«Պատժամիջոցների վերացումից հետո Իրանը կկարողանա է՛լ ավելի զարգացնել հարևանների հետ հարաբերությունները: Մենք Հայաստանի հետ շատ լավ հարաբերություններ ունենք, և այդ հարաբերություններն ավելի կզարգանան», - վստահություն հայտնեց Ռեյիսին:
Տարիներ ի վեր Հայաստանի և Իրանի ներկայացուցիչներն ամենաբարձր մակարդակով խոսում են մի շարք համատեղ նախագծերի, այդ թվում՝ Մեղրիի ՀԷԿ-ի, Իրան-Հայաստան երկաթուղու, բարձրավոլտ էլեկտրահաղորդման 3-րդ գծի կառուցման մասին, սակայն գործը տեղից չի շարժվում: Իսկ մեկ այլ խոշոր նախագծի՝ Հայաստանում Իրանի սահմանի մոտ նավթավերամշակման գործարանի կառուցման մասին այլևս չեն էլ խոսում:
Իրանի դեսպանն, այդուհանդերձ, վստահ է, որ առաջիկայում սպասվող պաշտոնական այցերը նոր խթան կհանդիսանան երկկողմ հարաբերությունների զարգացման համար: «Հավանաբար առաջիկա մեկ ամսվա ընթացքում Հայաստան կայցելի Իրանի փոխնախագահի գլխավորած պատվիրակությունը: Այդ այցը Հայաստանի վարչապետ Հովիկ Աբրահամյանի՝ Իրան կատարած այցի պատասխանն է: Եթե այդ մակարդակի այցը կայանա, այն անշուշտ իր ազդեցությունը կթողնի մեր հարաբերությունների վրա», - ասաց Ռեիսին:
«Լուրջ ներդրողներ առայժմ չկան»
Դեսպանին խնդրեցինք պարզաբանել՝ հատկապես ի՞նչ հարցերի շուրջ է Իրանի փոխնախագահը բանակցություններ վարելու Երևանում:
«Իրանի փոխնախագահ Ջահանգիրիի այցի ընթացքում նախ և առաջ քննարկվելու է Հայաստան-Իրան բարձրավոլտ էլեկտրահաղորդման 3-րդ գծի կառուցման հարցը: Այդ նախագիծը բավական լուրջ ներդրումների կարիք ունի: Թերևս տեղյակ եք, որ Իրանի ֆինանսական կարողությունները դեռևս սառեցված են, և ժամանակ է հարկավոր, որպեսզի այդ գումարները ամբողջովին ապասառեցվեն: Իրանի նպատակն է կյանքի կոչել այն նախագծերը, որոնք ստորագրվել են Հայաստանի հետ», - ասաց դեսպանը:
Իրանցի դիվանագետն անդրադարձավ նաև Հայաստան-Իրան երկաթգծի կառուցման նախագծին: «Այդ երկաթգծի կառուցման համար հարկավոր է 3 միլիարդ 200 միլիոն դոլար: Որպեսզի այն կյանքի կոչվի, ներդրող է պետք: Լուրջ ներդրող առայժմ չի գտնվել», - ասաց դեսպանը։