Մատչելիության հղումներ

Մոսկվան ու Կիևը իրար չեն զիջում մշակույթի քաղաքականացման հարցում


Բորիս Գրեբենշչիկով, արխիվ
Բորիս Գրեբենշչիկով, արխիվ

Արվեստի գործիչներն ըստ Ուկրաինայի հակամարտության հարցում իրենց դիրքորոշման ընդգրկվում են «սև» կամ «սպիտակ» ցուցակներում, արժանանում «դավաճան» և այլ պիտակների:

Ուկրաինայի արևելքում շարունակվող արյունալի պատերազմին զուգահեռ է՛լ ավելի է քաղաքականացվում Ռուսաստանի և Ուկրաինայի մշակութային ոլորտը, որի ներկայացուցիչները ստիպված են ընտրել՝ Ուկրաինայի ինքնիշխանությա՞ն կողմնակիցն են, թե՞ ռուսամետ անջատականներին աջակցող Կրեմլի:

Մի դեպքում Կիևն է սպառնում «սև ցուցակով», մյուս դեպքում Կրեմլը՝ «ազգի դավաճան պիտակով»:

Մինչ Ռուսաստանի Պետդուման քննարկում էր արգելված մթերքների, անընդունելի գրականության, ոչ պետքական բժշկական սարքավորումների և «հայրենիքի դավաճան» մշակութային գործիչների ցանկը, Օդեսայի նահանգապետ Միխեիլ Սաակաշվիլին որոշում է է՛լ ավելի բորբոքել այդ կրքերը՝ հրապարակելով Ռուսաստանում սիրված երաժիշտ, իսկ ներկայումս Օդեսա այցելելու համար անարգանքի սյունին գամված Բորիս Գրեբենշչիկովի հետ անցկացրած երեկոյի տեսագրությունը, ինչն էլ բուռն արձագանք գտավ Ռուսաստանում:

Գերեբենշչիկովը երգել է վրացի երգչուհի Նինո Կատամաձեի հետ Օդեսայում համերգից հետո՝ Սաակաշվիլիի ներկայությամբ:

Ռուսաստանում անմիջապես գնահատեցին․ «Հանդիպում թշնամու հետ», - հայտարարել է Պետդումայի պատգամավոր Վլադիմիր Սոլովյովը, իսկ նրա գործընկեր Ալեքսանդր Ժուրավլյովը, «դավաճան» որակելով Գրեբենշչիկովին, Պետդումայի ամբիոնից հայտարարեց․ - «Նա խաչ քաշեց իր վրա»: Գրող Էդուարդ Լիմոնովն էլ նույնիսկ առաջարկեց զրկել երգչին Մոսկվայի կենտրոնի բնակարանից:

Կիևն ու Մոսկվան այս հարցում իրար չեն զիջում: Նախօրեին պաշտոնապես հրապարակվեց Կիևի «սև ցուցակը», որում ընդգրկված մեկ տասնյակից ավելի մշակութային գործիչներ «սպառնալիք են Ուկրաինայի ազգային անվտանգության համար»: Այդ ցանկում են ֆրանսիացի դերասան Ժերար Դեպարդյեն, ռուսաստանցի երգիչներ Իոսիֆ Կոբզոնը, Միխայիլ Բոյարսկին և ևս 10 հոգի․ Ուկրաինայում արգելված են նրանց մասնակցությամբ տեսանյութերն ու ռադիոհաղորդումները:

«Սև ցուցակին» զուգահեռ՝ Կիևն ունի նաև «սպիտակ ցուցակ», որում ներառված են մշակութային գործիչներ, ովքեր հանդես են գալիս Ուկրաինայի տարածքային ամբողջականության օգտին և աջակցում Կիևին Դոնբասում հակամարտության հարցում: Այս ցուցակում արվեստի ռուսաստանցի գործիչներից ընդգրկված են Անդրեյ Մակարևիչը, Յուրի Շևչուկը և Զեմֆիրան:

Ուղիղ հեռարձակում

XS
SM
MD
LG