Մատչելիության հղումներ

«Ոսկե Ծիրան»-ը «բուռն ընթացքի մեջ է»


«Ոսկե Ծիրան» 12-րդ միջազգային կինոփառատոնի այսօրվա ծրագիրն ընդգրկում էր ուշագրավ հանդիպումներ և կինոցուցադրություններ:

Հայ երիտասարդ կինոգործիչների ասուլիսին հաջորդեց ֆրանսահայ կինոռեժիսոր, այս տարվա «Ոսկե Ծիրան»-ի միջազգային խաղարկային ֆիլմերի ժյուրիի նախագահ Ռոբեր Գետիկյանի վարպետության դասը: Տեղի ունեցավ նաև «Ռեժիսորներ առանց սահմանի» կինոծրագրի բացումը:

Փառատոնի շրջանակում այսօր բուլղարական կինոյի օր է․ Երևանում առաջին անգամ ցուցադրվում են բուլղարացի կինոռեժիսորների «Դասը» և «Սերը խելահեղություն է» ֆիլմերը:

«Երևանյան պրեմիերա» շարքում ներկայացված էր Ռոբ Նիլսոնի ֆիլմերից մեկը, ում հետ նաև հանդիպում կայացավ «Թումո» ստեղծարար կենտրոնում:

Իսկ «Մոսկվա» կինոթատրոնում այսօր ցուցադրվում էին Արտավազդ Փելեշյանի ու Սերժ Ավետիքյանի ֆիլմերը: Այսօր սկսվեց նաև Նաստասյա Կինսկիի մասնակցությամբ ֆիլմերի հետահայաց ցուցադրությունը:

«Ոսկե Ծիրան»-ի անփոփոխ մասնակից, ռուսաստանցի կինոքննադատ Կիրիլ Ռազլոգովը «Ազատության» հետ զրույցում կատակով ասաց, թե այս փառատոնը «շատ նորմալ ընթացք ունեցող խոլերայի է նման»․ - «Փառատոնն ընթացքի մեջ է, բացումը տեղի ունեցավ: Բացման ֆիլմը հետաքրքիր էր, բայց գեղարվեստական առումով այնքան էլ հաջողված չէ»:

Ռազլոգովը հավելեց, որ առայժմ քիչ ֆիլմեր է դիտել, բայց փառատոնը «տեղի է ունենում՝ ի հեճուկս տնտեսական և քաղաքական բարդ իրավիճակի»:

Ամերիկաբնակ Մարինա Աժաժան Սիեթլի միջազգային կինոփառատոնի ծրագրերի երկարամյա տնօրենն է: Նա առաջին անգամ է Երևանում և «Ազատության» հետ զրույցում ասաց, որ իր տպավորությունները Երևանից ուղղակիորեն կապված են Հայաստանի մասին պատմող ֆիլմերից ստացած տպավորությունների հետ․ - «Հիմնական թեման, իհարկե, Հայոց ցեղասպանությունն է, որը մինչև այժմ չսպիացած վերք է, որովհետև դեռ ճշմարտապես չի ճանաչվել»:

Մարինա Աժաժան ամուսնու՝ հայազգի երաժիշտ Վալերի Աժաժայի (Վարդան Միկոյան) հետ է եկել Երևան: Վերջինս ասաց, որ փառատոնը մի հրաշալի առիթ էր Երևան գալու, որտեղ ինքն ընդամենը 2 տարեկանում է եղել:

«Հրանտ Մաթևոսյան» հիմնադրամի նախագահ Դավիթ Մաթևոսյանի խոսքով՝ ամեն ինչ իր հունով է ընթանում․ - «Ես ուրախ եմ, որ փառատոնը իր հունը գտել է և առաջ է գնում: Բարեմաղթում եմ, որ թե՛ ներկայացուցչական, թե՛ բովանդակային առումով փառատոնն ավելի խորացնի իր ասելիքը և ուղերձը հանրությանը․․․ Ասելիքը պիտի լինի մշակույթ ստեղծող, մշակույթով ապրող, մշակույթ զարգացնող և քաղաքակրթություն ձևավորող երկրի իմիջը, որ Հայաստանը պիտի ձեռք բերի: Միայն «Ոսկե Ծիրան»-ով դա հնարավոր չէ»:

Դավթի համոզմամբ՝ դա հնարավոր է լրացնել արվեստի և մշակույթի ասպարեզում նմանատիպ փառատոների շնորհիվ:

XS
SM
MD
LG