Բաքվի ծանր հանցագործությունների դատարանում տեղի է ունեցել ադրբեջանցի իրավապաշտպաններ և ընդդիմադիր ակտիվիստներ Լեյլա և Արիֆ Յունուսների գործով նիստը։
Ամուսինները մեղադրվում են պետական դավաճանության, հարկերից խուսափելու, ապօրինի ձեռնարկատիրական գործունեություն վարելու և ֆինանսական այլ մեքենայությունների մեջ։
Պետական մեղադրող Ֆարիդ Նաղիևը հայտարարել է, որ ամուսինների մեղքն ամբողջությամբ ապացուցված է, և Լեյլա Յունուսի համար պահանջել է 11, Արիֆ Յունուսի համար` 9 տարվա ազատազրկում։
Դատավարությունը, հիշեցնենք, սկսվել է հուլիսի 27-ին։
Լեյլա Յունուսը բանտում է անցյալ տարվա հուլիսից, իսկ նրա ամուսինը` Արիֆը, անցյալ տարվա օգոստոսից։
Իրավապաշտպանների պնդմամբ՝ նախագահ Իլհամ Ալիևի վարչակարգը Յունուսների դատավարությամբ ցանկանում է արմատախիլ անել երկրում այլախոհության ցանկացած նշույլ։
Լեյլա Յունուսը Խաղաղության և ժողովրդավարության ինստիտուտի հիմնադիրն է և տնօրենը, իշխանությունն այդ հասարակական կազմակերպությունը չի գրանցել։ Լեյլա Յունուսը տարիներ շարունակ կապ է պահպանել հայ իրավապաշտպանների և հասարակական ակտիվիստների հետ՝ նպատակ ունենալով ժողովրդական դիվանագիտություն իրականացնել։ Նա հետևողականորեն քննադատել է Ալիևի քաղաքականությունը։
Արիֆ Յունուսը հայտնի պատմաբան է և կովկասյան հակամարտությունների հարցերով փորձագետ, նա հեղինակել է բազմաթիվ աշխատություններ Լեռնային Ղարաբաղի կոնֆլիկտի թեմայով։
Ըստ Յունուսների փաստաբանների և իրավապաշտպանների, ամուսինները ունեն առողջական լուրջ խնդիրներ, հատկապես՝ Արիֆ Յունուսը։
Այսօր դատարանում 60-ամյա Արիֆ Յունուսի ինքնազգացողությունը կտրուկ վատթարացել է, նախագահող դատավոր Աֆղան Հաջիևը շտապօգնության բրիգադի բշիշկներին թույլատրել է տեղում հետազոտել ամբաստանյալին և օգնություն ցույց տալ, ապա կարգադրել է շարունակել նիստը։ Այդ ընթացքում հունից դուրս եկած Լեյլա Յունուսը մեղադրական հայտարարություններ է հնչեցրել դատավորի և դատախազի հասցեին։
Իշխանությունները պնդում են, թե վերջերս բժիշկները հետազոտել են ամուսիններին և հաղորդել, որ նրանց առողջական վիճակին ոչինչ չի սպառնում, ուստի դատական գործընթացը կարելի է շարունակել։
Դատական հաջորդ նիստը, որի ընթացքում խոսքը կտրվի պաշտպանին, նախատեսված է գալիք երկուշաբթի օրը` օգոստոսի 10-ին։ Դրանից հետո էլ դատարանը կհրապարակի վճիռը։
Ըստ իրավապաշտպանների՝ Ալիևի ռեժիմը որևէ գթասրտություն չի դրսևորի։