Մատչելիության հղումներ

Գյումրեցի ակտիվիստները մերժման դեպքում «10 օրից փողոց դուրս կգան»


Գյումրեցի ակտիվիստները մերժման դեպքում «10 օրից փողոց դուրս կգան»
please wait

No media source currently available

0:00 0:04:02 0:00

Թեև էլեկտրաէներգիայի թանկացման դեմ պայքարող գյումրեցի ակտիվիստների կողմից իշխանություններին տրված վերջնաժամկետը երեկ լրացավ, այդուհանդերձ խոստացված անհնազանդության ակցիաները դեռ տեղի չեն ունենում:

Ակտիվիստները պահանջում էին կարճել Կարեն Պետրոսյանի դեմ խուլիգանության հատկանիշով հարուցված քրեական գործը: Այսօր նրանք հայտարարություն տարածեցին այն մասին, որ Կարեն Պետրոսյանի շահերի պաշտպանը իրավական գործընթաց է սկսել՝ նախաքննություն իրականացնող մարմնի կողմից իրենց միջնորդությունների մերժումը բողոքարկելով արդեն Շիրակի մարզի դատախազություն:

Փաստաբան Արամայիս Հայրապետյանն ասում է, որ իրենց չեն տրամադրում Կարեն Պետրոսյանին բերման ենթարկելու որոշման արձանագրությունը, չեն ծանոթացնում մեղադրանքի փաստական հիմքերին և առերեսումների ժամանակ գրանցված ցուցմունքներին: «Տեղեկատվական բլոկադայի մեջ ենք», - ասում է Պետրոսյանի շահերի պաշտպանը: «Նախաքննության գաղտնիության անվան տակ չի կարելի կամայականություններ թույլ տալ: Մեր կարծիքով՝ նախաքննական մարմինը, կամայականորեն մեկնաբանելով գաղտնիության սկզբունքը, սահմանափակում է պաշտպանություն իրականացնելու մեր իրավունքները», - հավելում է փաստաբանը:

Շիրակի մարզի դատախազ Րաֆֆի Ասլանյանը «Ազատությանը» փոխանցեց, որ ներկայացված միջնորդությունների վերաբերյալ արդեն կայացվել են համապատասխան որոշումներ, որոնք ուղարկվել են կողմերին: Արամայիս Հայրապետյանն ասում է, որ եթե դատախազությունը ևս իրենց հարցին դրականորեն չարձագանքի, այն կվիճարկեն դատարանում: «Մենք ունենք բոլոր հիմքերը դատախազության որոշումը դատական կարգով բողոքարկելու», - ասում է Հայրապետյանը:

Դատախազության պատասխանին սպասում են նաև ակտիվիստները: Ղարիբ Հարությունյանն ասում է, որ եթե իրենց միջնորդությունները մերժվեն, 10 օրից փողոց դուրս կգան, իսկ բավարարման դեպքում գործողություններ չեն իրականացնի: Բայց «գործողությունների կդիմենք մյուս պահանջների մասով», - ասում է ակտիվիստը:

Ակտիվիստների մյուս պահանջը ոստիկանների գործողություններին է վերաբերում: Վերջիններս հունիսի 23-ին նստացույցի մասնակից 13 ակտիվիստներին բերման ենթարկելիս բռնություններ էին գործադրել նրանց նկատմամբ: «Դրա վրա աչք են փակում», - ասում են ակտիվիստներն ու հավելում՝ Հայաստանի ոստիկանապետը երևանցի կարգազանց ոստիկաններին կարգապահական տույժի ենթարկեց, իսկ ահա գյումրեցի ոստիկանները մնացին անպատիժ: Հիմա պահանջում են, որ ուղղվի այդ սխալը և Գյումրիի ոստիկաններին ևս պատժեն: Մայրաքաղաքից 120 կմ հեռավորությունը, ըստ ակտիվիստների, ոստիկանապետի համար չպետք է տեղեկատվական և մասնագիտական անջրպետ հանդիսանա և դրա հետևանքով կողմնակալ որոշումներ կայացվեն:

Ուղիղ հեռարձակում

XS
SM
MD
LG