պատասխան նաև Ժիրայր Սեֆիլյանին էր մեղադրել Բաղրամյան պողոտայում շարունակվող սոցիալական ակցիան քաղաքականացնելու համար։

«Տրամաբանական կապ կա, բայց ես չեմ կարող ասել, որ դա ձևական, իրավական առումով ապացույց է: Տրամաբանական կապն ակնհայտ է: Դրա համար ես շեշտեցի, որ հիմնավոր կասկածի մակարդակով ես ասում եմ՝ այո, դա ռեժիմի թելադրանքով իրականացնում են իր մահակները՝ հատուկ ծառայությունները և ոստիկանությունը: Վախը երևակայական հրեշներ է ծնում, և դրանից դրդված իրենք ինչ-որ արտառոց քայլեր են սպասում մեզանից: Եվ այդ վախով եմ պայմանավորում իրենց ջղաձգումները», - նշեց Ավետիսյանը:

Հիմնադիր խորհրդարանը կոչ է անում ոստիկանությանը բացահայտել հետապնդողներին՝ հնարավոր հանցագործության նախապատրաստությունը կանխելու համար։

Իրավապաշտպան Ժաննա Ալեքսանյանը, մինչդեռ, այս հարցով ոստիկանությանը դիմելը անհեռանկար է համարում՝ ընդգծելով, որ ոստիկանապետն ինքն է Սեֆիլյանի մասին հրապարակավ խոսում․ - «Հետապնդողին ինչպես բացահայտես, երբ հետապնդում է ինքը՝ ոստիկանությունը: [Ոստիկանապետը] չի թաքցնում, վստահ է, որ անպատժելի է, նաև որ «դաբրո» ունի իշխանությունից Սեֆիլյանի մասին խոսել, որովհետև քրեական գործը դեռ կարճված չէ, և նա իրեն ապահով է զգում այդպես Սեֆիլյանի մասին խոսել: Ավելի շատ՝ քրեական գործի համար փորձել հիմքեր ստեղծել»:

Ոստիկանությունից «Ազատության» հետ զրույցում կտրականապես հերքեցին ընդդիմադիր շարժման անդամներին հետապնդելու մասին պնդումները։ Լրատվական ծառայությունը միաժամանակ հայտարարում է, որ, համաձայն օրենքի, քրեական գործ հարուցելու համար Սեֆիլյանն ու ընկերները պետք է գրավոր դիմեն, հրապարակված տեսագրությունն ու տեքստը բավարար չեն։

XS
SM
MD
LG