Էլեկտրաէներգիայի բարձրացված սակագնի լրացուցիչ 6․93 դրամը կփոխհատուցվի «Որոտան հիդրոէլեկտրակայանների համալիր» ընկերության վաճառքից ստացված միջոցներից:
Այսօր այս մասին Գյումրիում հայտարարեց վարչապետ Հովիկ Աբրահամյանը, այդպիսով բացահայտելով սակագնի բարձրացված չափը սուբսիդավորելու հնարավոր աղբյուրների վերաբերյալ վերջին շրջանում ակտիվորեն քննարկվող հարցի պատասխանը:
«Եթե հիշում եք, հանրապետության նախագահը հայտարարեց, նաև կառավարությունն է այդ մասին ասել, որ մինչև աուդիտի ավարտը գործադիրն այդ ծախսը վերցնելու է իր վրա: Դա կլինի արտաբյուջեի հաշվին, Որոտանի օտարման գումարներից»,- ասաց վարչապետը:
Նա նաև վստահեցրեց, թե ամեն ինչ անելու են, որ աուդիտն անցկացվի թափանցիկ. - «Չորս խոշոր կազմակերպություններ են եղել, ուղարկել ենք նաև ռուսական կողմի համաձայնությունը ստանալու, մենք ուզում ենք ընդհանուր որոշում լինի, և նորից եմ կրկնում՝ մենք ամեն ինչ անելու ենք, որ թափանցիկ, ազնիվ լինի, բոլոր այն խնդիրները, որ կան հասարակության մեջ, փորձելու ենք աուդիտի արդյունքում վերհանել և հանրությանը տեղեկացնել»:
Վարչապետն այլ հարցերի էլ անդրադարձավ: Խոշոր հարկատուների՝ օրերս հրապարակված ցանկից հայտնի դարձավ, որ առաջին կիսամյակում Հայաստանի խոշոր հարկատուները նախորդ տարվա համեմատ մոտ 15 տոկոսով քիչ են հարկ վճարել: Տնտեսական աճ խոստացող Հովիկ Աբրահամյանն այդ ցուցանիշն արտասովոր չի համարում:
«Հարկեր հավաքելը մեր գերնպատակը չէ, եթե դրանք չկան: Հակառակը՝ մեր նպատակն է ստվերը վերհանել և բոլորին պարտադրել վճարել, հունվար-հունիս ամիսներին մեր տնտեսական աճը 4․5 տոկոս է, բոլոր ոլորտներում ունենք աճ, միայն ունենք ապրանքաշրջանառության մեծ անկում, որը ուղղակի կապված է Ռուսաստանի Դաշնության հետ: Դա մեզ համար շատ կարևոր ցուցանիշ է: Միջազգային կառույցները բոլորը բացասական գնահատական էին տալիս, ի հակառակ իրենց կարծիքի, մենք իրենց հորդորեցինք չշտապել, հիշո՞ւմ եք, մի քանի անգամ ասել ենք, որ երկրորդ կիսամյակում ավելի ակտիվ է լինելու մեր տնտեսությունը: Ես համոզված եմ, որ մենք ամեն ինչ անելու ենք՝ մեր թիմով, կառավարությունով, նախագահի գլխավորությամբ, որ որ մինչև տարվա վերջ այդ տնտեսական աճը մենք ապահովենք: քանի որ 2015 թվականի բյուջեում դրված է 4․1 տոկոս տնտեսական աճ»,- ասաց Աբրահամյանը:
Այս շաբաթ վարչապետի նախագահությամբ հակակոռուպցիոն խորհրդի առաջին նիստը կայացավ: Գրեթե բոլոր ընդդիմադիր ուժերը հրաժարվեցին մասնակցել խորհրդի աշխատանքներին, պատճաբանելով, թե կոռուպցիայի դեմ պայքարը Հովիկ Աբրահամյանն ու խորհրդում ընդգրկված ֆինանսների նախարար Գագիկ Խաչատրյանը պետք է իրենցից սկսեն: Այս կապակցությամբ Աբրահամյանը նշեց․ - «Մենք առաջիկայում ամեն ինչ անելու ենք, որ հանրության մոտ, քաղաքացիական հասարակության մոտ վերականգնենք վստահությունը»:
Վարչապետը տեղեկացրեց նաև, թե սահմանադրական բարեփոխումների մասնագիտական հնաձնաժողովն արդեն առաջիկա օրերին օրենսդիրների դատին է հանձնելու նոր Սահմանադրության նախագիծը։
Կառավարության ղեկավարն, ի դեպ, Գյումրի էր այցելել շվեցարահայ գործարար Վարդան Սրմաքեշի հետ, ով մտադիր է ներդրումներ անել Գյումրիում:
«Առաջարկել է 10 մլն դոլար ներդնել Գյումրիում, ստեղծել մի կառույց, որը կֆինանսավորի բոլոր այն տնտեսական ծրագրերը, որոնք կներկայացնեն Շիրակի գործարարները` միջին բիզնես, փոքր բիզնես, մեծ բիզնես, և ես կարծում եմ՝ դա կնպաստի Շիրակի մարզում տնտեսական ակտիվացմանն ու աշխատատեղերի ստեղծմանը, նաև առաջարկել եմ, որ կառավարությունը 20 տոկոսի՝ 2 մլն դոլարի չափով մասնակցություն ունենա, ընդհանուր 12 մլն դոլարով կփորձենք ֆինանսավորել այն բոլոր ծրագրերը, որոնք կներկայացնի Շիրակի գործարար աշխարհը: Եվ ամենակարևորը՝ լինելու է տարեկան 5 տոկոս տոկոսադրույքով, 7 տարի ժամկետով. նման ցածր տոկոսադրույք չկա որևէ բանկում»,- ասաց Հովիկ Աբրահամյանը:
Վարչապետը նաև Գյումրիում 300 աշխատատեղ բացելու խոստում տվեց, վստահեցնելով, թե ամեն ինչ անելու է Շիրակի մարզում տնտեսությունն ակտիվացնելու համար:
