Մատչելիության հղումներ

Ուկրաինան պատժամիջոցներ կսահմանի Ռուսաստանի նկատմամբ


Ուկրաինայի ԱԳ նախարար Պավլո Կլիմկին, արխիվ
Ուկրաինայի ԱԳ նախարար Պավլո Կլիմկին, արխիվ

Արտգործնախարար Պավլո Կլիմկինը վստահ է՝ Ղրիմը Ուկրաինայի կազմ կվերադառնա «շատ ավելի վաղ, քան ոմանք են ենթադրում»:

Ուկրաինայի վարչապետ Արսենի Յացենյուկի ղեկավարած կառավարությունը կազմել է Ռուսաստանի նկատմամբ պատժամիջոցների փաթեթ, որն առաջիկայում կդրվի քննարկման։ «Ուկրաինսկայա պրավդա» պարբերականի փոխանցմամբ՝ այդ մասին ասել է արտգործնախարար Պավլո Կլիմկինը։

«Փաթեթը պատրաստ է, ես իմ ստորագրությամբ են այն ուղարկել կառավարություն, հուսով եմ, որ առաջիկայում այն կմտնի ուժի մեջ», - ասել է Կլիմկինը։

Նրա կարծիքով՝ Ղրիմի բռնակցման կապակցությամբ Ռուսաստանի նկատմամբ սահմանված պատժամիջոցները երբեք չեն չեղարկվի։ «Ոչ ոք ներդրում չի անի Ղրիմում, ոչ ոք չի մեկնի Ղրիմ, այդպես Ղրիմը կվերադառնա Ուկրաինայի կազմ: Ես պնդում եմ, որ դա տեղի կունենա շատ ավելի վաղ, քան ոմանք են ենթադրում», - հայտարարել է Ուկրաինայի արտգործնախարարը և ավելացրել. - «Վաղ թե ուշ Ռուսաստանը ստիպված կլինի նստել բանակցությունների սեղանի շուրջ՝ դա կլինի տնտեսական վիճակի բերումով, երբ որևէ բնականոն զարգացում այլևս անհնար կդառնա»։

Ուկրաինայի ազգային անվտանգության և պաշտպանության խորհուրդը նույնպես առաջարկում է պատժամիջոցներ։ «Ռուսաստանի նկատմամբ ճնշումը հզորացնելու համար անհրաժեշտ է պարտադիր կարգով Ուկրաինայի տարածքում կիրառել այն պատժամիջոցները, որոնք արդեն սահմանել են Եվրամիությունը, Շվեյցարիայի Համադաշնությունը, Ամերիկայի Միացյալ Նահանգները և Մեծ յոթնյակը», - ասվում է խորհրդի կազմած տեղեկանքում։

Ուկրաինան, ԱՄՆ-ը և Եվրամիությունը Ղրիմի գրավումը «բռնակցում» են որակում և պնդում են, որ Ռուսաստանն է պատասխանատվություն կրում հակամարտության համար։

Անցյալ տարեվերջին ԱՄՆ-ը և Եվրամիությունը Ղրիմի նկատմամբ սահմանել են տնտեսական պատժամիջոցներ, որոնք տարածվում են ներդրումների, զբոսաշրջության, տրանսպորտի, հեռահաղորդակցության, էներգետիկայի, նավթի ու գազի արդյունաբերության և հանքարդյունաբերության ոլորտների վրա։

Ուկրաինան Ղրիմի բռնակցման և Դոնբասի հակամարտության հարցով Ռուսաստանի դեմ երեք հայց է ներկայացրել Մարդու իրավունքների եվրոպական դատարան, իսկ սեպտեմբերին էլ չորրորդը կներկայացնի։ Ուկրաինան փաստաթղթերի փաթեթ է կազմում Հաագայի միջազգային քրեական դատարան փոխանցելու համար։ Բացի այդ, ուկրաինացիները Ղրիմի բռնակցման հարցով դիմելու են ՄԱԿ-ի միջազգային դատարան, առայժմ՝ ընդամենը խորհրդատվություն ստանալու համար, իսկ հաջորդ քայլն արդեն դատական հայցը կլինի։

Ուղիղ հեռարձակում

XS
SM
MD
LG